བླ་རབས་བདུན་པ་དེའི་སྲས། མཐའ་ཞུ་ཉི་གྲགས་ལྕགས་སྤྲེལ། ལོར་འཁྲུངས་མཁས་གྲུབ་དོན་དང་ལྡན།  ཡི་དམ་དབལ་གསས་ལོ་དགུར། བསྙེན་སྒྲུབ་མཛད་པས་མཆོག་ཐུན་གྲུབ་པ་བརྙེས་ཏེ། སྡེ་བརྒྱད་བྲན་དུ་འཁོལ་ཆུ་བདག་དམ་ལ་བཏགས། དེ་ཡང་ཆུ་བདག་དམ་ལ་བཏགས་ཚུལ་ནི། ལན་གཅིག་ཞེ་གཞུང་ལ་བྱོན་ནས་ཚུར་ཕེབས་ལམ་དུ།  བླ་རི་སྣ་ལ་རྒྱུ་མ་དུམ་བུ་གཅིག་ ཨ་རོའོ་ཨ་རོའོ་ཟེར་བཞིན་ནུད་པ་དང་འཕྲད་པས།  བླ་མས་དགེ་བསྙེན་གྱི་ཆོ་འཕྲུལ་ཡིན་པ་མཁྱེན་ཏེ། དགོངས་པའི་གཟིར་ནས་གཟན་ཐུའི་ནང་དུ། བཏུམ་སྟེ་བླ་བྲང་དུ་བསྣམས་ནས།  ལྕམ་ལ་ཆུ་ཁོལ་ཨེ་ཡོད་ཅེས་དྲིས་པས། ཡོད་ལགས་ཟེར་བའི་རྟེན་འབྲེལ་འགྲིགས་ཏེ་ཆུ་ནང་ཚོད་གྲབས་བྱེད་དུས།  ཆུ་བདག་གིས་རང་གཟུགས་བསྟན་ནས་ཕྱག་ཕུལ་བཞིན།      ང་ཆུ་ཁོལ་དུ་མ་ཚོད་དང་། མཐའ་ཞུ་བླ་རབས་བླ་རྒྱུད་རིམ་བྱོན་གྱི། སྲུང་མདུད་ནག་པོ་བཏགས་ཚད་ཀྱི་སེམས་ཅན་ཀུན་ལ། གནོད་པ་མི་བྱེད་ཅེས་ཁས་བླངས་དམ་བཅའ་ཕུལ།  རྒྱུ་མ་ནུད་སར་ཨ་རོའོ་སྣ་ཞེས་མིང་དུ་ཆགས་སོ༎  སྐུ་ཚེའི་སྨད་དུ་ཟླ་དགོན་བསྟན་པ་བསྐྱངས་ཏེ་བཞུགས་སོ༎ བླ་རབས་བརྒྱད་པ། དེའི་སྲས་མཐའ་ཞུ་བུ་སྡིས་གྲགས་པ། ཤིང་རྟ་ལོར་འཁྲུངས།   ཆུང་ནས་ཡོན་ཏན་ལ་སྦྱངས་བརྩོན་དང་། སྔགས་སེམས་ལ་ཉམས་ལེན་མཛད། བྱམས་མ་ལོ་བཅུ་ལ་སྒྲུབ་པས་གྲུབ་པའི་རྟགས་སུ།  ནམ་མཁར་འཕུར་བ།   རྡོ་ལ་ཕྱག་གིས་རི་མོ་འབྲི་བ།  སླེལ་པོར་ཆུ་འཁུར་བ། གཟན་ཐུ་བརྡབས་པས་ཐོག་སེར་བཀག་པ།   མཛུབ་མོས་སེར་བ་དགྲ་ཡུལ་ལ་འཁྲིད་པ་སོགས་མངའ། ལན་གཅིག་མཛོ་ར་གྲོང་ལ། ཡོན་བདག་གཅིག་ཤི་བ་ལ། ངོ་སྤྲོད་དང་འཕོ་བ་ལ་གདན་དྲངས་པས།  མི་གཞན་ཞིག་གིས་བླ་མ་ལ་འདྲེན་སྟོན་ཨེ་འདུག་ལྟ་དགོས་ཟེར་ཏེ། ཤི་ཁུལ་བྱས་ནས་འཕོ་བ་སྤར་རོགས་ཞུ་བཅུག  བླ་མས་འཕོ་བ་སྤར་བས་མི་དེའི་ཀ་ལི་ཡལ་ཏེ་དབུགས་ཆད།   ཁྱིམ་ཚང་དེས་བླ་མས་མི་བསད་སོང་ཞེས། གྱོད་ཞུས་པས་ཁ་མཆུ་མ་ཐོབ་པར་བླ་མའི་སྙན་གྲགས་གང་སར་ཁྱབ་བོ༎   བླ་མ་དེས་འདུས་སྡེ་ཟླ་དགོན་བསྟན་པ་དར་ཞིང་རྒྱས་པར་མཛད་དོ༎  