རིགས་སྨྲ་བ།

རྟགས་མང་སྨྲ་བའི་རིང་ལུགས་ཡོད་ལ།།

ཡ་མང་རིག་པའི་འཕྲུལ་འཁོར་མ་མཐོང་།།

 གསལ་མང་བཀོད་པའི་ལུགས་སྲོལ་དོད་ན།།

 ཤེར་མང་རྒོལ་བའི་རྒྱུ་མཚན་མ་དམིགས།།

 རིགས་ལམ་གསེང་ནས་ཚ་འཁོར་གྲངས་མང་།།

 སྐུལ་ཚིག་གཅིག་གིས་མཚམས་སྦྱོར་མི་ལྕོགས།།

 རིགས་ལམ་དྭངས་མའི་རྣམ་དཔྱོད་ལྡན་ན།།

 ལང་ཚོའི་བཞིན་རས་དམར་དགོས་མི་འདུག།

 རྒྱུ་མཚན་བདེན་པ་ཐོག་འདྲ་ཡོད་ན།།

 རྟགས་གསལ་གཞོག་འགྱུར་གཏོང་ཚོད་མ་རེད།།

ཕན་ཚུན་མཐུན་པའི་གུས་ཞབས་ཡོད་ལ།།

 ཚ་དང་འཁོར་གསུམ་ཕྲི་ན་མི་བསམ།།

 དོན་མཐུན་ལན་གྱིས་ལྡོག་པ་མ་གཏོགས།།

 ཚིག་ལྷགས་ཤིག་གིས་ལྷན་པོ་མི་རུང་།།

 ཤེས་རིག་གང་ལ་གྱང་གུད་མེད་པས།།

 ཚ་འཁོར་རེ་ལ་ངོ་གནོངས་མི་དགོས།།

རྟགས་དང་ཐལ་ངག་ཡང་དག་མ་གཏོགས།།

 ཚིག་འཁྱལ་ཞིག་གིས་སྒྲོ་འདོགས་མི་ཆོད།།

གཞུང་དོན་ཡིད་ལ་འཁོར་རྒྱུ་མེད་པ།།

 ཨུ་ཚུགས་ཁོ་ནས་དམ་བཅའ་མི་ཡོང་།།

 ལས་འབྲས་ཡིད་རྟོན་ཕེར་བ་མེད་ན།།

 ངོ་འཛུམ་འཇོན་ཡང་རང་རྒྱུད་མི་ཐུལ།།

 ཚད་ཐུབ་རིགས་པའི་འགྲོ་ལམ་མེད་ན།།

 ལུང་གཡར་མཁས་ཀྱང་གཞུང་དོན་མི་ཁྲོལ།།

 རྟགས་གསལ་སྲོག་རྩ་མཉམ་དུ་མི་ཆད།།

 ཁས་བླང་ཤོར་ན་རང་ཉིད་ལུས་འདུག།

 །རིགས་པའི་དཔའ་བོ་རིགས་ལམ་ཐང་དུ།།

རིགས་པའི་གོམ་ཁ་སྔར་ལས་ཡོང་ཤོག།

 འཆད་རྭའི་མུར་ཁ་ཤག་གི་ཚུལ་དུ། ༢༠༡༡་༩་༡༣ ་ཉིན་བྲིས།