བླ་མའི་གསོལ་འདེབས་

ཨེ་མ་ཧོ།

 

ངེས་འབྱུང་གཞལ་མེད་ན༷མ་མཁ༷འི་ཁང་བཟང་རྩེར། །

རབ་མཛེས་བསླབ་གསུམ་དབང་གཞུའི་རྒྱ༷ལ་མཚ༷ན་མཆོག །

ཐར་འདོད་འགྲོ་ཀུན་དད་པའི་རྒྱན་གཅིག་ཏུ། །

འཛིན་པའི་སུམ་ལྡན་བླ་མར་གསོལ་བ་འདེབས། །

 

སྡེ་བཞིའི་གནས་འཛིན་པད་མའི་ཚལ་གསེབ་ཏུ། །

རྨད་འབྱུང་དཀའ་སྤྱད་ཨུ་དུམ་ཝ་ར་བཞིན། །

བཅས་མཚམས་དག་པའི་འདབ་སྟོང་རབ་བཞད་པའི། །

དྲང་སྲོང་མཆོག་གྱུར་བླ་མར་གསོལ་བ་འདེབས། །

 

གསང་གསུམ་ཏིང་འཛིན་མར་ཞིའི་ཡོལ་གོ་རུ། །

ཟབ་དཀར་ཉམས་རྟོགས་བདུད་རྩི་རྟག་རོལ་ཞིང༌། །

ཟུང་འཇུག་དགའ་བཞིའི་བདེ་སྟོང་མངོན་འབར་བའི། །

གྲུབ་པའི་རྣམ་རོལ་བླ་མར་གསོལ་བ་འདེབས། །

 

ཀ་དག་ཟང་ཐལ་ལྟ་བ་ན༷མ་མཁ༷འ་རུ། །

ལྷུན་གྲུབ་འོད་གསལ་སྒོམ་པའི་རྒྱ༷ལ་མཚ༷ན་འཕྱར། །

ཤུགས་འབྱུང་རྒྱ་ཡན་སྤྱོད་པའི་རྩལ་རྫོགས་པ། །

སྐུ་བཞིའི་ངོ་བོ་བླ་མར་གསོལ་བ་འདེབས། །

 

སྒོ་གསུམ་དད་པས་གསོལ་བ་བཏབ་པའི་མཐུས། །

སྐུ་གསུམ་བླ་མའི་ཞབས་ཟུང་གཡུང་དྲུང་ཁྲིར། །

དུས་གསུམ་མི་འགྱུར་ནུབ་མེད་རྟག་བརྟན་ནས། །

ཁམས་གསུམ་བོན་གྱི་འཁོར་ལོ་བསྐོར་བར་ཤོག །

 

བླ་མའི་གསང་གསུམ་རིན་ཆེན་དབྱིག་ནོར་ཆེ། །

གསོལ་འདེབས་དད་པའི་རྒྱལ་མཚན་རྩེར་བཀོད་ནས། །

གདུང་ཤུགས་གུས་པའི་དབྱངས་ཀྱིས་བསྟོད་པ་ཡིས། །

སྒོ་གསུམ་བླ་མའི་སྐུ་གསུང་ཐུགས་ཐོབ་ཤོག །

 

ཚུལ་མཐར་ངོར་མཐའ་ཞུའི་བཙུན་གཟུགས་ཚུལ་ཡེ་ནས་དབལ་མོའི་འབྲོང་རིའི་རི་ཁྲོད་དུ་སྒོ་གསུམ་བཅད་རྒྱའི་སྐབས་ཕུལ་བ་དགེའོ། །

 

ན་མོ་གུ་རུ་ཧོ།

བོན་ཉིད་སྟོང་ཆེན་གྱི་གཤིས་སུ། །

བོན་སེམས་མ་བུ་རུ་འདྲེས་པའི། །

སྐྱབས་མགོན་རྣལ་འབྱོར་གྱི་དབང་ཕྱུག །

སྐྱབས་མཆོག་བླ་མ་རང་མཁྱེན་ནོ། །

 

