གཉིད་དང་རྨི་ལམ་གྱི་རིན་ཐང་ཀེ་ཏ་ཀ།
མི་སེམས་ཕྱེད་ཀ་མཚན་མོའི་གཉིད་ལ་ཐུག།
མི་ལུས་ཕྱེད་ཀ་བདེ་བའི་མལ་ལ་ཐུག།
མི་ཚེ་ཕྱེད་ཀ་ལུང་མ་བསྟན་ལ་ཐུག།
ཕྱེད་གསུམ་པ་རྣམས་ཕྱོགས་གཅིག་ཤེས་ལ་ཐུག། ཅེས་བྱུང་རྒྱལ་གྱི་གཏམ་དང་བསྟུན་ནས་ཡིན་ལུགས་གང་ཞིག་འཆད་པ་ལ། ལས་ཀྱི་དབང་གིས་འཁྲུལ་སྣང་གི་ཆ་ཤས་ཞིག་སྟེ། སྲོག་གིས་བསྡུས་པའི་འགྲོ་བ་ཕལ་ཆེར་གྱི་འཚོ་བ་ཟབ་མོ། ང་ཚོ་མི་བུ་ཞིག་ལ་མཚོན་ན་བཅུད་ལྡན་གྱི་ཤ་མར་དང་སྦྲང་དཀར་གྱི་རྩམ་པ། ཇ་མངར་འོ་ཇ་དཀར་མོ་དང་བསྲུབས་མ། མ་ཟད་དཀར་མངར་གྱི་བཟའ་བཏུང་རིགས་གང་ལའང་མ་བརྟེན་པར་མི་ཚེ་ཕྱེད་ཀ་ངང་གིས་འཚོ་བའི་གཉིད་དང་གཉིད་ཀྱི་སྐོར་ལ་རགས་ཙམ་དཔྱད་དགོས་པ་སྣང་། དེ་ཡང་ང་ཚོ་མི་ཕལ་ཆེར་གྱིས་གཉིད་ཅེས་པ་འདི་ལུང་དུ་མ་བསྟན་པ་ཞིག་ངོས་འཛིན་འདྲ་ཡོད་ན་མ་གཏོགས་འདི་ཡོད་ན་ཁེ་ཕན་དང་འདི་མེད་ན་གནོད་སྐྱོན་སོགས་བསམ་གཞིག་གཏོང་མཁན་ཉིན་མོའི་སྐར་མ་དང་མཚུངས་པར་སེམས། ང་ཡང་ད་བར་དུ་དེར་ལོས་ཐེ། ངས་དེ་སྔོན་གཉིད་པའི་དུས་ཚོད་དང་མ་གཉིད་པའི་དུས་ཚོད་ག་ཚད་འདུག་ཁ་རང་ལ་སྐོར་ནས་འདང་ཅུང་ཙམ་ཡང་རྒྱག་མ་མྱོང་། ངོ་མ་ང་དོན་རྐྱེན་དེ་དག་དང་མ་འཕྲད་པའི་རྒྱུ་ཆ་གཅིག་ནི་ཕ་མའི་བཀའ་དྲིན་གྱིས་ཟས་གོས་ལ་དཀའ་ངལ་མེད་པ་དང་། གཉིས་ནས་རང་ཉིད་མདུན་ལམ་འཚོལ་མི་ཤེས་པ་ཁྱི་སྤྱང་བཞིན་ཉུལ་བས་ལེན་པ་ཁོ་ན་རེད། དེ་ལྟར་གནམ་འོག་འདིར་མི་ཚེ་ཁྲོག་བརླགས་བཟོ་མཁན་ནི་ཅི་འདྲའི་མང་བ་ལ། ངས་བསམ་ཚུལ་ཞིག་ལ་འདི་ལྟར་ཉིན་མཚན་གཉིས་དུས་ཡུན་རིང་ཐུང་མཉམ་ཟེར་ནའང་ཆོག