0

推荐

བསླབ་བྱའི་ཀ་ཕྲེང་བཞུགས།

 

ཨ་བོ་མདོ་མེད་ཤེས་མེད་གླེན་པ་ངས། །

ཧ་གོ་མིག་རིག་མྱོང་བའི་དོན་འགའ་བཤད། །

ས་སྟེང་འདིར་གནས་སྐྱེ་བོ་གང་དག་ཀུན། །

ཤ་ཚ་ཞི་དུལ་ཁོ་ནའི་མགུ་དཀའ་ཡང༌། །

ལ་ལུང་གང་དུ་འགྲོ་དང་གར་བསྡད་ཀྱང༌། །

ར་ལྟར་གྱོང་བའི་གཤིས་ལ་སུ་མི་དགའ། །

ཡ་རབས་ལམ་སྟོན་བདེན་གཏམ་གཙག་བུའི་དབལ། །

འ་འུར་ངོ་བསྟོད་རྫུན་གཏམ་དར་ལས་འཇམ། །

ཟ་གོས་འབྱོར་བའི་སྐབས་དང་ཕོངས་པའི་དུས། །

ཞྭ་ལྟར་བཀུར་དང་རྒྱང་བྱོལ་གྲོགས་ངན་གཤིས། །

ཝ་ལེ་ཝུ་ལེའི་ཡིད་འཆར་གཏམ་སྣ་ཚོགས། །

ཛ་དྲག་ཁ་ནས་ཐོན་དྲགས་ཆག་སྒོའི་གཞི། །

ཚ་འཇམ་རན་དང་སྐབས་ལ་བབ་པའི་དུས། །

ཙ་ཙེར་འཚེར་སྣང་འཛེམ་ཟོན་དོན་མི་འགྲུབ། །

མ་རབས་གཤིས་ལ་འཇགས་པའི་ངན་སྤྱོད་ཅན། །

བ་གླང་ལྟ་བུ་བཟང་ངན་བླང་དོར་མེད། །

ཕ་རོལ་གཞན་གནོད་རང་ཁེ་སྒྲུབ་པའི་གྲོགས། །

པ་ཏྲའི་རིས་ལྟར་སྦྲེལ་མཐུད་དམ་མ་དྲགས། །

ན་ཚོད་རྒན་གཞོན་ཁས་ཞན་དྲགས་པའི་རིགས། །

ད་གཟོད་རྒྱུས་ཚོད་མ་ལོན་འཕྲད་མ་ཐག །

ཐ་ཤལ་ངོས་དགའ་ལྐོག་བཤད་བློ་གཏད་སོགས། །

ཏ་ལེར་བྱེད་པ་མ་སྔ་རང་ཚུགས་ཟུངས། །

ཉ་ཆུ་ལྟ་བུ་རྒྱུན་རིང་གཤིབ་པའི་ནང༌། །

ཇ་ཆུ་འདྲེས་ལྟར་ཕར་ཚུར་བརྩེ་གདུང་ཅན། །

ཆ་ཤས་སྐྱོན་དང་འབྱོར་ལྡན་ཕོངས་ཀྱང་རུང༌། །

ཅ་བཅོས་གཡོ་སྒྱུས་བརྩེ་གདུང་དོར་མི་རིགས། །

ང་རྒྱལ་རང་ཤེད་རང་སྐྱོན་རྟག་ཏུ་སྤོངས། །

ག་འགྲོ་གར་བསྡད་གྲོགས་དང་མཐུན་པར་མཛོད། །

ཁ་ངག་འཇམ་ཞིང་ཁོག་ཏུ་གྲིམ་པོར་གྱིས། །

ཀ་ཕྲེང་ཚུ༷ལ་འདི་ཡེ༷་ཤེས་ཀྱི༷ས་བསྐུལ་བྲི༷ས། །

 

