དུག་གསུམ་གཏམ་རྒྱུས།

ཀུན་གཞི་ལུང་མེད་མཁར་ཁང་ནང༌། །

ལྷན་སྐྱེས་མ་རིག་བུད་མེད་དང༌། །

ཀུན་བརྟགས་བདག་འཛིན་བུ་ཕོ་གཉིས། །

ལྷན་ཅིག་སྟང་དབྱལ་འཚོགས་པ་ལས། །

དུག་གསུམ་ཉོན་མོངས་བུ་གསུམ་སྐྱེས། །

ཁམས་གསུམ་འཁོར་བའི་ས་གསུམ་བཟུང༌། །

ཆགས་སྡང་རྨོངས་གསུམ་ཆུང་མར་སྤྱད། །

རིགས་དྲུག་འཁོར་བའི་བུ་དྲུག་བྱུང༌། །

སྐྱེ་བཞི་རྒྱུད་ལྔའི་ལམ་ལ་ཞུགས། །

བུ་གཅིག་ཞེ་སྡང་སྦྲུལ་ལ་ཞོན། །

ལས་སུ་གསོད་དང་གཅོད་ལ་བརྩོན། །

དམྱལ་ཁམས་བཅོ་བརྒྱད་བདག་པོ་བྱས། །

བུ་གཅིག་འདོད་ཆགས་བྱ་ལ་ཆིབས། །

ལོག་གཡེམ་བཅོམ་འཕྲོག་ལས་ལ་སྤྱད། །

ཡི་དྭགས་གྲོང་ཁྱེར་བདག་ཏུ་བྱས། །

བུ་གཅིག་གཏི་མུག་ཕག་ལ་ཞོན། །

མ་རིག་རྨོངས་འཐིབས་ལས་ལ་སྤྱད། །

བྱོལ་སོང་གྲོང་ཁྱེར་དབང་དུ་བསྒྱུར། །

བུ་གཅིག་ཕྲག་དོག་སྡིག་ར་ཞོན། །

གཞན་སྨོད་རུ་ཏྲའི་ལས་ལ་བརྩོན། །

མཐའ་འཁོབ་གྲོང་ཁྱེར་གཏན་དུ་བཟུང༌། །

བུ་གཅིག་ང་རྒྱལ་འབྲུག་ལ་ཆིབས། །

ཁྱད་གསོད་བརྙས་ཐབས་ལས་ལ་བརྩོན། །

ལྷ་མིན་གཡུལ་འཁྲུགས་དམག་གི་བདག །

བུ་གཅིག་གར་མཁན་རྨ་བྱ་ཞོན། །

རྣམ་གཡེང་ལེ་ལོའི་ལས་ལ་བརྩོན། །

ཕམ་ལྟུང་གྲོང་ཁྱེར་བདག་པོ་བྱས། །

ད་རིགས་དྲུག་གྲོང་ཁྱེར་བཅོམ་འདོད་ན། །

བུ་དྲུག་ཆམ་ལ་འབེབ་ཀྱང་དགོས། །

སྐྱེ་བཞིའི་ལམ་སྒོ་གཅོད་ཀྱང་དགོས། །

རྟ་དྲུག་རྐང་པ་གཅག་ཀྱང་དགོས། །

དུག་གསུམ་མ་མ་གསོད་ཀྱང་དགོས། །

མ་རིག་ཕྱི་མྱེས་ཕུད་ཀྱང་དགོས། །

ཀུན་གཞིའི་མཁར་ཁང་གཏོར་ཡང་དགོས། །

ཚུལ་ཡེ་ནས་སོ། །