དཔེར་ན་དཔྱིད་ཉིན་མཚན་མཉམ་པ་དང་སྟོན་ཉིན་མཚན་མཉམ་པ། ཡང་སྟོན་ནམ་རིང་བ་དང་དགུན་ཉི་ཐུང་བ་སོགས་ཕྲན་ཙམ་ཡོད་ཀྱང་སྤྱི་ཡི་ཆ་ནས་མི་འདྲ་རྒྱུ་གང་ཡང་མེད་སྙམ་མོ། ཉིན་གཅིག་ལ་ཟ་མ་ཐུན་བཞི་ཟ་མཁན་ང་རང་ཚོའི་དབང་དུ་བཏང་དུས་ཐུན་གསུམ་མ་ཟོས་ན་བསྡོད་ཚུགས་ཀྱི་ཨི་འདུག་དཀའ་ལས་ག་ཚད་ཡོད་ཉམས་མྱང་ཡོད་ངེས་པ་རེད། དཔེར་ན་ཁྱིམ་པ་བསྙེན་གནས་པ་འགའ་རེས་ཉིན་གཅིག་ལ་ཟས་ཐུན་བཞི་སྤངས་སྐབས། མིག་དོང་ལ་སྟེགས། ཁ་གྱོང་རུ་ལོག ཤི་མིན་གསོན་མིན་གྱི་རྣམ་པ་ལ་ལྟོས་དང་ཤེས་སླའོ། དེས་ན་གཉིད་ལ་གཟི་བརྗིད་མི་འདུག་གམ། ཡང་འགའ་རེས་དེ་ནི་གཉིད་མ་རེད་ཉིན་མོར་ཟ་མ་ཡག་པོ་ཟོས་པས་རེད་ཟེར་ནས་གཉིད་ལ་འཐང་ཆུང་བྱེད་མི་མང་པོ་གདའ། དེ་ལྟར་ན་ཁྱོད་མཚན་མོ་དེར་གཉིད་དང་མ་གཉིད་ཁྱད་པར་མེད་པ་ཞིག་ཡོང་དགོས་པ་མ་ཡིན་ནམ། འོན་ཀྱང་ཟ་མ་སྒོ་མིན་སྡུག་བསྔལ་ཆེ་ཆུང་རིག་པ་གྲིམ་ལྷོད་སོགས་གཉིད་དང་འབྲེལ་ནས་ཁྱད་པར་མང་དུ་འབྱེད་རྒྱུ་ཡོད་པ་ནི་ཚང་མས་ཤེས་སླ་བ་མ་ཟད་ཞོར་དུ་གཉིད་ཀྱི་ཁེ་ཕན་ཅུང་ཙམ་རེ་རྟོགས་ནུས། དེའི་ཡན་གཉིད་ཅེས་པ་དེ་གླེང་སློང་གི་ཚུལ་དུ་བསྟན་པ་ཡིན། ད་ནི་གཉིད་ཀྱི་སྐོར་ཞེས་པ་རྨི་ལམ་གྱི་རྣམ་བཞག་ལ་རྨི་ལམ་གྱི་རྒྱུ་དང་བཅས་ཏེ་དུག་ལྔའི་རྨི་ལམ་དང་། རྨི་བ་ལམ་ཁྱེར་དང་། རྨི་བ་ལམ་ཁྱེར་གྱི་འབྲས་བུ་དང་གསུམ་གྱི་སྒོ་ནས་འཆད། དང་པོ་ལ་རྨི་ལམ་གྱི་རྒྱུ་ནི་ཚེ་རབས་སྔ་མ་ནས་ད་ལྟའི་བར་བསགས་པའི་བག་ཆགས་སྡིག་སྒྲིབ་གང་རུང་ཞིག་ཡིན་པ་གོར་མ་ཆགས། དུག་ལྔའི་རྨི་ལམ་གྱི་དང་པོ་ཞེ་སྡང་གི་རྨི་ལམ་ནི་དམྱལ་བ་ལ་བར་ཐག་ཉེ་བའི་ལྟས་སམ་རྨི་ལམ་ཡིན། དེ་ཅི་ལྟ་བུ་སྙམ་ན། སྐྱེ་བོ་གང་ཞིག་གཉིད་པའི་ཚེ་ས