སྙན་ངག་རེད།
འཕན་བུ།
སེམས་ཀྱི་དུངས་པ་བརྗོད་ན་སྙན་ངག་རེད། །
ཡུལ་གྱི་མཛེས་པ་བརྗོད་ན་སྙན་ངག་རེད། །
བརྗོད་བྱ་རྗོད་བྱེད་གང་ལ་ཚད་མེད་པ། །
སྙན་ངག་བཟང་བོ་ཞིག་གི་བྲང་ཁོག་རེད། །
གསར་བུའི་སྙིང་སྟོབས་བྲིས་ན་སྙན་ངག་རེད། །
གསར་མོའི་ལང་ཚོ་བྲིས་ན་སྙན་ངག་རེད། །
མངོན་ལྐོག་ཕྱི་ནང་གསལ་བའི་དམར་རྗེན་གཏམ། །
སྙན་ངག་རྩེ་གྲ་ཞིག་གི་སྤྱི་འགྲོས་རེད། །
དགའ་དུས་རྩེ་འཇོའི་གཏམ་དེ་སྙན་ངག་རེད། །
སྡུག་དུས་སྨྲེ་སྔགས་འདོན་པ་སྙན་ངག་རེད། །
སེམས་ཚོར་གསོན་པོར་འཁྱོལ་བའི་སྐད་ཆ་གང་། །
སྙན་ངག་ལྷད་མེད་ཅིག་གི་རང་གཤིས་རེད། །
བཙན་གྱིས་བཙུར་ན་མི་བཞུར་སྙན་ངག་རེད། །
དཔུང་གིས་བཀག་ན་མི་ཁོགས་སྙན་ངག་རེད། །
རང་འགྲོས་དལ་གྱིས་འབབ་པའི་ལྷོག་ལྷོག་ངག །
སྙན་ངག་ཡག་པོ་ཞིག་གི་རང་ཚུགས་རེད། །
རྒྱལ་པོའི་རྒྱལ་སྲིད་འཛུགས་ལུགས་སྙན་ངག་རེད། །
སྤྲང་པོའི་སློང་མོ་བསླངས་ལུགས་སྙན་ངག་རེད། །
འདྲ་མིན་མི་ཡི་འཚོ་ཚིས་མཐའ་དག་ཀྱང་། །
སྙན་ངག་ངོ་མ་ཞིག་གི་དཔེ་དོན་རེད། །
ལྐོག་འགྱུར་ལྷ་སྒྲུང་རིང་མོ་སྙན་ངག་རེད། །
མངོན་སུམ་མི་དོན་དམར་པོ་སྙན་ངག་རེད། །
བདེན་རྫུན་གཏམ་གྱི་གླེབས་བམ་མོད་པོ་ཡང་། །
སྙན་ངག་ལེབ་ལེབ་ཞིག་གི་ནང་སྙིང་རེད། །
ཁྱོད་ཀྱི་འཚོ་བའི་ཡོ་བྱད་སྙན་ངག་རེད། །
ང་ཡི་མི་ཚེའི་ཤུལ་ལམ་སྙན་ངག་རེད། །
རྟག་དངོས་ཆ་ལ་གཏོགས་པའི་ཤེས་བྱ་གང་། །
སྙན་ངག་སྒོར་སྒོར་ཞིག་གི་ཕྱི་ནང་རེད། །
༢༠༡༤/ ༣/༢༨
