དཀོན་མཆོག་རྩ་གསུམ་འདུས་པའི་གསོལ་འདེབས་བཞུགས།

      ཨེ་མ་ཧོ།

དབྱིངས་ཉིད་ཁྱབ་བདལ་གནས་ལུགས་དེ་བཞིན་ཉིད། །

རང་འབྱུང་ཡེ་ཤེས་འོད་གསལ་སྙིང་པོའི་དོན། །

མ་བཅོས་རང་བབ་ངང་དུ་རྣམ་དག་པའི། །

བླ་མ་བོན་གྱི་སྐུ་ལ་གསོལ་བ་འདེབས། །

རང་བཞིན་འོད་གསལ་ཡེ་ཤེས་འོད་ལྔའི་གདངས། །

སྐུ་དང་ཐིག་ལེ་ཡེ་ནས་སྣང་བའི་ཆ། །

མ་འགག་ལྷུན་གྲུབ་ངང་དུ་རང་གསལ་བའི། །

བླ་མ་རྫོགས་པའི་སྐུ་ལ་གསོལ་བ་འདེབས། །

གཉིས་མེད་ཡེ་ཤེས་མཉམ་པ་ཉིད་ཀྱི་ངང༌། །

ཐུགས་རྗེ་རྩལ་སྣང་སྣ་ཚོགས་མ་འགག་པར། །

རོ་གཅིག་ཤུགས་འབྱུང་ངང་དུ་རྣམ་རོལ་བའི། །

བླ་མ་སྤྲུལ་པའི་སྐུ་ལ་གསོལ་བ་འདེབས། །

སྐུ་གསུམ་བདག་ཉིད་བླ་མར་གསོལ་བཏབ་མཐུས། །

བདག་སོགས་མཁའ་མཉམ་ཐེག་ཆེན་ལམ་ཞུགས་ནས། །

དཔོན་གསས་བླ་མ་སངས་རྒྱས་མངོན་མཐོང་གིས། །

དོན་རྒྱུད་རྟོགས་པ་འཕོ་བར་བྱིན་གྱིས་རློབས། །

སྤངས་དང་རྟོགས་པའི་ཡོན་ཏན་མཐར་ཕྱིན་ཞིང༌། །

ཁམས་གསུམ་འགྲོ་བ་མ་ལུས་སྐྱོབ་པའི་མགོན། །

མ་ནོར་ཐར་པའི་ལམ་བཟང་སྟོན་མཛད་པའི། །

བླ་མ་སངས་རྒྱས་ངོ་བོར་གསོལ་བ་འདེབས། །

ཚད་གསུམ་ཟུང་འབྲེལ་དོན་དམ་འདུས་མ་བྱས། །

འཕྲུལ་ངག་བདེན་པའི་རང་བཞིན་གཡུང་དྲུང་བོན། །

ཐེག་པ་རིམ་དགུ་སྒོ་བཞི་མཛོད་ལྔ་སོགས། །

བླ་མ་བོན་གྱི་ངོ་བོར་གསོལ་བ་འདེབས། །

སྤང་སྒྱུར་གྲོལ་བའི་ལམ་ཞུགས་བོན་བསྟན་འཛིན། །

རིག་གྲོལ་གཉིས་ལྡན་ཚོགས་མཆོག་ཀུན་གྱི་ཞིང༌། །

ས་བཅུ་ལམ་ལྔའི་བདག་ཉིད་སེམས་དཔའི་ཚོགས། །

བླ་མ་གཤེན་རབས་ངོ་བོར་གསོལ་བ་འདེབས། །

མཆོག་གསུམ་ངོ་བོ་བླ་མར་གསོལ་བཏབ་མཐུས། །

སྐྱེ་བ་འདི་དང་ཕྱི་རབས་ཐམས་ཅད་དུ། །

བླ་མ་དཀོན་མཆོག་གསུམ་དང་མི་འབྲལ་བར། །