ཀ་བ་ལྟ་བུ་བློ་དྲང་ཁོག་ཡངས་མིར། །

ཁ་ཕྱོགས་བློ་བཏད་བྱས་ཀྱང་བསླུ་བ་མེད། །

ག་ནས་དཔྱད་ཀྱང་ངོ་འཛུམ་གཡོ་སྒྱུ་ཅན། །

ང་ཚོའི་གྲོགས་སུ་བསྟེན་ན་ཕུང་བའི་གཞི། །

ཅ་ཅོའི་ཕྱི་ཚུལ་མ་གཟབ་དྲང་བདེན་མཁན། །

ཆ་ལུགས་ཆས་གོས་གཟབ་པའི་གཡོ་ཅན་གཉིས། །

ཇ་ཡུན་ཙམ་གྱིས་བཟང་ངན་ཤེས་དཀའ་བས། །

ཉ་བེ་ཉོ་བེའི་བསྟོད་སྨད་བྱེད་མ་སྔ། །

ཏ་ལ་བཅད་ལྟར་ངན་སྤྱོད་དོར་དཀའ་ཡང༌། །

ཐ་ཤལ་བ་བཞིན་ངན་དགུ་སྤྱོད་ན་མཚང༌། །

ད་རེས་བཟང་པོའི་གྲགས་པ་མ་ལྡན་ཀྱང༌། །

ན་ནོག་གཏམ་ངན་བསྐལ་མཐར་ཁྱབ་ན་འགྱོད། །

པ་རེ་པུ་རེའི་མི་ཚེ་ཡུན་ཙམ་ལ། །

ཕ་རོལ་གཞན་ཕན་ཁོ་ན་མ་འགྲུབ་ཀྱང༌། །

བ་མོས་ལོ་ཏོག་འཇོམས་ལྟར་གཞན་གནོད་ཀྱི། །

མ་བཅོལ་ལས་ལ་འབད་པ་མ་བྱེད་ཅིག །

ཙཀྲ་བསྐོར་ལྟར་མགོ་བསྐོར་བསླུ་མང་ན། །

ཚ་གྲང་འཐབ་བཞིན་ཀུན་འགལ་མི་གྲལ་འབུད། །

ཛ་ལང་ཁེངས་དྲེགས་གཞན་ལ་བརྙས་ཆེ་ན། །

ཝ་སྐྱེས་བཞིན་དུ་ནམ་ཞིག་རང་སྨ་འབབ། །

ཞྭ་བཞིན་ཀུན་གྱིས་བཀུར་འོས་མ་གྱུར་ཡང༌། །

ཟ་རེ་ཟུ་རེའི་ཟོག་པོ་གཡོ་སྒྱུ་ཅན། །

འ་འུར་རྫུན་གྱིས་མི་མགོ་བསྐོར་མཁས་པ། །

ཡ་མེད་དེ་འདྲ་བྱེད་དགོས་ཅི་ཀྱང་མེད། །

ར་མ་ལུག་གི་སྐད་དང་ཆ་ལུགས་སོགས། །

ལ་ལུང་གང་གི་ཚུལ་དང་མ་མཐུན་ན། །

ཤ་གཟན་སྤྱང་ཁུའི་མགོ་ལ་རྭ་སྐྱེས་བཞིན། །

ས་སྟེང་རིགས་མཐུན་མི་ཀུན་ཡ་མཚན་འཛིན། །

ཧ་ཧ་ཨ་མཚར་ཀུ་རེ་སྨྲས་པ་ཡིན། །

ཨ་ཨ་ཅུང་ཟད་ཙམ་ཡང་བདེན་ཤས་ཆེ། །                  

འདི་ཡང་སྤུན་འོད་ཟེར་མཐའ་རྒྱས་ནས་བསྐུལ་ངོར་མཐའ་ཞུ་ཚུལ་ཁྲིམས་ཡེ་ཤེས་ཀྱིས་བྲིས་སོ། །