4

推荐

ཨེ་མ། གྱེར་བསྟན་ཆེ།

རི་བོ་གངས་དཀར་ཏི་སེ་བཞིན།

ཁྱེད་ལ་དཀར་གཙང་གི་གནས་ལུགས་དྲང་།

མཚོ་ཆེན་མ་པང་གཡུ་མཚོ་བཞིན།

ཁྱེད་ལ་གཏིང་གཟབ་ཀྱི་ལོ་རྒྱུས་རིང་།

གནའ་མཁར་ཡུམ་བུ་ལྷ་མཁར་བཞིན།

ཁྱེད་ལ་དོན་ལྡན་གྱི་བརྗིད་ཉམས་ལྡན།

གྲུ་འཛིན་ཕོ་བྲང་ལྷུམས་སུ་མ་ཞུགས་པའི་སྔ་རོལ།

ཡར་ལུང་གཙང་པོས་ས་ཆེན་བཤག་པའི་ཚུར་རོལ།

ཁྲི་ཤོར་རྒྱལ་མོའི་རླབས་སྒྲ་མ་ཡལ་བའི་སྔོན་རོལ།

ཆོལ་ཁ་གསུམ་ན་ཁྱེད་ཀྱི་དབྱངས་རྟས་ཚེ་སྲོག་གི་རྒྱུ་བ་བསྐྲུན།

རེད། འདི་ལྟར།

ཁྱེད་ཀྱིས་ཁྲི་བདུན་གྱི་ས་སྐྱོང་འཇའ་ལམ་དུ་དྲངས་པས་རྟོགས་བརྗོད་སྙན།

ཁྱེད་ཀྱིས་འཕོ་ཆེན་ཉེར་བཞིའི་རྣམ་ཐར་མི་ཡུལ་དུ་བྲིས་པས་ངོ་མཚར་ཆེ།

ཁྱེད་ཀྱིས་འདུ་གནས་སོ་བདུན་གྱི་ཞིང་བཀོད་ཆོལ་གསུམ་ན་ཕབས་པས་གཏན་ཚིག་རྒོད།

ཁྱེད་ཀྱིས་ལོ་ངོ་སྟོང་ཕྲག་མང་པོར་སྲིད་སྐྱོང་གི་གྲོས་ཡ་བྱས་པས་རྒྱལ་ཁྲིམས་དར།

དེས་ན།

ཁྱེད་མེད་ན་རྒྱལ་པོས་བཀའ་མི་སྩོལ།

ཁྱེད་མེད་ན་བློན་པོས་གྲོས་མི་འཆའ།

ཁྱེད་མེད་ན་སྟོན་མོའི་འགོ་མི་རྩོམ།

བཀའ་བརྟེན་འགྱུར་གྱི་གླེགས་བམ་བརྒྱ་ཕྲག་བཞི་ལྔ།

དགོན་གནས་རྟེན་གྱི་མཁར་ཤུལ་སྟོང་ཕྲག་མང་པོ།

མགོན་སྐྱབས་ཡུལ་གྱི་དཔོན་གསས་ཁྲི་ཕྲག་རྒལ་བ།

འདི་དག་ཁྱེད་ཀྱི་རྟོགས་བརྗོད་ཡིན།

འདི་དག་ཁྱེད་ཀྱི་རྣམ་ཐར་ཡིན།

འདི་དག་ཁྱེད་ཀྱི་གཟི་བརྗིད་ཡིན།

རྡོར་དྲིལ་གྱི་སྐད་སྒྲས་གངས་ལྷ་མ་བཀྲོག་པའི་གོང་རོལ།

ཞྭ་སེར་གྱི་རྔ་འབོག་གངས་སུལ་ན་མ་འཁྱུད་པའི་གོང་རོལ།

གནམ་བབ་ཀྱི་གླེགས་བམ་ཕ་ཆོས་སུ་སྨོན་པའི་གོང་རོལ།

ཁྱེད་ཀྱིས་འགྲོ་བློ་ཡི་མུན་པ་བསལ་སོང་།

ཁྱེད་ཀྱིས་མི་ཡུལ་ན་ཞི་བདེ་བསྐྲུན་སོང་།

ཁྱེད་ཀྱིས་རིགས་དྲུག་ན་འོད་སྣང་སྦྱིན་སོང་།

དེ་དུས་ཁྱེད་ལ།

གཞི་ལམ་འབྲས་གསུམ་གྱི་ལྷ་ལམ་དྲང་།

གབ་མཛོད་ས་གསུམ་གྱི་རྒྱབ་རྟེན་ཟབ།

ཚད་གསུམ་གཏན་ཚིག་གི་ཕུ་ཐག་རིང་།

འོན་ཀྱང་།

བོད་གངས་ཅན་པའི་ལས་དབང་ཕྲ་སོང་།

རྗེ་བཙན་པོ་ཡི་བློ་གྲོས་སྙི་སོང་།