བྱང་ཆུབ་ལམ་ཞུགས་ས་ལམ་མཐར་ཕྱིན་ནས། །

བདག་གཞན་དོན་གཉིས་འགྲུབ་པར་བྱིན་གྱིས་རློབས། །

དུས་གསུམ་སངས་རྒྱས་ཀུན་གྱི་ངོ་བོ་ཉིད། །

གདུལ་བྱའི་དོན་དུ་བཤེས་གཉེན་གཟུགས་སུ་བྱོན། །

བྱིན་རླབས་ཐུགས་རྗེ་སྐལ་ལྡན་སྨིན་མཛད་པའི། །

རྒྱུད་གསུམ་བླ་མ་རྣམས་ལ་གསོལ་བ་འདེབས། །

བོན་ཉིད་སྐྱེ་མེད་ངང་ལས་མ་གཡོས་ཀྱང༌། །

ཐབས་དང་ཐུགས་རྗེ་ཞི་དང་ཁྲོ་བོར་སྣང༌། །

མཆོག་དང་ཐུན་མོང་དངོས་གྲུབ་སྩོལ་མཛད་པའི། །

ཡི་དམ་ལྷ་ཚོགས་རྣམས་ལ་གསོལ་བ་འདེབས། །

སྟོང་ཉིད་མཁའ་ལ་ཐུགས་རྗེ་ཤུགས་ཀྱིས་འགྲོ། །

གདུལ་བྱའི་སྣང་ངོར་འདོད་དགུའི་གཟུགས་སུ་རོལ། །

བརྩེ་གདུང་དབང་གིས་དམ་ལྡན་སྐྱོང་མཛད་པའི། །

གནས་གསུམ་མཁའ་འགྲོའི་ཚོགས་ལ་གསོལ་བ་འདེབས། །

རྩ་གསུམ་ཀུན་འདུས་བླ་མར་གསོལ་བཏབ་མཐུས། །

སྐྱེ་འཆི་བར་དོའི་སྣང་ཞེན་མ་ལུས་པ། །

སྐུ་གསུམ་ལམ་བྱེད་ཐབས་མཆོག་བསྐྱེད་རིམ་གྱིས། །

སྣང་སྲིད་དག་པ་ལྷ་ཡི་དཀྱིལ་འཁོར་དུ། །

ཡོན་ཏན་འཕྲིན་ལས་འགྲུབ་པར་བྱིན་གྱིས་རླབས། །

ངོ་བོ་སྐྱེ་མེད་རྣམ་དག་བོན་གྱི་སྐུ། །

ཡེ་ཉིད་སྟོན་པ་ཀུན་ཏུ་བཟང་པོ་སོགས། །

རང་སེམས་ངོ་སྤྲོད་བདག་འཛིན་རྩད་གཅོད་པའི། །

གྲོལ་ལམ་གསང་རྒྱུད་བླ་མར་གསོལ་བ་འདེབས། །

རང་བཞིན་འགག་མེད་ལྷུན་གྲུབ་ལོངས་སྤྱོད་རྫོགས། །

ཐུགས་རྗེའི་སྟོན་པ་གཤེན་ལྷ་འོད་དཀར་སོགས། །

དབང་བཞི་བསྐུར་ནས་སྐུ་བཞི་སྨིན་མཛད་པའི། །

སྒྱུར་ལམ་ནང་རྒྱུད་བླ་མར་གསོལ་བ་འདེབས། །

གཉིས་མེད་རྩལ་ལས་གང་འདུལ་སྤྲུལ་པའི་སྐུ། །

རྣམ་མཁྱེན་སྟོན་པ་རྒྱལ་བ་གཤེན་རབ་སོགས། །

བསླབ་གསུམ་སྒོར་བཅུག་ལུང་རིག་སྟོན་མཛད་པའི། །

སྤང་ལམ་ཕྱི་རྒྱུད་བླ་མར་གསོལ་བ་འདེབས། །