་བོན་༼དུ༽དང་སྲོག་འཛིན་གྱི་རླུང་ལ་ཞོན་པའི་སེམས་དེ་རང་ལུས་ཀྱི་རྐང་མཐིལ་རྩའི་ལམ་དུ་ཚུད་པས། མེ་མ་འོབས་སུ་ལྷུང་བ་དང་མེའི་ཁང་པར་ལུས་པ་དང་རི་བར་བཅིར་བ་བྲག་རོང་གཅན་འཕྲང་སོགས་ཀྱིས་གནོད་པ་དང་། རང་གིས་སྲོག་བཅད་པའི་སེམས་ཅན་རྣམས་ཀི་ཀི་སོད་སོད་ཅེས་རང་གི་དགྲ་བོ་རུ་གྱུར་ནས་རང་ལུས་གཅོད་གཏུབ་བྱེད་བཞིན་ཡོང་། ཡང་ཆུ་རླུང་དང་གངས་སྦུབས་རླུང་འཚུབ་ཀྱིས་རང་ལུས་ཞིག་རལ་འཐོར་སད་དུ་སོང་ནས་་སྡུག་ཅིང་བསྔལ་བ་རྨིས། དེ་ནི་གང་ཟག་དེའི་རྒྱུད་ལ་དམྱལ་བའི་རྒྱུ་ཤས་ཆེ་བའི་རྟགས་འཆར་བ་ཡིན་པས་ཚེ་འཕོས་ནས་དམྱལ་བ་ལ་འགྲོ་ངེས་པ་རེད་སྙམ། གཉིས་པ་འདོད་ཆགས་ཀྱི་རྨི་ལམ་ནི་གཉིད་པའི་ཚེ་རླུང་སེམས་ས་བོན་༼ཏྲི༽གསང་གནས་སུ་རྒྱུ་བས། གོན་རྒྱུ་མེད་པའི་སྡུག་བསྔལ་ཟ་རྒྱུ་མི་རྙེད་པའི་དོག་པ་མདོར་ན་སེར་སྣའི་དབང་གིས་ཡོ་བྱད་ཤོར་དོག་དང་ཕྲན་ཙམ་བདོག་པའང་ལོངས་སྤྱོད་དབང་མེད་པར་རྐུ་འཕྲོག་བཅོམ་གསུམ་སོགས་གཏོར་བརླགས་ངང་དུ་རྨིས་པའོ། ད་དུང་སྲེད་པའི་དབང་གིས་དབང་ཡོད་དང་དབང་མེད་ཅི་རིགས་ལ་ཆགས་སྤྱོད་རྩོམ་པ་ཡང་རྨིས། དེ་ནི་ཡི་དྭགས་ཀྱི་རྒྱུ་ཤས་ཆེ་བས་ཕྱི་མར་ཡི་དྭགས་སུ་འགྲོ་གྲིབ་བྱེད་ཀྱི་ཡོད་པ་འདྲའོ། གསུམ་པ་གཏི་མུག་གི་རྨི་ལམ་མམ་བྱོལ་སོང་ལ་ཉེ་བའི་ལྟས་ནི། གཉིད་པའི་ཚེ་ལྟེ་བའི་རྩ་འཁོར་དུ་ས་བོན་༼སུ༽དང་རླུང་སེམས་འདུས་པས། མུན་པ་ཆེན་པོའི་ནང་དུ་འགྲིམས་ནས་རང་མགོ་འཁོར་བ་དང་། ལམ་ལོག་པ་དང་ལམ་ནོར་བ་ཆུ་ཕྲན་དང་རྒྱ་མཚོ་སྙོག་པ་རོལ་བ་ནད་ཀྱིས་ཟིན་པ་དང་། དུད་འགྲོ་ངོ་ཤེས་པ་དང་མི་ཤེས་པ་སྣ་ཚོགས་བཀོལ་སྤྱོད་བྱེད་ཀྱིན་ཡོད་པ་རྨིས། དེ་ལ་བྱོལ་སོང་གི་བག་ཆགས་ཤས་ཆེ་བ་ཡིན། བཞི་པ་ཕྲག་དོག་གི་རྨི་ལམ་ནི་སྙིང་ཁར་མི་ཡི་ས་བོན་༼རྣི༽དང་རླུང་སེམས་འདུས་པས་ཕ་ཡུལ་ལེགས་ཉེས་ཁྱིམ་ཚང་ཕྱུག་མིན། ས་རྡེབ་རི་ཉིལ་དང་རི་བྲག་དོང་གཡང་དུ་ལྷུང་བ། ཕན་ཚུན་བྲེལ་འཚུབ་ངང་འགྲན་རྩོད་ངོ་བསྟོད་གཞན་སྨད་མི་ཁོམ་བའི་རྣམ་པ་སོགས་རྨིས། དེ་ལ་མི་ཡི་བག་ཆགས་ཚན་ཆེ་བར་སྣང་། ལྔ་པ་ང་རྒྱལ་གྱི་རྨི་ལམ་ནི་མགྲིན་པར་ས་བོན་༼ཐ༽དང་རླུང་སེམས་འདུས་པས་མི་འདུ་ཁྲོམ་ཚོགས་མང་པོས་གོ་མཚོན་སྣ་ཚོགས་ཀྱིས་སྲོག་གཅོད་གཏུབ་སོགས་བྱས་པས་ཁྲག་མཚོ་བསྐྱིལ་བ་དང་ཐོག་སེར་སོགས་དྲག་པོའི་ཆོ་འཕྲུལ་དུ་མ་རྨིས། དེ་ནི་ལྷ་མིན་ལ་སྐྱེ་བའི་རྒྱུ་ཆར་རྐྱེན་དང་འཕྲད་པ་སྙམ། དྲུག་པ་དུག་ལྔ་ཚང་ཡང་ཤས་ཆུང་བའི་རྨི་ལམ་ནི་སྤྱི་བོར་ས་བོན་༼ཨ༽དང་རླུང་སེམས་འདུས་པས། གླུ་གར་རོལ་རྩེད་དང་མེ་ལོང་ལྟ་བ། མེ་ཏོག་གི་ཕྲེང་བ་ཐོགས་པ་པི་ཝང་རྒྱུད་མངས་སྒྲ་སྙན་སོགས་གཡེང་བའི་ལས་ཅི་རིགས་ལ་མི་ཚེ་འཆོར་བ་རྨིས། དེ་ནི་ལྷར་སྐྱེ་བའི་བག་ཆགས་དབང་ཆེ་བ་རེད། དེ་རྣམས་ད་ལྟ་རང་གི་སྤྱོད་པ་དང་སྔོན་མའི་བག་ཆགས་དང་ལེན་ངེས་ཀྱི་རིགས་དྲུག་གི་སྐྱེ་ལུས་གསུམ་པོ་འདྲེས་མར་སྲོད་ཀྱི་རྨི་ལམ་དུ་འཆར་བ་ཡིན་པས་བརྟག་ཤེས་ན་སྐྱེ་ལུས་སྔོན་མ་དང་ད་ལྟ་ཕྱི་མ་གསུམ་ཕལ་ཆེར་ཚོད་དཔག་བྱེད་ཐུབ། ཇི་སྐད་དུ། སྔོན་མ་གར་སྐྱེས་ད་ལྟའི་ལུས་ལ་ལྟོས། ཕྱི་མར་གར་འགྲོ་ད་ལྟའི་སེམས་ལ་ཡོད། ཅེས་པ་ལྟ་བུ་རེད། ཡང་རྨི་ལམ་དེ་ལྟ་བུ་འཆར་བ་ལུང་གིས་གྲུབ་པ་ཡིན་ཏེ། མ་རྒྱུད་ལམ་མངོན་སངས་རྒྱས་པའི་རྒྱུད་ལས། ཐོག་མེད་སྔ་མའི་ལས་ཀྱིས་དབང་བྱས་པས། དེ་ཡི་བག་ཆགས་ཀུན་གཞིའི་ས་བོན་ལས། རྩ་ལྔ་གསས་ཁང་རིགས་དྲུག་ས་བོན་དུ། རླུང་སེམས་ཞུགས་པས་དུག་ལྔ་ཆ་ཚང་བརྟས། དམྱལ་བམེ་འོབས་ཆུ་རླུང་གཡེང་ཁྱེར་བསད་བཅད་དང་། ཡི་དྭགསབཀྲེས་སྐོམ་ཆགས་སྲེད་འདོད་པས་གདུང་བས་ཁྱེར། བྱོལ་སོང་མུན་ཁུང་རྒྱ་མཚོ་དུད་འགྲོ་མི་གཙང་གནས། མིཡུལ་ངན་འཕྲང་དོག་གཡང་ས་སྣོད་དང་བཅུད། ལྷ་མིནདམག་ཚོགས་གོ་མཚོན་འཐབ་འཁྲུགས་ཐོག་སེར་འབེབས། ལྷགླུ་གར་རོལ་མོ་རྒྱན་འདོགས་ལོངས་སྤྱོད་ཉབ། སྔ་མའི་བག་ཆགས་གཏིང་འཐས་ཤས་ཆེ་རྨི། ཞེས་རིགས་དྲུག་ཏུ་སྐྱེ་བ་ལེན་ཚུལ་སྔ་ལྟས་རྣམས་རིམ་པར་ཤར་བ་བསྟན་པ་མངོན། འདིའི་གོང་གི་མཆན་ཡིག་རྣམས་རང་མོས་ཡིན། གཉིས་པ་རྨི་བ་ལམ་ཁྱེར་ནི། དེ་ཉིད་ལས། དཔའ་བོ་སེང་གེའི་ཉལ་སྟངས་མ་ཤེས་ན། ཐ་མལ་དུག་གསུམ་ཉལ་བ་བདུད་ལས་ཡིན། ཞེས་དང་། གསོལ་བ་རྨི་ལམ་ཟིན་པ་མ་བཏབ་ན། ཕྱོགས་འཁྱམས་ལས་བྱས་དོན་ལ་སྐུར་འདེབས་ཡིན། ཞེས་གསུངས་པ་ལྟར་རྨི་བ་ལམ་ཁྱེར་གྱི་གཞི་ངེས་འབྱུང་བརྟན་པོའི་ཐོག་དགོངས་སྤྱོད་རྣམ་བླ་མའི་དགོངས་སྤྱོད་ཡི་དམ་གྱི་དགོངས་སྤྱོད་མཁའ་འགྲོའི་དགོངས་སྤྱོད་གསུམ་ལ་བསླབ་པ་དང་འདིར་སྣང་གི་རྟེན་གཡོ་ཀུན་སྒྱུ་མ་ལྟ་བུ་ཞིག་མ་སོང་བར་དུ་བསྒོམ་པ་དང་ཕྱི་ནང་གི་བློ་ལྡོག་རྣམ་བཞི་ལ་བྱང་ཆུབ་པ་ཡོང་བ་གལ་ཆེ་སྙམ། སྒྱུ་མ་ལྟ་བུ་དེ་ཡང་རྨི་ལམ་གྱི་ལོངས་སྤྱོད་དེ་ཉིད་རྒྱ་ག་ཚད་ཆེ་ཡང་སྣང་ལ་དངོས་པོ་མེད་པ་དཔེར་ན། དབུལ་པོའི་རྨི་ལམ་དུ་གསེར་ལུག་མགོ་ཞིག་རྙེད་ཀྱང་སད་དུས་ཁབ་རྩེ་ཙམ་ལྷགས་ལུས་མེད་པ་ལྟར། འཇིག་རྟེན་འདིར་ཕལ་པ་བསླུ་བའི་བཙན་ཕྱུག་སྙན་གྲགས་རིགས་རྒྱུད་འཁོར་འབངས་ཡོད་དོ་ཅོག་ཐམས་ཅད་དེ་བཞིན་དུ་རྟག་བརྟན་མེད་པ་ཤེས་སུ་བཅུག