“ རི་བོ་དགེ་ལྡན་པའི་མཁས་དབང་བེ་རི་བས་ང་ལ་སྙན་ངག་བྲིས་དང་གསུངས་སོང་། ”

ཀ་དག་རྣལ་འབྱོར་འདྲ་བའི་བེ་རི་བས། །

ཁ་ནས་གང་བྱུང་ལག་ནས་བྲིས་བྲིས་ནས། །

ག་ས་ག་ལ་མཚན་སྙན་ཁྱབ་དྲགས་པས། །

ང་ལའང་གང་བྱུང་ཉུལ་རྒྱུའི་གོ་སྐབས་ཐོབ། །

ཅ་ཅོའི་གཏམ་ལ་དགའ་བའི་བེ་རི་བས། །

ཆ་ལུགས་འགྲིག་ཀྱང་རང་མདོག་མི་བཟང་བའི། །

ཇ་མངར་ཐུང་ཞོར་བྲིས་པའི་ ༡) ལྷ་མོ་ནི། །

ཉ་རེ་ཉོ་རེའི་ཨ་ཅག་རྒྱག་པ་ཞིག །

ཏ་ཀུ་ནོར་ལ་མི་མོས་བེ་རི་བས། །

ཐ་སྙད་ཚིག་ལ་དབུ་རིལ་རྒྱུད་ཐལ་ནས། །

ད་ནང་བཞེངས་ནས་མུན་འགོ་མ་རུབ་བར། །

ན་ཟུག་གཏོང་ཡང་ཞལ་ལག་མ་མཆོད་གསུངས། །

པ་ཅོག་ཅན་ལ་མོས་པའི་བེ་རི་བས། །

ཕ་རོལ་ཚོགས་ལ་སྙན་ངག་བྲིས་བྲིས་ནས། །

བ་ལང་གཉེར་ས་ལྟ་བུའི་སྲང་གཞུང་ན། །

མ་ཇུ་ཊི་ལའི་ ༢) མ་རྒན་མཇལ་མཁན་མང༌། །

ཙ་གེ་ཙི་གེ་མི་དགོས་བེ་རི་བས། །

ཚ་བ་ཆེ་བའི་ལྡི་ལིའི་གྲོང་ཁྱེར་ན། །

ཛ་དྲག་ཆེད་དུ་ཡར་མར་རྒྱུགས་དྲགས་ནས། །

ཝ་ལེར་དགོས་མཁོའི་ཅ་དངོས་གཡུག་པ་མང༌། །

ཞྭ་གོས་དང་འདོད་མི་དགོས་བེ་རི་བས། །

ཟ་མ་གང་བྱུང་ཐམས་ཅད་མཆོད་ཐལ་ནས། །

འ་ཙི་མཚན་དཔེ་རྫོགས་པའི་ཞལ་རས་ལ། །

ཡ་མའི་ན་ཚས་གདུང་བ་ཉུང་ཉུང་མིན། །

རྭ་ལྟར་ཁོག་གྱང་མིན་པའི་བེ་རི་བས། །

ལ་ལུང་གང་དུ་ཕེབས་ཀྱང་དེ་གནས་སུ། །

ཤ་ཁྲག་མི་གཅིག་ཕ་ཡུལ་མི་གཅིག་པའི། །

ས་ཆ་གང་སར་གྲོགས་པོ་བཟོས་པ་མང༌། །

ཧ་ཅང་ཡ་མཚན་ཅན་གྱི་བེ་རི་བས། །

ཨ་རོགས་ང་ལ་སྙན་ངག་བྲིས་དང་གསུངས། །

ཧ་ཅང་རྒྱུ་རྩལ་མེད་པའི་བུ་རུལ་ངས། །

ཨ་མཚར་འདི་ནི་མ་ཇུ་ཊི་ལར་བྲིས།

 

༡)ལྷ་མོ་ནི་དེ་སྔོན་བེ་རི་བས་སྙན་ངག་ཞིག་བྲིས་ནས་སྐད་གྲགས་ཆོད་པའི་ཨ་ཅག་དེ་རེད།  

༢) མ་ཇུ་ཊི་ལ་ནི་རྒྱ་གར་གྱི་རྒྱལ་ས་ལྡི་ལིར་ཡོད་པའི་བོད་མིའི་གཞིས་སྒར་ཞིག་རེད།