མཁྱེན་དགོངས་རྟོགས་པའི་ཟབ་དོན་སྨིན་གྲོལ་སྤེལ། །

དགོངས་རྒྱུད་བླ་མ་རྣམས་ལ་གསོལ་བ་འདེབས། །

བསྙེན་སྒྲུབ་མཐར་ཕྱིན་ཕྱི་ནང་ལྷ་ཞལ་ཁུམས། །

སྒྲུབ་རྒྱུད་བླ་མ་རྣམས་ལ་གསོལ་བ་འདེབས། །

ཕྱི་ནང་གསང་བའི་རྒྱུད་ལུང་མན་ངག་སྟོན། །

བཀའ་བརྒྱུད་བླ་མ་རྣམས་ལ་གསོལ་བ་འདེབས། །

ཟབ་གཏེར་སྙན་བརྒྱུད་དབང་ལུང་མན་ངག་སྤེལ། །

གཏེར་སྟོན་གཤེན་གྱེར་རྨ་དབྱིལ་གསོལ་བ་འདེབས། །

གདུང་བརྒྱུད་བྱིན་རླབས་འགྲོ་དོན་ཕྱོགས་མེད་མཛད། །

བྲུ་ཞུ་སྤ་རྨེའུ་ཁྱུང་ལ་གསོལ་བ་འདེབས། །

གོང་མའི་བརྒྱུད་འཛིན་འོག་མའི་ལམ་སྣ་འདྲེན། །

བརྒྱུད་པའི་བླ་མ་རྣམས་ལ་གསོལ་བ་འདེབས། །

སྡེ་གསུམ་བོན་གྱི་འགྲོ་བ་འདྲེན་མཛད་པའི། །

རྩ་བའི་བླ་མའི་ཞབས་ལ་གསོལ་བ་འདེབས། །

སྐུ་གསུམ་མཆོག་གསུམ་རྩ་གསུམ་བརྒྱུད་པ་གསུམ། །

དབྱེར་མེད་རྩ་བའི་བླ་མ་རིན་པོ་ཆེ། །

རྩེ་གཅིག་མོས་གུས་གདུང་ཤུགས་དྲག་པོ་ཡིས། །

གསོལ་བ་འདེབས་སོ་ཐུགས་རྗེས་དགོངས་སུ་གསོལ། །

བདག་ནི་ཐོག་མེད་གོང་ནས་ད་ལྟའི་བར། །

སྲིད་པ་འཁོར་བའི་གནས་སུ་ཡང་ཡང་འཁྱམས། །

བྱས་པ་ཐམས་ཅད་དོན་མེད་དུས་འདས་ན། །

ད་ནི་ཐུགས་རྗེས་བཟུང་བའི་དུས་ལ་བབ། །

འབད་ཀྱང་དོན་མེད་འཇིག་རྟེན་བྱ་བ་ལ། །

ཞེན་པའི་དབང་གིས་རང་ཉིད་མི་བསླུ་བར། །

རྙེད་དཀའི་དལ་འབྱོར་འཆི་བ་དྲན་པ་ཡིས། །

བློ་སྣ་དགེ་ལ་ཕྱོགས་པར་མཛད་དུ་གསོལ། །

འཁོར་བའི་ལས་འབྲས་ཉེས་དམིགས་ཤེས་པ་ཡིས། །

དགེ་སྦྱོར་ལམ་དུ་འགྲོ་བར་བྱིན་གྱིས་རློབས། །

བྱམས་དང་སྙིང་རྗེས་བྱང་ཆུབ་སེམས་སྦྱང་སྟེ། །

ལམ་གྱི་འཁྲུལ་པ་སེལ་བར་བྱིན་གྱིས་རློབས། །

རིང་ནས་གོམས་པའི་བག་ཆགས་གཞན་དབང་གིས། །

