འཁོར་འདས་ལམ་ལམ་གསལ་བའི་ཉི་མ་སྟེ།།

མཇལ་ན་བྱིན་རླབས་ཆེ་བའི་ལྷ་ཞིག་ཡོད།།

ལྷ་དེ་རྒྱ་མཚོའི་མཚན་གྱི་ནོར་བུ་ཁྱེད།།

སློབ་ལ་བརྩོན་འགྲུས་རྒོད་པའི་བུ་ཡིན་ན།།

ལག་ལ་ཁ་པར་མ་གཏོགས་མི་དགོས་པར།།

ཀུན་ལ་ཀུན་སྣང་ཁྱབ་པ་ཁྱེད་ཀྱིས་གནང་།།

རུས་ལ་མི་ཆེན་བོས་ནས་ཆོས་མ་རྩོད།།

གཤེན་ལ་གྱེར་ཆེན་ཚང་གི་བཀའ་དང་བརྟེན།།

ལྷོ་ལ་གཡུ་འབྲུག་བཞིན་དུ་གྲགས་པར་མཛད།།

འགའ་ལ་གོ་སྐབས་ཡོད་ཀྱང་བློས་མ་ཞོག།

སྟོན་པ་གཤེན་རབ་ཚང་གི་ཕྱག་ལས་ཕལ།།

སྟེང་གི་བསྟན་རྒྱས་གླིང་ནས་ལེགས་གྲུབ་བྱུང་།།

གསུང་གིས་གཤེན་ས་མ་ཤོར་བསྟན་ས་ཟིན།།

ཐུགས་ལ་སེར་སྣ་དག་པའི་སེམས་དཔའ་སྟེ།།

བསྟན་འགྲོ་གཉིས་དོན་ལྕོགས་པའི་སྟོན་པ་ཁྱེད།།

པོད་དེ་དྲུང་མུ་ཚང་གི་སྙིང་ནོར་ཡིན།།

གསུང་གི་བརྗོད་བྱ་ཟབ་ལ་ཁ་ཞེང་ཅན།།

བཀའ་སྒྲོམ་གསར་པའི་གྱེར་སྒོ་ཕྱག་གིས་ཕྱེས།།

ས་ལ་ཁྱུང་ཁྲ་བྲིས་པོད་སིལ་ཏོག་འབེལ།།

ཐུགས་ལ་ཐབས་ཤེས་ཟུང་གི་དཔལ་བེའུ་ཡིས།།

ཀུན་ལ་བོན་དཔེའི་ཉེར་མཁོ་ཁྱེད་ཀྱིས་གནང་།།

གཉིས་པ་གསུང་རྟེན་དེབ་གཟུགས་ས་ཡ་གསུམ།།

གསུམ་པ་ཐུཌ་རྟེན་གསུང་འབུམ་དེབ་ཕྲེང་སྟོང་།།

འཛམ་གླིང་ཁྱབ་གདལ་མཛད་མཁན་ཁྱེད་ཉིད་བྱོན།།

རྫུན་གྱིས་འཁོར་ལོ་སྐོར་བའི་དུས་རབས་ལ།།

ཆོས་ཀྱིས་ཆབ་སྲིད་འཁྲབ་ནས་ཁྱེད་མ་འགྱིང་།།

བོན་གྱི་སྦྱིན་པ་གཏོང་བཞིན་ཁྱེད་ཉིད་བཞུགས།།

འགའ་ཞིག་མིག་རྡོག་ཚ་ཡང་བྱ་ཐབས་དཀའ།།

རེ་ཞིག་ཕྲག་དོག་སྦྲིད་ཀྱང་སྡོས་ཐབས་དཀོན།།

གདོན་གྱིས་ཟ་ཕྲུག་ལངས་ཀྱང་སྡུག་གྱོང་རེད།།

མགོ་རྣའི་སྙན་གྲགས་བསམ་ནས་མ་བཞེངས་ལ།།

སངས་རྒྱས་བསྟན་པར་བསམ་པའི་དག་བཞེངས་ཀྱི།།

གསུང་རབ་བཀའ་དང་བརྟེན་པས་འཛམ་གླིང་བཀང་།།

ཁྱེད་གསུང་རྒྱུན་ཆད་མེད་པ་ཆུ་བོ་འདྲ།།

ཁྱེད་ཐུགས་ཟད་པ་མེད་པ་ས་གཞི་འདྲ།།

ཁྱེད་ནི་གཤེན་བསྟན་སྐྱོང་ལ་གཤེན་རབ་འདྲ།།

འདི་བཞིན་གོ་ལའི་ཉིན་སྲིབ་བོན་དཔེ་བཀྲམ།།

འདི་བཞིན་མ་འོངས་བསྟན་པའི་བསྟན་དོན་དུ།།

འདི་བཞིན་ལྷ་མི་གཤེན་ལ་སྡོང་གྲོགས་ཞུ།།