0

推荐

བཞི་པ། འཇིག་རྟེན་པ་རྣམས་ལ་ཡོད་པའི་དགོས་པའི་ཕུགས་འདུན། འཇིག་རྟེན་པ་ལ་མཚོན་ན། མི་ལ་ལའི་འཚོ་གནས་ཀྱི་དམིགས་ཡུལ་ནི། རང་ཉིད་བློ་བདེ་བག་ཕེབས་ངང་། བདེ་སྐྱིད་ལོངས་སྤྱོད་བྱེད་པ་དེ་ཡིན། མི་དེ་ཚོའི་མིག་རྒྱ་དེ། རང་ཉིད་དང་ཁྱིམ་ཚང་ཁོ་ནའི་ཐོག་ཏུ་འཁོར་བཞིན་ཡོད་དེ། མི་དེ་ཚོས་བསམ་པར་འཇིག་རྟེན་དུ་འཚོ་གནས་བྱས་པའི། སྙིང་པོ་ཁ་རྒྱབ་གཉིས་ཀྱི་དོན་ཡིན་པར་སྙམ་ནས། ཁ་ལ་བཟའ་བཏུང་ཞིམ་མངར་ཅན་ཟ་འཐུང་དང་། རྒྱབ་ལ་གོས་སྤུས་ལེགས་དར་སོ་ཅན་གོན་པ། བློ་ལ་བབ་པའི་བཟའ་ཟླ་དང་ཕྲུ་གུ་ལྷན་དུ། མཛེས་བརྗིད་ལྡན་པའི་ཁང་བཟང་དུ་སྡོད་པ། བེད་སྤྱོད་མང་ལ་འགྲོ་རྒྱུག་ཆེ་བའི་ཤོག་དངུལ་མོད་པ། རིན་ཐང་ཆེ་བའི་གསར་དར་སྤྱོད་ཆས་ཡོད་པ་སོགས། དེ་ཙམ་གྱི་བློ་ཡིད་ཚིམ་པ་རེད། གང་ཞིག་རྒྱལ་ཁབ་དང་མི་རིགས་ཆགས་འཇིག་ གང་ཞིག་མི་རིགས་ཀྱི་སྐད་ཡིག་དང་། རིག་གཞུང་དར་རྒུད། གང་ཞིག་མི་རིགས་ཐུན་མོང་གི་ཁེ་ཕན་སོགས་ནི། མི་དེ་དག་དང་འབྲེལ་བ་ཡོད་མི་སྲིད། མི་དེ་ཚོའི་སྐྱེལ་བའི་མི་ཚེའི་འཚོ་གནས་ཀྱི་སྙིང་པོ་ནི། ཤིན་ཏུ་རྨོངས་པའི་ཁྱི་ཕག་ལྟ་བུའི། ཐ་ཤལ་བའི་འཚོ་གནས་བྱེད་སྟངས་ཤིག་རེད། མི་དེ་རིགས་ཀྱི་མི་ཚེའི་འཚོ་གནས་ལ། རིན་ཐང་གང་ཡང་མེད་དེ། ཁ་རྒྱབ་གཉིས་ནི་ཤིན་ཏུ་རྨོང་པ། དུད་འགྲོའི་ཀྱང་འཚོལ་ཐུབ་པའི་ཕྱིར། མི་ལ་ལའི་འཚོ་གནས་ཀྱི་དམིགས་ཡུལ་ནི། རྒྱལ་ཁབ་དང་མི་རིགས་ཆགས་འཇིག མི་རིགས་ཀྱི་སྐད་ཡིག་དང་ཆོས་ལུགས། རིག་གཞུང་དར་རྒུད། མི་རིགས་ཐུན་མོང་གི་ཁེ་ཕན་སོགས་ཀྱི་ཆེད་དུ་ཡིན་ལ། མི་དེ་ཚོར་ཡང་རང་ཉིད་ཀྱི་དགོས་མཁོ་དང་། རང་ཉིད་ཀྱི་ཁེ་ཕན་རེ་ཡོད་པ་ནི་ཅི་སྨོས་ཏེ། འོན་ཀྱང་མི་དེ་ཚོས་རང་ཉིད་དང་ལྷན་དུ། རྒྱལ་ཁབ་དང་མི་རིགས་ཆགས་འཇིག མི་རིགས་ཀྱི་སྐད་ཡིག་དང་། རིག་གཞུང་དར་རྒུད། མི་རིགས་ཐུན་མོང་གི་ཁེ་ཕན་བཅས་དམ་པོར་སྦྲེལ་ཏེ། གྲོན་ཆུང་སྲི་ཚག་དང་། དཀའ་སྤྱད་སྙིང་རུས། ལྷོད་མེད་འབད་བརྩོན་བཅས་བྱེད་ནས། མི་རིགས་ལ་བྱས་རྗེས་འཇོག་པ་ལས། སོ་སོ་སྒེར་གྱི་ཁེ་ཕན་བརྩོན་ལེན་མི་བྱེད་པ། སོ་སོ་སྒེར་གྱི་བདེ་སྐྱིད་ལོངས་སྤྱོད་མི་གཉེར་བར། གཙོ་བོ་རྒྱལ་ཁབ་དང་མི་རིགས་ཆགས་འཇིག མི་རིགས་ཀྱི་སྐད་ཡིག་དང་ཆོས་ལུགས། རིག་གཞུང་དར་རྒུད། མི་རིགས་ཐུན་མོང་གི་ཁེ་ཕན་སོགས་ཀྱི་ཆེད་དུ། འབད་བརྩོན་བྱེད་པའི་མི་དེ་ཚོར། ད་གཟོད་དངོས་གནས་འཚོ་གནས་ལ་དོན་སྙིང་ལྡན་ཞིང་། མི་ཚེ་ལ་རིན་ཐང་ཆེན་པོ་ཡོད་པ་ཞིག་རེད། མི་དེ་དག་གི་མི་ཚེ་ལ་རིན་ཐང་ཆེན་པོར་ལྡན་པ་ནི། མི་དེ་ཚོའི་སེམས་ལ་དམིགས་ཡུལ། ཕུགས་འདུན་ཤིན་ཏུ་ཆེན་པོར། ཡོད་པའི་དོན་གྱི་ཡིན་ནོ།