བླ་རབས་དགུ་པ། དེའི་སྲས་མཐའ་ཞུ་མི་འགྱུར་གྲགས་པ། མེ་ཡོས་ལོར་འཁྲུངས། ཆུང་ནས་ཡོན་ཏན་སྦྱངས་ཤིང་། ཟླ་བ་དགོན་དུ་བསྙེན་སྒྲུབ་ཉམས་ལེན་མཛད།    འཁྲུངས་གཞིས་བླ་བྲང་དང་། དགོན་པ་གཉིས་ཀར་གཟིགས་སྐྱོང་གནང་ངོ་༎   བླ་རབས་བཅུ་པ། དེའི་སྲས་མཐའ་ཞུ་གྲུབ་ཐོབ་རྣམ་རྒྱལ་གྲགས་པ། ཆུ་སྟག་ལོར་འཁྲུངས།   མཁས་གྲུབ་བླ་མ་མང་པོ་མཇལ་ནས། སྔགས་སེམས་ཟབ་མོའི་ཁྲིད་ལུང་དང་། གདམས་ངག་ཞུས་ཏེ་ རང་དགོན་ཟླ་བ་དགོན་དུ་འཆད་རྩོད་རྩོམ་གསུམ་གྱི། བསྟན་པ་དར་བར་མཛད་རྗེས་དགུང་གྲངས་ང་ལྔར་ཞི་བར་གཤེགས༎ བླ་རབས་བཅུ་གཅིག་པ། དེའི་སྲས་མཐའ་ཞུ་ཀུན་དགའ་གྲགས་པ། མེ་སྟག་ལོར་འཁྲུངས། ཆུང་ནས་སྔགས་སེམས་སྡོམ་པ་ཞུས་ཏེ། ཟླ་བ་དགོན་དུ་བཤད་སྒྲུབ་སྒོམ་གསུམ་གྱི། བསྟན་པ་སྐྱོང་ནས་བཞུགས་སོ༎  བླ་རབས་བཅུ་གཉིས་པ། དེའི་སྲས་མཐའ་ཞུ་དགེ་གྲགས། ཆུ་སྟག་ལོར་འཁྲུངས། ཆུང་ནས་སྔགས་སེམས་ལ་ཞུགས་ཏེ། ཡི་དམ་དབལ་གསས་ལོ་དགུར་སྒྲུབ་པས། མི་མིན་ལྷ་འདྲེ་དབང་དུ་འདུས།   གཞི་བདག་ཡུལ་སའི་བསྟོད་བཀུར་ཕུལ།  ཟླ་བ་དགོན་དུ་སྔགས་སེམས་ཀྱི་བསྟན་པ། རྒྱ་ཆེར་སྤེལ་རྗེས་ཞེ་བརྒྱད་ལ་འདས་སོ༎  བླ་རབས་བཅུ་གསུམ་པ། དེའི་སྲས་མཐའ་ཞུ་སྔགས་འཆང་བདེ་ཆེན་གྲགས་པ། ཆུ་སྤྲེལ་ལོར་འཁྲུངས། ཟླ་བ་དགོན་དུ་བསྙེན་སྒྲུབ་ལས་གསུམ་གྱི། བསྟན་པ་འཛིན་ནས་དགུང་ལོ་བདུན་བཅུར་བཞུགས་སོ༎ བླ་རབས་བཅུ་བཞི་པ། དེའི་སྲས་ཆེ་བ་མཐའ་ཞུ་ཚུལ་ཁྲིམས་འོད། ལྕགས་བྱི་ལོར་འཁྲུངས། ཆུང་ནས་གྲྭ་སར་བྱོན་ཏེ་བཙུན་པ་མཛད།   དེའི་སྐབས་སོག་པོ་ཇུན་གར་བས་ཟླ་བ་དགོན་མེ་ལ་བསྲེགས།   བླ་གྲྭ་བསད་རྒྱུ་ནོར་འཕྲོག་ནས་རྩ་གཏོར་བཏང་བས། ཁོང་མར་བྱོན་ནས་ཡབ་དང་གཅུང་པོ་ལྷན་དུ། དགོན་ས་ཡར་ཙམ་སྤོས་ནས་གསར་དུ་བཞེངས༎ ས་དེར་མེ་ལ་བསྲེགས་པའི་སྐུ་འདྲ་དང་རྡོ་བརྐོས། ད་ལྟ་ས་འོག་ནས་ཐོན་པ་དང་། འདུས་སྡེ་ཆགས་པའི་ཁང་ཤུལ་རྒྱ་ཆེན་པོ་གསལ་བར་ཡོད་དོ༎   བླ་རབས་བཅོ་ལྔ་པ། དེའི་མཆེད་ཡ་མཐའ་ཞུ་གཡང་གྲགས། ཤིང་འབྲུག་ལོར་འཁྲུངས། ཟླ་བ་དགོན་སྔགས་སེམས་བསྟན་པ་བསྐྱངས༎  