ཀ་བསྟོད་ཀུ་མུད་འཛུམ་མདངས།།
ཀ་དག་ཀུན་བཟང་དགོངས་པ་རབ་བརྙེས་ཤིང་།།
ཁ་བ་ཅན་ན་བསྟན་པའི་སྒྲོན་མེ་གང་།།
ག་ན་དངོས་གྲུབ་གཏེར་མཛོད་རིག་འཛིན་མཆོག།
ང་དང་ལྷ་མིའི་སྐྱབས་ཅིག་ཚུལ་ཁྲིམས་དཔལ།།
ཅ་ཀ་ངན་ངོན་ཙམ་གྱིས་ཆོག་ཤེས་ནས།།
ཆ་ལུགས་ངེས་མེད་རྣལ་འབྱོར་རི་ཁྲོད་པའི།།
ཇ་གུང་ཐུན་བཞིའི་སྤྱོད་པ་མ་འཇིག་པར།།
ཉྭ་ཟུང་ཞི་བདེའི་ཕྱོགས་ལ་བག་ཡོད་བྱས།།
ཏ་ཐཱ་ག་ཏའི་ལེགས་བཤད་གངས་རིའི་སྤོར།།
ཐ་སྙད་གཙང་མའི་དབྱར་སྐྱེས་རྔ་གསང་སྒྲོག།
ད་ལྟ་རྩོད་ལྡན་འཛམ་གླིང་གངས་ལྗོངས་སུ།།
ན་རག་སྒོ་གཅོད་ཁམས་བརྒྱད་ཊི་ཀ་བཏབ།།
པ་ཝ་སངས་ལྟར་དཀར་བའི་ལྷག་བསམ་གྱིས།།
ཕ་རོལ་ཕྱིན་བཅུའི་འཁོར་ལོ་རབ་བསྐོར་ནས།།
བ་བོང་ལ་སོགས་སྔོན་ལས་འཕྲོ་མཐུན་འགའ།།
མ་ལུས་དགྱེས་བརྩེའི་དྲྭ་གུར་དབུས་སུ་བཅུག།
ཙ་རིར་སྐོར་བརྒྱ་བྱེད་པའི་སྐྱ་སེར་གྱི།།
ཚ་གྲངས་ངལ་བའི་དགེ་སྦྱོར་ཙམ་མིན་པ།།
ཛྰ་ཡའི་དགོངས་དོན་འཁོར་ལོ་རྣམ་གསུམ་སྟེ།།
ཝ་ལེར་སྲིད་ཞིའི་འགྲོ་ལ་རིས་མེད་བསྐོར།།
ཞྭ་དཀར་བསྟན་པའི་བདག་ཉིད་འགྲོ་བའི་མགོན།།
ཟ་ཟི་གཡེང་བའི་ཉེས་སྐྱོན་མ་ལུས་ཟད།།
འ་ཅག་མགོན་དུ་བཞུགས་པའི་བྱིན་རླབས་ཅན།།
ཡ་ཀི་རྒྱལ་བའི་དཀྱིལ་འཁོར་ཁྱེད་མིན་སུ།།
ར་མེད་མགོ་བོ་རིལ་བའི་ཐ་ཤལ་རང་།།
ལ་ལུང་ཡུལ་གྲུ་གང་མང་བརྒྱུད་ན་ཡང་།།
ཤ་ཚ་འགྲོ་ལ་བྱམས་པའི་བརྩེ་བ་དང་།།
ས་ལམ་ཉམས་རྟོགས་ཡོན་ཏན་ལྟོ་འགྲོའི་སྤུ།།
ཧ་ཧ་རེ་ཞིག་ཀུ་རེའི་ངང་ཚུལ་ཅན།།
ཧ་ཅང་གོམ་འདྲིས་ཆེ་བའི་གྲོགས་དང་ལྷན།།
ཨ་སྐྱོ་ཙམ་མིན་བཟང་པོ་རིར་འབྱོར་ཉིན།།
ཨ་ཧོ་གང་ཉིད་དྲན་བཞིན་ཐོལ་བྱུང་བྲིས།།
གཏེར་ཆུ་ལུ་མའི་ནང་དུ་བཀོད་ཡོད། ༢༠༠༧་ ༥་༡༣ ཉིན་བྲིས།།