རྣམ་རྟོག་སྤྲོས་པའི་རང་སེམས་མི་འཆིང་བར། །

སྟོང་ཞིང་བདག་མེད་དེ་བཞིན་ཉིད་མཐོང་ནས། །

འཁྲུལ་སྣང་དབྱིངས་སུ་ཞི་བར་བྱིན་གྱིས་རློབས། །

བསྟན་འཛིན་གཤེན་པོ་བྲུ་ཞུ་སྤ་རྨེའུ་སོགས། །

བསྟན་སྤེལ་སྐྱེས་མཆོག་འཕྲིན་ལས་རྒྱས་འཕེལ་ཞིང༌། །

འཆད་རྩོད་རྩོམ་པའི་བོན་བསྟན་ཕྱོགས་བརྒྱར་རྒྱས། །

གཤེན་བསྟན་ཡུན་རིང་གནས་པར་བྱིན་གྱིས་རློབས། །

མདོ་དང་སྔགས་སེམས་སྙིང་པོའི་ལམ་རིམ་ཀུན། །

སྨིན་གྲོལ་རྒྱབ་བརྟེན་ལམ་ནས་ཉེར་དྲངས་ཤིང༌། །

ཁྲིམས་གནས་ཐོས་བསམ་སྒོམ་པའི་རིམ་པ་ཡིས། །

བཤད་སྒྲུབ་བསྟན་པ་དར་བར་བྱིན་གྱིས་རློབས། །

རྒྱལ་བསྟན་འཛིན་པའི་སྐྱེས་བུ་མཆོག་རྣམས་ལ། །

དགྲ་བགེགས་བར་ཆད་རྐྱེན་གྱིས་མི་ཚུགས་པར། །

སྐུ་ཚེ་བརྟན་ཞིང་མཛད་འཕྲིན་མཐའ་རུ་ཕྱིན། །

བསྟན་འགྲོའི་དོན་ཆེན་འགྲུབ་པར་བྱིན་གྱིས་རློབས། །

སྤང་སྒྱུར་གྲོལ་བའི་ལམ་ཞུགས་གཡུང་དྲུང་སྤུན། །

ཐུགས་མཐུན་ཁྲིམས་གཙང་སྒོ་གསུམ་དགེ་སྤྱོད་ལས། །

བག་མེད་ལེ་ལོའི་རྣམ་པར་མི་གཡེང་བར། །

རྒྱལ་བསྟན་གཞུང་བཞིན་བསྒྲུབ་པར་བྱིན་གྱིས་རློབས། །

མདོར་ན་བདག་སོགས་སེམས་ཅན་མ་ལུས་པ། །

ཚེ་འདིར་ཚེ་རིང་ནད་མེད་བསམ་དོན་འགྲུབ། །

ཕྱི་མ་བོན་ཉིད་འོད་གསལ་བར་དོ་རུ། །

བླ་མ་དཀོན་མཆོག་མདུན་ཁར་བྱོན་ནས་སུ། །

འཁྲུལ་སྣང་ངོ་སྤྲོད་རིག་པ་དབྱིངས་སུ་སྤོར། །

སྐུ་གསུམ་བདེ་ཆེན་འབྲས་བུ་ས་ཐོབ་ཤོག །

 

ཅེས་པ་འདིའང་རང་གི་གཅེན་པོ། སེམས་བསྐྱེད་སློབ་དཔོན་དྲང་སྲོང་ཚུལ་ཁྲིམས་ཡེ་ཤེས་དགོངས་པ་བོན་དབྱིངས་སུ་གཤེགས་ནས་དགུང་ཞག་ཚང་སྐབས་སྐྱོ་སྣང་རབ་ཏུ་འཕེལ་ནས་བླ་མ་དཀོན་མཆོག་རྣམས་ལ་མཐའ་ཞུ་འོད་ཟེར་མཐའ་རྒྱས་པས་གསོལ་བ་དྲག་ཏུ་བཏབ་པའོ། །སྨར་རོ། །