ད་ནངས་ཡར་ལ་ལངས་དུས། །
ཁ་བ་འབབ་འགོ་ཚུགས་སོང་། །
སྦྲ་ནག་རང་ཁྱིམ་གྲུ་བཞི། །
དྲན་པའི་བསྣོན་མ་བརྒྱབ་སོང་། །
ཕྱོགས་ཀྱི་རི་བོ་རྣམས་ཀྱིས། །
རབ་དཀར་རྨོག་ཞུ་གྱོན་སོང་། །
ལ་ལུང་དངུལ་མདོག་འདྲ་བའི། །
ཕ་ཁྱིམ་ཡིད་ལ་འཁོར་སོང་། །
ལྗོན་པའི་ནེའུ་གསེང་ཚོགས་ཀྱིས། །
མགོ་བོ་ཐུར་དུ་གུད་སོང་། །
ལོ་འབྲས་གཡུལ་དུ་ཟ་བའི། །
གྱིམ་ཤོད་གསེར་མོ་དྲན་སོང་། །
ཁ་བ་བབས་དང་མ་བབས། །
སྨིན་དྲུག་དོང་ལྷུང་འདྲ་སོང་། །
གངས་སྨུག་རི་སུལ་ཁྲོད་ཀྱི། །
མཆེད་པའི་རྫི་གླུ་དྲན་སོང་། །
ན་ཆུང་བྱིས་པའི་ཚོགས་ཀྱིས། །
རྐང་རྗེས་ཐང་མལ་བརྡལ་སོང་། །
གང་འདོད་རྣམ་གཡེང་རོལ་པའི། །
བྱིས་དུས་འཚོ་བ་དྲན་སོང་། །
བརྩེ་མདངས་བགོད་སྒྲ་ལྷན་དུ། །
ཁ་བའི་རོལ་རྩེད་འཁྱུད་སོང་། །
ཆུང་ནས་འདྲིས་པའི་ན་ཟླ། །
ཕྱིར་དྲན་ཀློང་དུ་ཐིམས་སོང་། །
འབྱུང་ལྔའི་ལྷ་དང་ལྷ་མོས། །
ཁ་བ་འབབ་མཚམས་མ་འཇོག །
ང་དང་གྲིབ་མ་ནག་རིལ། །
ད་དུང་རྩེད་འཕྲོ་ལུས་སོང་། །
ཕྱི་ལོ་ ༢༠༡༡ ཟླ་ ༡༢ ཚེས་ ༦ ཉིན་རང་ཤག་གི་སྒེའུ་ནས་ཁ་བ་འབབ་བཞིན་པའི་ཕྱི་རོལ་དུ་གཅེར་ཏེ་བྲིས། །
- ཟིན་ཐོ་གོང་མ།རྒྱུ་མཚན་ཁུངས་སྐྱེལ་བྱེད་ཀྱི་ཡོད།
- ཟིན་ཐོ་འོག་མ།མཁས་པས་ལ་བཤད་ལུང་བཤད་ཟེར་ན་འདི་འདྲ་རེད།
གྲོགས་པོ་གཤེན་ཚེ་ཚང་གི་རྩོམ་ཡིག་འདིས་སླར་ཡང་བདག་གི་ཡིད་དབང་ཕྲོག་སོང་ངོ་།གཙང་ཚས།
ཁ་བ་ལྷབ་ལྷུབ་འབབས་དུས།།ཁ་བའི་བདེ་སྡུག་དྲན་ཡོང་།།
ཁ་སེམས་ཁ་བར་དཀར་བའི།།
ཁ་བའི་གྲོགས་ལ་འཚམས་འདྲི།།
ཁ་བའི་ཁ་དོག་གླེང་ན།།
ཁ་བ་མ་མཐོང་འགོར་བའི།།
ཁ་བའི་བུ་ཆུང་ང་ཡང་།།
ཁ་བའི་ལྗོངས་ལ་ཆས་འགྲོ།།
ཁ་བ་འབབས་འཚམས་གཞག་དུས།།
ཁ་བ་ཅན་ལ་སླེབས་དགོས།།
ཁ་བ་ཁུང་འཕང་འགྱུར་ཉིན།།
ཁ་བའི་རྣམ་ཤེས་ཁྱེར་རོགས།།
ཁ་ཕོ་ཡར་ལ་མ་གཏད།།
ཁ་བ་མར་ལ་འབབས་བྱུང་།།
ཁ་བའི་གྲང་རླུང་ཁྲོད་ནས།།
ཁ་བའི་བདེ་སྡུག་གླེང་གཞག།།
ཁ་མཆུ་ཕར་ལ་མ་བཤད།།
ཁ་བའི་གནད་དོན་བགྲོས་ཡོད།།
ཁ་ཁོག་མེད་པའི་མི་དེས།།
ཁ་ལ་རྒྱ་གྲམ་བཞག་བྱུང་།།
ཁ་སེམས་མཐུན་པའི་གྲོགས་པོ།།
ཁ་ཁོག་མེད་པ་ལོས་ཡིན།།
ཁ་བ་ཆུ་ལ་འགྱུར་དུས།།
ཁ་བའི་ཀློང་དུ་ཐིམ་སོང་།།
ཁ་བ་ངས་ཀྱང་གླེང་ཡོང་།།
ཁ་ཚིག་ཁྱེད་དང་མཐུན་དགོས།།
ཁ་བའི་ལམ་བུ་དོག་རུང་།།
ཁ་བ་གླེང་མཚམས་མི་འཇོག།
ཁ་ནས་ཁ་བ་གླེང་ན།།
ཁ་ཆུ་ཁ་ནས་འཐོར་སོང་།།
ཁ་བ་ཅན་གྱི་མི་ལ།།
ཁ་ལས་རླུང་རྟ་དར་ཤོག།
ཕ་ཡུལ་ཁ་བ་ཅན་དེ་རྒྱང་དུ་གྱེས་པའི་ཞི་བདེ་རྒྱལ་མཚོ་འགྲམ་ངོགས་སུ་ཁ་བ་སེམས་ལ་བརྣག་སྟེ་ཡ་བྲང་གཡུ་འབྲུག་གིས་ཤར་མར་སྤེལ།