དྲན་སེམས་ཀྱི་འཕྲོ་འདུ། ཁུ་བློ།

དྭངས་གཙང་རྫ་ཆུ་ཟིལ་མ་ལྷོག་ལྷོག་རྒྱང་ལ་བཞུར་བས་ན།

བདག་སེམས་ཡིད་ཀྱི་འཕྲོ་འདུ་མེ་ཏོག་ལས་ཀྱང་ལང་ཚོ་རྒྱས།

ཁྱེད་ལ་ལྟས་ནས་འཛུམ་མདངས་ཤིག་ཤིག་དལ་པོར་གནས་པས་ན།

ང་ཡི་ལང་ཚོ་སྤྲིན་པ་ལྟ་བུ་ནམ་ཡང་མཛེས་སྡུག་ལྡན།

                                       རབ་མཛེས་སྤྲིན་པ་དཀར་པོ་དལ་བུར་ལྷོ་ལ་བཞུད་པས་ན།

ཁེར་རྐྱང་ཟླ་བ་གཞོན་ནུས་གློ་བུར་ཁྱེད་ཉིད་ཡིད་ལ་དྲན།

                              ཤག་ཤག་ཟེར་གྱིན་ཆར་སྒྲས་གནམ་ས་བཀང་བས་ངང་ཚུལ་ལ།

                              ལ་དང་ལུང་པ་ཆེམ་ཆེམ་ཆུ་མོའི་གཡོག་ནས་ཁྲ་ཆེམ་མེར།

ཁུ་བྱུག་སྔོན་མོའི་གསུང་སྐད་ལྷང་ལྷང་རྣ་བར་ལྷུང་བས་ན།

བདག་ཡིད་མེ་ཏོག་སེར་ཆེན་འདབ་མ་ལྷབ་ལྷུབ་ཁྱེད་ལ་ངོམ།

ལྗང་མདོག་དབྱར་གྱི་དཔལ་ཡོན་མིག་གི་བདུད་རྩིར་གྱུར་པས་ན།

ཧ་ལོའི་མེ་ཏོག་བཏུ་ནས་ཁྱེད་ལ་དད་པའི་མཆོད་རྫས་འབུལ།

                           ཨ་ཅེ་འབྲོག་མོའི་རྫི་གླུ་སྙན་མོ་རི་ནས་བླང་པས་ན།

                           གཡང་དཀར་ལུག་ཁྱུ་འབའ་སྒྲ་ཤིག་སེར་སྤང་རི་ངོས་ནས་འགྲིམ།

                         སྦྲ་ནག་གསེབ་ནས་སྔོ་བསང་དུ་བ་མཁའ་ལ་འཕྱུར་དུས་ན།

ཞོ་དང་འོ་མའི་བྲོ་བ་མངར་མོ་སྔར་ལས་དྲི་བསུང་འཐུལ།

                           ལྷ་འབྲུ་དཀར་མོས་ངུར་སྒྲ་སྒྲོགས་བཞིན་རྩ་ཐང་འགྲིམ་དུས་ན།

                           ལོ་ཟླའི་ཕྱི་མིག་དུང་བ་ཟབ་པས་མིག་ཆུ་དབང་མེད་ཤོར།

                          བེའུ་ཕྲུག་ཟུང་གི་མཆོང་རྒྱུགས་བྱེད་བཞིན་རྩེད་འཇོ་རོལ་བས་ན།

                         བདག་གི་སེམས་ལ་བྱིས་དུས་དྲན་པའི་གདུང་བ་སྔར་ལས་ཟབ།།

དཔྱིད་ཀ། ཁུ་བློ།

དེ་རིང་། འཇམ་ཐིང་ཐིང་གི་ཡུལ་ལྗོངས། དགའ་ལྷང་ལྷང་གི་ཚོར་བ། ངའི་གཅེས་པའི་དཔྱིད་ཀ རེ་སྒུག་ཁྲི་ཡི་འབོད་སྒྲའི་གསེང་ནས། དགའ་སྐྱོ་སྟོང་གི་ལང་ཚོ་ངོམ་གྱིན་སླེབས་བྱུང་། གཡང་དཀར་ལུ་གུའི་འབག་སྒྲ་སྒྲོགས་བཞིན། གསེར་ལྡན་སྒེག་མའི་མཛེས་སྡུག་རྫོགས་སའི་དེ་རིང་། སུམ་རྩེན་ལས་ལྷག་པའི་འཇིག་རྟེན་བསུ་གྱིན། སོ་ནམ་པ་ཡི་ཐོག་མའི་ལམ་བུ་གཏོད་ནས་སླེབས་བྱུང་། དཔྱིད་ཀ སྦྲང་ཆར་ཟེགས་མའི་བདུད་རྩི་རྩོལ་བཞིན། གཡུ་འབྲུག་སྔོན་མོའི་རྒོད་སྒྲ་འཛམ་སའི་དཔྱིད་ཀ འདི་ལྟར་ངའི་དགའ་སྤྲོ་འཕེལ་བའི་ཐོག་མའི་ཚོར་བ་གསར་པ། ད་དུང་སྤྲིན་དཀར་གྱི་འདབ་མ་ན་བུན་གྱི་གུར་ཁང་། དེ་ལྟར་ངའི་གཅེས་པའི་དཔྱིད་ཀ་སླེབས་བྱུང་།།