བླ་རབས་བཅུ་དྲུག་པ། དེའི་སྲས་ཆེ་བ་མཐའ་ཞུ་སྟོབས་རྒྱལ་གྲགས་པ། རབ་བྱུང་བཅུ་གསུམ་པའི་མེ་བྱི་ལོར་འཁྲུངས། ཆུང་ནས་རབ་ཏུ་བྱུང་སྟེ། སྡོམ་གསུམ་མིག་འབྲས་ལྟར་སྲུང་ཞིང་། གྲྭ་བཙུན་འཁོར་ལ་ཐེག་ཆེན་བོན་འཁོར་བསྐོར།      གང་འབྲེལ་གདུལ་བྱ་ཐར་པའི་ལམ་ལ་བཀོད།  གཤེན་བསྟན་ཟླ་དགོན་བསྟན་པ་དར་རྒྱས་མཛད༎  བླ་རབས་བཅུ་བདུན་པ།  དེའི་སྐུ་མཆེད་མཐའ་ཞུ་འཆི་མེད་གྲགས་པ། ས་སྟག་ལོར་འཁྲུངས།           ཆུང་ནས་ཡོན་ཏན་གྱི་གཞི་མ་འབྲི་ཀློག་སོགས། དཀའ་སྤྱད་བརྩོན་འགྲུས་ཀྱིས་སྦྱང་པ་མཛད།  མཁས་གྲུབ་བླ་མ་མང་པོའི་ཞབས་ལ་གཏུག་ནས། བོན་སྒོ་ཕྱི་ནང་གསང་བའི་དབང་ལུང་དང་ཁྲིད་སོགས་ཞུས།      ཡི་དམ་དབལ་གསས་བསྙེན་སྒྲུབ་མཛད་པའི་ཚེ། ལྷ་སྔགས་ཏིང་ངེ་འཛིན་ལ། རང་དབང་ཐོབ་པའི་རྟགས་སུ་ རྔ་གཤང་དང་གཏོར་མ་ལས་མེ་སྟག་འཕྲོ་བ།  སྒྲུབ་ཁང་འོད་ཀྱིས་ཁེངས་ནས་བུམ་ཆུ་ཁོལ་བ་དང་། བཀའ་སྐྱོང་དམ་ལ་འདུ་ཞིང་ལྷ་སྲིན་བྲན་དུ་འཁོལ་བའོ༎ འདུས་སྡེ་ཟླ་བ་དགོན་དུ་སྒོམ་སྒྲུབ་བསྟན་པ། བསྐྱངས་ནས་དགུང་གྲངས་གོ་ལྔར་བཞུགས༎ བླ་རབས་བཅོ་བརྒྱད་པ། དེའི་སྲས་མཐའ་ཞུ་གང་གྲགས། ཤིང་སྟག་ལོར་འཁྲུངས་ཤིང་སྐྱེས་སྦྱངས། ཡོན་ཏན་ཀུན་ལས་ཁྱད་དུ་འཕགས།   ཐོས་བསམ་སྒོམ་པའི་རྒྱུད་སྦྱང་སྟེ། ཡི་དམ་དབལ་གསས་བསྙེན་སྒྲུབ་ཡུན་དུ་བྱས་པས། ཀུན་ཏུ་བཟང་པོའི་དགོངས་པ་མངོན་དུ་གྱུར། འདུས་སྡེ་ཟླ་དགོན་བསྟན་པ་བསྐྱངས་ནས། དགུང་ལོ་དྲུག་བཅུར་བཞུགས་སོ༎  བླ་རབས་བཅུ་དགུ་པ། དེའི་སྲས་མཐའ་ཞུ་ཀུན་དགའ་ཚུལ་ཁྲིམས། ས་སྟག་ལོར་འཁྲུངས།  ཟླ་བ་དགོན་དུ་བསྟན་པ་འཛིན་སྐྱོང་སྤེལ་ཏེ་བཞུགས།  ཕྱི་ནང་གསང་བའི་དབང་དམ་ཤིན་ཏུ་བཙུན་པས། སློབ་བུ་བརྒྱ་ཕྲག་སྨིན་གྲོལ་དོན་ལྡན་མཛད།          བླ་རབས་ཉི་ཤུ་པ། དེའི་གཅུང་པོ་མཐའ་ཞུ་གྲུབ་ཐོབ་ཀུན་ལྡན་གྲགས་པ། རབ་བྱུང་བཅུ་བཞི་ཆུ་རྟ་ལོར་འཁྲུངས། ཆུང་ནས་འབྲི་ཀློག་དང་ས་གཏོ་སྨན་རྩིས་ལ་སོགས་མཁས་པར་སྦྱངས། སྔགས་སེམས་ཉམས་ལེན་མཛད་བཞིན། ཟླ་དགོན་བསྟན་པ་བསྐྱངས་ནས། དགུང་ལོ་གྱ་བརྒྱད་ཞིང་ལ་ཕེབས།