དེ་ནས་རྨི་ལམ་དུ་འཇིགས་སུ་རུང་བ་རྨིས་ཀྱང་འཇིགས་མི་ཐུབ། ཡིད་དུ་འོང་བ་ཆགས་ཡུལ་རྨིས་ཀྱང་ཆགས་སེམས་མི་སྐྱེ། གད་རོང་གཡང་ས་རྨིས་ཀྱང་ལྷུང་དོག་མེད། ཡིད་དུ་མི་འོང་བ་སྡང་སྒྲ་གནོད་བགེགས་ཕ་བསད་ལག་མར་རྨིས་ཀྱང་ཁོན་འཛིན་མི་རྒྱུ། སྐྱེས་པ་རྨིས་ན་ཁྲོ་བོའི་རང་བཞིན་དང་སྐྱེས་དམན་རྨིས་ན་ཁྲོ་མོའི་རང་བཞིན་སོགས་སྤྲུལ་བསྒྱུར་ནུས་པ་ཡོང་སྲིད་པ་ཡིན་ཏེ། དེ་ཉིད་ལས། སྒྱུ་མ་རྨི་ལམ་འབྱོང་བའི་འབྱུང་བ་ཡིན། གོམས་པའི་སྟོབས་ཀྱིས་རྒན་མོས་གླང་པོ་ཁྱག བསྒོམ་པའི་སྟོབས་ཀྱིས་ས་ལ་ཆུ་བཞིན་འཛུལ། ཞེས་གསུང་པས་འདི་ལ་འབྱོང་བའི་སྐྱེ་བོ་དེ་རྨི་ལམ་གྱི་ཚོར་སྣང་ཕྲ་རགས་གང་གིས་ཀྱང་བསླུ་བྲིད་མི་ཐུབ་པ་དང་སུས་བསྒོམ་ན་གོམས་རྒྱུ་ཡོད་པ་བསྟན་འདུག དེ་ལྟ་བུ་རྨི་ལམ་ངང་ནས་ཉམས་སུ་ལེན་ཐུབ་པ་དེའི་ངང་ནས་གང་བྱུང་ཡང་རྨི་ལམ་དུ་ཤེས་པའི་གདེངས་ཐོབ་པ་ཞིག་ལ་རྨི་བ་ལམ་ཁྱེར་ཡོད། གསུམ་པ་རྨི་བ་ལམ་ཁྱེར་གྱི་འབྲས་བུ་ནི། ཚེ་འདིར་སྟག་གཟིག་སྦྲང་སྦྲུལ་མེ་ཆུས་འཇིགས་པ་མེད་ཅིང་། རྟག་གཟིགས་ལ་སོགས་ལྷ་ཡུལ་དུ་ཕེབས་ནས་བོན་གསུང་ནུས་པ་སོགས་གང་འདོད་བྲན་དུ་བཀོལ་ཐུབ་པ་ཡིན་ཏེ། དེ་ཉིད་ལས། སྟག་གཟིག་ཡུལ་བགྲོད་སྟག་ལ་ཞོན་པ་དང་། མེ་ཆུས་མི་འཇིགས་སྤྲུལ་བསྒྱུར་བྱེད་པ་དང་། ཞེས་གསུངས་སོ། ཕྱི་མར་བར་དོ་གསུམ་ལ་རིམ་པ་བཞིན་དང་པོ་གཞི་ཡི་བར་དོའི་སྐབས་སུ་བོན་སྐུར་ལན་ཀ་ཡོད་པས་དབང་རབ་དེ་ནས་གྲོལ། གཉིས་པ་བོན་ཉིད་འོད་གསལ་གྱི་བར་དོའི་སྐབས་སུ་འཁྲུལ་སྣང་ལ་སྒྲ་འོད་ཟེར་གསུམ་ལས་འཕྲོས་པའི་འོད་ལྔ་ཟེར་དྲུག་སོགས་ལ་དམར་པོ་ལ་མེ་སྔོ་པོ་ལ་ཆུ་རུ་བཟུང་ནས་ལྷན་སྐྱེས་དང་ཀུན་བརྟགས་ཀྱི་མ་རིག་པའི་དབང་གིས་འཁྲུལ་བ་ཡིན་ཡང་འདིར་གོམས་པའི་སྐྱེས་བུ་ལ་ཅི་ཤར་ཡང་བསླུ་མི་ཐུབ། སྒྲ་རིག་པའི་རང་སྒྲ་འོད་རིག་པའི་རང་འོད་ཟེར་རིག་པའི་རང་ཟེར་དུ་ངོ་ཤེས་པར་འབྱུང་ཞིང་གཞི་ལ་མ་བུ་ངོ་འཕྲོད་ནས་རང་གྲོལ་བདེ་ཆེན་གྱི་ས་ལ་སླེབས་ངེས་པ་ཁོ་ནའོ། ཡང་ཕ་རོལ་སྲིད་པའི་བར་དོའི་སྐབས་སུ་སྐྱེ་སྲིད་ཀྱི་སྣང་བ་ལ་ཕྱི་མར་ཕོ་རུ་སྐྱེ་ན་འདིར་ཕ་ལ་ཆགས་ཞེན་ཆེ་བ་དང་ཕྱི་མར་མོ་རུ་སྐྱེ་ན་འདིར་མ་ལ་ཆགས་ཞེན་ཆེ་བ་སོགས་འཆི་ཁའི་གསོས་འདེབས་ལུགས་མི་འདྲ་བས་འཁྲུལ་བ་སྣ་ཚོགས་ཡོད་ཀྱང་། གོང་གི་སྐྱེ་བོ་དེ་ལྟར་མིན་པ་མངལ་སྐྱེ་དང་སྒོང་སྐྱེ་ནི་ལྷ་རིམ་བསྐྱེད་པས་སྦྱངས། དྲོད་རྫུས་ནི་གཅིག་ཆར་དུ་བསྐྱེད་པས་སྦྱངས་སྐྱེ་སྲིད་ཀྱི་རྣམ་འགྱུར་ཞི་ལྷ་བཞི་བཅུ་རྩ་ལྔ་དང་ཁྲོ་རྒྱལ་བརྒྱད་ཅུ་གྱ་དྲུག་གི་རྣམ་པ་རུ་ངོ་ཤེས་ནས་ལས་མཁན་དང་གཤིན་རྗེའི་སྣང་བ་ལ་འཇིགས་སྐྲག་བྱེད་དགོས་དོན་གང་ཡང་མེད་པར་འགྱུར། འདི་རྣམས་གོང་ནས། གོམས་པའི་སྟོབས་ཀྱིས་རྒན་མོས་གླང་པོ་ཁྱག ཅེས་པ་དང་འབྲེལ་བ་ཟབ་པར་སྣང་། རྨི་ལམ་ངོས་འཛིན་བྱེད་སྟངས་ཡོངས་གྲགས་ལ་གྱེན་ལ་འཛེགས་པ་དང་གོས་དཀར་གྱོན་པ་ལ་ལ་འགྲོ་བ་སོགས་བཟང་པོར་བརྩི། ཐུར་དུ་རྒྱུ་བ་མུན་རུག་པ་གཅེར་བུ་བུད་པ་ཤ་བཟའ་ཁྲག་འཐུང་བྱེད་པ་རྨིས་ན་རྡུག་པར་བརྟགས་སྲོལ་ཡོད། ཅེས་ཡེ་རྗེ་སྨོན་པའི་རྨི་ལམ་གྱི་ཤས་ཙམ་བརྗོད་པ་རེ་ཞིག་སྤྲོས་པ་ཆུང་ངུའི་དབང་དུ་ཚར་རོ།། །། ༢༠༡༡༝༦༝༢༧ཉིན་བྲིས།།
