1

推荐

རང་རིག་ཉམས་ལེན་དྲི་བ།

རང་རིག་དོན་གྱི་ཞིང་ཁམས་སུ། །

རང་སེམས་ཀུན་བཟང་གི་བླ་མ་བཞུགས། །

རིག་རྩལ་འགག་མེད་སློབ་མ་ཡིས། །

སྣ་ཚོགས་གཉིས་མེད་ཚོགས་ཕུལ་ནས། །

ཉག་ཅིག་དོན་གྱི་བླ་མ་ལགས། །

རང་སེམས་སྤྲོས་བྲལ་ཉག་གཅིག་ལ། །

འཁོར་འདས་གཉིས་སུ་ཡོད་ལགས་སམ། །

སྐྱོན་ཡོན་གཉིས་སུ་ཡོད་སམ། །

བདེ་སྡུག་གཉིས་སུ་ཡོད་ལགས་ལས། །

བཟང་ངན་གཉིས་སུ་ཡོད་ལགས་ས། །

ལྷ་འདྲེ་གཉིས་སུ་ཡོད་ལགས་སམ། །

ཕན་གནོད་གཉིས་སུ་ཡོད་ལགས་སམ། །

དགེ་སྡིག་གཉིས་སུ་ཡོད་ལགས་སམ། །

སྤང་བླང་གཉིས་སུ་ཡོད་ལགས་སམ། །

གཟུགས་ལ་མཛེས་དང་མི་མཛེས་གཉིས། །

སྒྲ་ལ་སྙན་དང་མི་སྙན་གཉིས། །

དྲི་ལ་ཞིམ་དང་མི་ཞིམ་གཉིས། །

རོ་ལ་མངར་དང་མི་མངར་གཉིས། །

རེག་ལ་འཇམ་དང་མི་འཇམ་གཉིས། །

ཡིད་ལ་འཐད་དང་མི་འཐད་གཉིས། །

ཡོད་དམ་མེད་དམ་བླ་མ་ལགས། །

ངེས་པའི་དོན་དུ་ཅི་ལྟར་ལགས། །

གསལ་བར་བདག་ལ་བཤད་དུ་གསོལ། །

ཞེས་ཞུས་སོ། །དེ་ལ་བླ་མས་སྨྲ་བསམ་བརྗོད་བྲལ་ཆེན་པོའི་གསུང་གིས་འདི་སྐད་ཅེས་གསུངས་ཏེ།

རང་རྩལ་རིག་པའི་སློབ་བུ་ལགས། །

ཞུས་པ་ལེགས་སོ་རིགས་ཀྱི་བུ། །

ཇི་ལྟར་ཞུས་བཞིན་བདག་གིས་བཤད། །

འཁོར་བ་མྱང་འདས་བོན་རྣམས་ཀུན། །

ངེས་པའི་དོན་དུ་འདི་ལྟར་ལགས། །

རང་སེམས་སྤྲོལ་བྲལ་ཉག་གཅིག་ལ། །

འཁོར་དང་མྱང་འདས་གཉིས་སུ་མེད། །

འཁོར་འདས་གཉིས་སུ་སྣང་བ་ཀུན། །

རང་རིག་རྩལ་དུ་ཤེས་པར་གྱིས། །

དེ་བས་ལོགས་སུ་ཡོད་མ་ཡིན། །

རང་སེམས་སྤྲོས་བྲལ་ཉག་གཅིག་ལ། །

སྐྱོན་ཡོན་གཉིས་སུ་མེད་པ་སྟེ། །

སྐྱོན་ཡོན་གཉིས་སུ་སྣང་བ་ཀུན། །

རང་རིག་རྩལ་དུ་ཤེས་པར་གྱིས། །

རང་སེམས་སྤྲོས་བྲལ་ཉག་གཅིག་ལ། །

བདེ་དང་སྡུག་བསྔལ་གཉིས་སུ་མེད། །

བདེ་སྡུག་གཉིས་སུ་སྣང་བ་ཀུན། །

རང་རིག་རྩལ་དུ་ཤེས་པར་གྱིས། །

རང་སེམས་སྤྲོས་བྲལ་ཉག་གཅིག་ལ། །

བཟང་དང་ངན་པ་གཉིས་སུ་མེད། །

བཟང་ངན་གཉིས་སུ་སྣང་བ་ཀུན། །

རང་རིག་རྩལ་དུ་ཤེས་པར་གྱིས། །

རང་སེམས་སྤྲོས་བྲལ་ཉག་གཅིག་ལ། །

ལྷ་འདྲེ་གཉིས་སུ་ཡོད་མ་ཡིན། །

ལྷ་དང་འདྲེ་རུ་སྣང་བ་ཡང༌། །

རང་རིག་རྩལ་དུ་ཤེས་པར་གྱིས། །

དེ་བས་ལོགས་སུ་ཡོད་པ་མིན། །

རང་སེམས་སྤྲོས་བྲལ་ཉག་གཅིག་ལ། །

ཕན་དང་གནོད་པ་གཉིས་སུ་མེད། །

ཕན་གནོད་གཉིས་སུ་སྣང་བ་ཡང༌། །

རང་རིག་རྩལ་དུ་ཤེས་པར་གྱིས། །

རང་སེམས་སྤྲོས་བྲལ་ཉག་གཅིག་ལ། །

དགེ་དང་སྡིག་པ་གཉིས་སུ་མེད། །

དགེ་སྡིག་གཉིས་སུ་སྣང་བ་ཀུན། །

རང་རིག་རྩལ་དུ་ཤེས་པར་གྱིས། །

རང་སེམས་སྤྲོས་བྲལ་ཉག་གཅིག་ལ། །

སྤང་དང་བླང་བ་གཉིས་སུ་མེད། །

སྤང་བླང་གཉིས་སུསྣང་བ་ཀུན། །

རང་རིག་རྩལ་དུ་ཤེས་པར་གྱིས། །

རང་སེམས་སྤྲོས་བྲལ་ཉག་གཅིག་ལ། །

གཟུགས་ལ་མཛེས་དང་མི་མཛེས་མེད། །

སྒྲ་ལ་སྙན་དང་མི་སྙན་མེད། །

དྲི་ལ་ཞིམ་དང་མི་ཞིམ་མེད། །

རོ་ལ་མངར་དང་མི་མངར་མེད། །

རེག་ལ་འཇམ་དང་མི་འཇམ་མེད། །

ཡིད་ལ་འཐད་དང་མི་འཐད་མེད། །

འཁོར་འདས་བོན་རྣམས་ཐམས་ཅད་ཀུན། །

ངེས་པའི་དོན་དུ་དེ་ལྟར་ལགས། །

ཅེས་པའི་ཚུལ་འདིའང་ཚུལ་ཡེ་པས་རྩེ་དྲུག་ཤེལ་དགོན་དུ་ཅི་ཤར་གང་དྲན་དུ་བྲིས་སོ། །