༧ ལྷག་པར་དུ་ཞང་བོད་ལྗོངས་སུ་སྤྱི་ལོའི་ཡར་སྔོན་ནས་ལག་རྩལ་འབུར་དུ་ཐོན་པ། རིན་པོ་ཆེའི་རིགས་ལ་ཐོགས་ལྕགས་བཟོ་བ་དང་། མེ་རྡོ་ལ་གཟི་ཡི་རིགས་བཟོ་བའི་ལག་རྩལ་བཅས་ལ་དེང་དུས་འཛམ་གླིང་ཐོག་ཏུ་སྐད་གྲགས་ཆོད་བསྡད་པ་དེ་རེད། དེ་ལྟར་ན་ཞང་བོད་སྔར་མའི་མི་ལ་གསས་མཁར་དང་། ལྷ་སྐུ་ཡིག་གཟུགས་བཅས་བཟོ་ཤེས་མཁན་ཡོད་པ་ཟུར་བལྟས་ན་ལེབ་མཐོང་བའི་དཔེ་ལྟར་དུ་གྱུར།། གཞན་བསམ་ཡས་གཙུག་ལག་ཁང་གི་དཀར་ཆག་ནང་དུ་ཡང་བསམ་ཡས་ཐོག་མར་བཞེངས་སྐབས་ལྷ་བཟོ་ན་རེ། ལྷ་རྒྱ་གར་དང་རྒྱ་ཡི་གཟུགས་གང་བགྱི་ཞེས་གསུངས། དེར་འཚོགས་ཏེ་གྲོས་བགྱིས་པས། མཁན་པོས་སངས་རྒྱས་རྒྱ་གར་དུ་བྱོན་པ་ཡིན་པར་རྒྱ་གར་ལུགས་སུ་བགྱི་གསུངས། བཙན་པོའི་ཞལ་ནས། བོད་ཀྱི་ལུགས་སུ་བགྱིད་ན་བོད་ནག་པོ་ལ་ཞེན་པ་རྣམས་དད་པ་སྐྱེས་རེ་བ་ལགས་པས། ལྷ་བོད་ལུགས་སུ་བྱ་བ་ཅིས་ཀྱང་གནང་ཞེས་སློབ་དཔོན་ལ་ཞུས་པས། འོ་ན་བོད་འབངས་ཀུན་བསྡུས་ཤིག་བོད་ཀྱི་ལུགས་སུ་བྱའོ་གསུངས། དེ་བཞིན་བསམ་ཡས་གཙུག་ལག་ཁང་ནི་རྒྱ་དཀར་ནག་དང་བོད་པ་བཅས་ཀྱི་ལེགས་ཆ་ཀུན་བསྡུས་ནས་ཞེས་པ་གསུངས་པ་ལྟར་ན་བོད་ལ་སྔར་ལུགས་ཀྱི་གསས་ཁང་དང་ལྷ་སྐུ་བཞེངས་པའི་ལག་རྩལ་གྱི་རིག་གནས་ཡོད་པ་ཤུགས་ལ་གོ་ཐུབ་ངེས་རེད།། ༧མ་ཚད་དེང་དུས་མངའ་རིས་དང་། ནག་ཆུ། ཆབ་མདོ་རྒྱུད་ཀྱི་ས་ཆ་མང་པོ་ཞིག་ལ་ཆེས་སྔ་མའི་ཁང་པ་ཞིག་རོ་ནང་ནས་ལྷ་ཡི་ཞལ་འབག་དང་གྱང་རིས་རྙིང་པ་རྡོ་རྐོས་རི་མོ་ཐོན་པ་སོགས་དང་། བོན་ལུགས་ཀྱི་ཡིག་རྙིང་བཅས་ལ་བརྟག་ན་བོད་སྔར་མར་བཟོ་རྩལ་པ་ཡོད་པ་མཐོང་ཐུབ། ལྷག་པར་དུ་དབྱི་ལངས་ཀྱི་ཁང་ཤུལ་གྱི་ལོ་རྒྱུས་ལྟར་ན། ཞང་བོད་ཀྱི་ཡུལ་འདིར་ཆེས་སྔར་མོ་ལོ་ལྔ་སྟོང་གོང་ནས་ཁང་པ་བཞེངས་པའི་ལམ་སྲོལ་ཡོད་པའི་རྒྱབ་རྟེན་དུ་སོང་བ་དེང་འདུས་མཁས་པ་མང་པོའི་གླེང་མོལ་