གསང་གསུམ་ཡོན་ཏན་གྱི་བཀོད་པ། །

གཞོན་ནུ་བུམ་སྐུ་རུ་ཐིམ་ཀྱང༌། །

མཁྱེན་བརྩེ་ཡེ་ཤེས་ཀྱི་དགོངས་པ། །

ནམ་ཡང་འགག་པ་རང་མེད་པའི། །

 

སྤྲུལ་པའི་ཟློས་གར་གྱི་ཟླ་གཞོན། །

མྱུར་དུ་ངོམ་པ་རང་མཛད་ནས། །

མཛད་འཕྲིན་བསིལ་ཟེར་གྱི་འོད་སྟོང༌། །

སླར་ཡང་ཞིང་འདིར་རང་འཆར་མཛོད། །

 

འཁོར་དང་སྐུ་ཚེ་དང་འཕྲིན་ལས། །

འཁོར་བ་སྟོངས་པ་ཡི་བར་དུ། །

གེགས་མེད་ལྷུན་གྲུབ་ཏུ་སྐྱོང་ནས། །

བདག་སོགས་མཁའ་མཉམ་ཀུན་འདྲེན་མཛོད། །

 

གསོལ་བ་སྙིང་དཀྱིལ་ནས་འདེབས་སོ། །

བྱིན་རླབས་ད་ལྟ་རང་སྩོལ་ཤོག །

མདོ་སྔགས་བླ་མེད་ཀྱི་ཉམས་ལེན། །

གཏན་བདེའི་དགའ་སྟོན་དུ་ཕོབས་མཛོད། །

 

ཅེས་པ་འདི་ཡང་དམ་པ་གང་དེའི་དངོས་སློབ་སྤྱི་ཚང་རྟོགས་ལྡན་གཡུང་དྲུང་ཟླ་བ་ནས་དར་དང་སྨན་སྣ་བཟང་དྲུག་བཅས་ཀྱིས་སྣ་དྲངས་ཏེ་འདི་ལྟར་དགོས་ཞེས་པས་མཐའ་ཞུའི་དྲང་སྲོང་ཚུལ་ཁྲིམས་ཡེ་ཤེས་པས་དབལ་མོའི་འབྲོང་རིའི་གནས་ཞོལ་ནས་ཕུལ་བ་དགེའོ། །བཀྲ་ཤིས། །

 

སྐྱབས་མཆོག་གསུམ་རྒྱ་མཚོའི་ཐུགས་རྗེ་དང༌། །

འབྲས་བསླུ་མེད་དགེ་ཚོགས་ནོར་བུའི་མཐུས། །

བོན་བསྟན་པའི་འདུས་སྡེ་བསྟན་རྒྱས་གླིང༌། །

བསྟན་བསླབ་གསུམ་གཙུག་རྒྱན་རིན་པོ་ཆེ། །

 

མཆོག་འོད་ཟེར་སྦྱིན་པའི་ཞབས་པད་ཉིད། །

དུས་བསྐལ་པ་རྒྱ་མཚོར་རྟག་བརྟན་གསོལ། །

བསྟན་བཤད་སྒྲུབ་འཁོར་ལོའི་བྱ་བ་ཆེ། །

དོན་གེགས་མེད་མཛད་འཕྲིན་མཐར་ཕྱིན་ཤོག །

ཅེས་པ་འདི་ནི་སྟེང་ཆེན་དགོན་གྱི་མཚམས་རྒན་བཀྲ་ཤིས་རྒྱལ་མཚན་ནས་ཉིད་ཀྱི་ཚ་བོ་གཡུང་དྲུང་བློ་ལྡན་བརྒྱུད་ལྷ་རྫས་དྲི་མེད་ཀྱིས་སྣ་དྲངས་ཏེ་བསྐུལ་ངོར་མཐའ་ཞུ་ཚུལ་ཁྲིམས་ཡེ་ཤེས་པས་དབལ་མོ་འབྲོང་རིའི་གནས་ནས་སྒོ་གསུམ་དད་པས་ཕུལ་བ་དགེའོ། །