སྤྲང་རྒྱལ་ཁམས་པའི་ལྕེ་རྩ་རྒོད་སོང།

ཀྱེ་མ། དུས་དེ་ནས་བཟུང་།

ཁྱེད་ལ་འགའ་ཞིག་གིས་གོད་ཆག་བཟོས་སོང་། 

ཁྱེད་ལ་འགའ་ཞིག་གིས་ཕོག་ཐུག་བཏང་སོང་། 

ཁྱེད་ལ་འགའ་ཞིག་གིས་མི་ལོག་བསྟན་སོང་།

ད་དུང་།

དམར་པོའི་ཧོམ་ཞལ་དུའང་ཁྱེད་གཡུག་སོང་ལ།

སྔོན་མོའི་གཙང་ལམ་དུའང་ཁྱེད་བཏབ་སོང་།

སྲ་བའི་ཟངས་སྒྲོམ་དུ་ཁྱེད་བཅུག་སོང་ལ།

རྣོ་བའི་གསལ་ཤིང་དུའང་ཁྱེད་སྐྱོན་སོང་།

ལོ་ངོ་འདི་དག་གི་རིང་།

ནམ་ཟླ་འདི་དག་གི་དུས།

དཀའ་ཚིག་འདི་དག་གི་ནང་།

ཁྱེད་གླེང་མཁན་རྣམས་ལྕེ་བྲེག་སོང་།

ཁྱེད་གླེང་མཁན་རྣམས་རྒྱང་ཕུད་སོང་།

ཁྱེད་གླེང་མཁན་རྣམས་བཙད་ཕྱུང་སོང་།

ད་དུང་།

ད་ལོ་དང་ན་ནིངས།

ཁར་རྩང་དང་དེ་རིང་།

སང་ཉིན་དང་གནངས་ཉིན།

ཁྱེད་སྟོན་གྱི་མི་འདུག་པས་སྟོན་ཤོག་ཟེར།

ཁྱེད་འཁྱེར་རྒྱུ་མི་འདུག་པས་ཁྱེར་ཤོག་ཟེར།

ཁྱེད་བགྲང་རྒྱུ་མི་འདུག་པས་བགྲང་ཤོག་ཟེར།

ཀྱེ་མ། འདི་ཚོ་ལ་ངོ་ཚ་མེད།

འདི་ཚོ་ལ་ཁྲེལ་གཞུང་མེད།

འདི་ཚོ་ལ་ལ་རྒྱ་མེད།

མེ་ཆུ་ཧོམ་ཞལ་དུ་ཐེངས་མང་བཏབ་ཟིན་པའི་ཁྱེད་རང་།

གླེགས་བམ་གྱི་བྲག་རིར་ཐིལ་ཙེ་བརྒྱབ་ཟིན་པའི་ཁྱེད་རང་།

ལོ་རྒྱུས་ཀྱི་མ་ཡུལ་བཙོན་དུ་བཅུག་ཟིན་པའི་ཁྱེད་རང་།

ཇི་ལྟར་ཞིག་བྱས་ཀྱང་།

ཅི་འདྲ་ཞིག་གླེང་ཡང་།

སུ་ཞིག་གིས་དམོད་ཀྱང་།

གང་ལྟར།

རྒྱུ་འབྲས་རང་ཁ་རྒོད།

བདེན་པའི་ཕུ་ཐག་རིང་།

དམ་ཅན་འཕྲིན་ལས་མྱུར།

དེས་ན།

ཁྱེད་ནི་རིགས་དྲུག་གི་སྐྱབས་གནས་མཐར་ཐུག་ཡིན།

ཁྱེད་ནི་དགའ་འབོད་ཀྱི་གླུ་དབྱངས་ལེན་ས་ཡིན།

ཁྱེད་ནི་སྡུག་བསྔལ་གྱི་འོ་དོད་འབོད་ས་ཡིན།

ཁྱེད་ནི་གཏན་ནས་ནུབ་མི་ཐུབ་པའི་ཉི་གཞོན་ཡིན།

ཁྱེད་ནི་གངས་ཅན་པའི་ཕ་ནོར་ངོ་མ་ཡིན།

ཁྱེད་ནི་ཁ་བ་རི་བའི་ལོ་རྒྱུས་ཀྱི་རྡོ་རིང་ཡིན།

ཁྱེད་ལ་དད།

ཁྱེད་ལ་དུངས་།

ཁྱེད་ལ་འདུད།

ཨེ་མ། གྱེར་བསྟན་ཆེ།

གཤེན་ཚེ་ཚང་གིས་རང་ཉིད་བོན་ཁྱིམ་ཞིག་ཏུ་སྐྱེས་པར་དགའ་བ་སྒོམ་བཞིན་དུ་ནུབ་གླིང་འབྲས་ལྡན་གྲོང་དུ་ཕྱི་ལོ་ ༢༠༡༡ ཟླ་ ༡༡ ཚེས་ ༡༥ ཉིན་བྲིས།