གནང་བཞིན་ཡོད།། ཕྱིས་ཁྲི་སྲོང་མན་ཆོད་བོད་སིལ་བུར་འཐོར་རྗེས་བོད་སྤྱི་ལ་ཕྱོགས་ཞན་གྱི་ཆབ་སྲིད་ཀྱིས་ལོ་རྒྱུས་དང་ཆོས་ལུགས་དབང་བསྒྱུར་བྱས་པས། བོད་ཀྱི་ལོ་རྒྱུས་ཡང་དག་པ་ཞིག་བཤད་དཀའ་བར་གྱུར་ཡོད། དེ་དང་མཐུན་པའི་དེང་དུས་བཟོ་རིག་ལག་རྩལ་པ་རྣམས་ནས་བོད་ཀྱི་བཟོ་རིག་གི་ལོ་རྒྱུས་བཤད་པའི་ཚེ་ན། སྤྲུལ་སྐུ་བྱིའུ་སྒང་པ་ནས་བརྒྱུད་པའི་མཁྱེན་བརྩེའི་ལུགས་དང་། སྨན་རྙིང་ལུགས། ཀརྨ་སྒར་བྲིས་བཅས་ནས་ལོ་རྒྱུས་འགོ་བཙུགས་བསྡད་པ་ཞིག་ལས། བོད་སྔ་མའི་བཟོ་རིག་ལག་ཤེས་བག་ལ་ཞ་བཞིན་པ་འདི་རེད། ངེས་པར་བརྟག་ན་ལྷ་བཟོ་ཁོང་རྣམ་པས་རྒྱ་དཀར་ནག་བོད་བཅས་ཀྱི་རི་མོའི་ལེགས་ཆ་བསྡུ་རུབ་བྱས་ནས་རི་མོ་མཁས་ཅན་ཆགས་པ་ལས། སྔར་རབས་བོད་ཀྱི་རི་མོ་ལ་གཞི་བཟུང་ས་གང་ཡང་མེད་པར་རང་གི་ལག་པ་ཁོ་ནའི་སྟོབས་ཀྱིས་སྐད་གྲགས་ལྡན་པའི་རི་མོ་བ་ཆགས་མེད་པ་ཞིག་རེད་ལ། ཁོང་རྣམ་པ་བོད་ཀྱི་རི་མོ་བ་ཞིག་ཡིན་ཕྱིས་རང་གི་ཕ་མྱེས་ཀྱི་ལག་རྩལ་རྡོག་པས་བརྫི་མཁན་ཡིན་དཀའ་ཡང་།། ༧ཕྱིས་སུ་བོད་མི་རྣམས་ལ་བོད་སྔར་མའི་ལག་རྩལ་ལ་སྣང་མེད་དུ་བཏང་བ་རང་བཞིན་གྱི་གོམས་སྲོལ་ཞིག་ཆགས་པ་དཔེར་ན། ཁྱུང་པོ་སྟེང་ཆེན་ལྟ་བུ་ལ་མཚོན་ན། ལྷ་བྲིས་ལག་རྩལ་པ་ལྡོང་མདོ་དང་། རག་ལ། ཡིག་བྲིས་པ། ག་ཟི། ཁྲ་རིས། སྟ་བྲིས། མ་ནི་སོགས་གཅིག་བས་གཅིག་ལེགས་པ་ཡོད་ཀྱང་། ལག་རྩལ་པ་ཁོང་རྣམ་པས་ལོ་རྒྱུས་བཤད་ཚེ། སྤྱི་ཚོགས་ཐོག་གནས་སྐབས་སྐད་གྲགས་གང་ཆེ་བ་དེ་ལ་ཁུངས་གཏུགས་འདུག་རྒྱུ་ལས་དོན་དངོས་ཀྱི་ལོ་རྒྱུས་གླེང་རྒྱུ་ཉུང་ཉུང་རེད། ལྷག་པར་བོད་ལྗོངས་དང་མཚོ་སྔོན་གྱི་གསར་འགོད་པ་རྣམས་ནས་བོད་ཀྱི་རིག་གནས་གླེང་ཚེ་ཁྲི་སྲོང་མན་ཆད་ཀྱི་ལོ་རྒྱུས་མ་བཤད་ན། ཁོང་རྣམ་པ་ཐུགས་ལ་མ་བབ་པའི་རྣམ་འགྱུར་བྱུང་བཞིན་པ་འདི་ལ་ངེས་པར་བརྟག་ན་ཆོས་སྲིད་ཟུང་འབྲེལ་དང་བཀས་བཀོད་རྒྱུད་འཛིན་གྱི་ལམ་ལུགས་སེལ་མ་ཐུབ་པས་སྐྱོན་གྱིས་རེད་འདུག །དེ་ལྟར་ན་བོད་འདིར་སྔར་ནས་བརྒྱུད་པའི་བན་བོན་གྱི་ལོ་རྒྱུས་ཆེན་པོ་གཉིས་ཡོངས་སུ་གྲགས་པ་དེ་ཕྱོགས་གཅིག་ཏུ་སོང་ནས། ཞང་བོད་ཀྱི་ལོ་རྒྱུས་ཁྱོན་ཡོངས་ནས་སྲུང་སྐྱོབས་མ་ཐུབ་པ་མ་ཟད་བོད་ཀྱི་ལ་རྒྱ་དང་མི་རིགས་ཀྱི་དགོས་མཁོ་ཡང་ཡོངས་སུ་སྐོང་མ་ཐུབ་ཞིག་ཆགས་སྲིད་ངེས་རེད།། གོང་གི་ཁྱུང་ཡུལ་གྱི་ལག་རྩལ་དེ་རྣམས་ཞིབ་བལྟས་བྱས་ན་ཁྱུང་ཡུལ་མཐིལ་དུ་༡༣༡༩ལོར་མཚན་དཔེ་བཞད་པའི་སྤྲུལ་སྐུ་བློ་ལྡན་སྙིང་པོ་དེ་ཉིད་ལ་མདོ་དྲི་མེད་གཟི་བརྗིད་སྙན་རྒྱུད་བབ་པ་ལ་བརྟེན། སྔར་བོད་ལུགས་ཀྱི་ཡིག་བྲིས་དང་ལྷ་བྲིས་ཀྱི་རྨང་གཞི་ཐོག་ཁོང་གིས་ཁྱུང་པོ་ལྷ་བྲིས་དང་ཡིག་བྲིས་གསར་གཏོད་ཀྱི་མཛད་རྗེས་བཞག་པས་དེང་དུས་ལྡོང་མདོ་ལྷ་བཟོ་དང་། རག་ལ་ལྷ་བཟོ། ཡིག་བྲིས་པ། མ་ནི། ཁྲ་རིས། སྟ་བྲིས། ག་ཟི་སོགས་ལྷ་བྲིས་དང་ཡིག་གཟུགས་འབྲི་སྟངས་དེ་རྣམས་བྱུང་བ་བློ་ལྡན་གྱི་རྣམ་ཐར་ལས་གསལ་ལ། ཁྱུང་པོའི་ཁ་དཔེ་ལ་ཡང་སྤྲུལ་སྐུ་བློ་ལྡན་གྱི་ལྷ་པིར་ཁྱུང་གཉིས་ལ་མར་ནང་ལ་འཐོར་བས་མར་ནང་ལྷ་བཟོ་མང་བ་དང་ཡིག་པིར་ལ་ཡར་ནང་ལ་འཐོར་བས་ཡར་ནང་ཡིག་བྲིས་མང་བར་་བཤད་པ་དེ་རེད། དེས་ན་གཡམ་རྒྱུག་ལ་མ་བརྩོན་པར་དོན་དངོས་དང་མཐུན་པར་བྱས་ན། ཁྱུང་པོའི་ལྷ་བྲིས་དང་ཡིག་བྲིས་ཀྱི་ཕུགས་སྤྲུལ་སྐུ་བློ་ལྡན་ནས་ཡར་དེད་ན་ལེགས། དེ་བཞིན་ང་ཚོ་བོད་ཀྱི་ཡུལ་དུ་དར་བའི་བོད་མི་རིགས་ཀྱི་ལག་རྩལ་གཞན་རྗེས་ཁོ་ན་ལ་མི་འབྲེང་བར་བོད་ཀྱི་བཟོ་རིག་གི་རྨང་གཞིའི་ཐོག་རྒྱ་དཀར་ནག་གི་བཟོ་རིག་བསྣན་ཁ་རྒྱབ་ནས་དེང་དུས་བོད་ཀྱི་ལྷ་བྲིས་བཟོ་རྩལ་གྱི་རིག་པ་འཛམ་གླིང་ཐོག་གླེང་མོལ་བྱས་ན་དོན་དངོས་དང་འགལ་བ་མེད་པར་སེམས་སོ།། །།
