ལྷད་མེད་ཀྱི་རང་གཤིས།
གནམ་ཟླ་འདི་དྲོ་དུས་འཁྱག་དུས། །
བསམ་པ་འདི་སྐྱིད་དུས་སྡུག་དུས། །
རེས་མོས་ཀྱི་རླུང་འཚུབ་ཁྲོད་ན། །
ཁོ་བོ་ནི་ཤོག་སྐྱ་ལེབ་མོ། །
ཉི་ཟླ་ལ་འཆར་ནུབ་མངའ་ན། །
འཇིག་རྟེན་ན་རྟག་པ་གང་ཡོད། །
མི་རྟག་པའི་རང་གཤིས་རྟོགས་ན། །
ནང་སེམས་ཀྱི་དགའ་སྡུག་ལོས་རྟོགས། །
ལྷད་མེད་ཀྱི་རང་གཤིས་དེ་ལ། །
བཅོས་མ་ཡི་འཛུམ་མདངས་མི་དགོས། །
ཆགས་སྡང་གི་གར་སྟེགས་དག་ནས། །
བདེ་བ་ཡི་བདེན་པ་མ་རྙེད། །
འཇིག་རྟེན་འདི་བདེ་རུ་སྒོམ་ན། །
མི་ཡུལ་ན་སྡུག་བསྔལ་ཅི་ཡོད། །
དེ་ལྟར་དུ་རྟོགས་པ་དཀའ་བས། །
དུས་རྟག་ཏུ་སྡུག་བསྔལ་གྱིས་མནར། །
འཁོར་བ་ཡི་ཆོས་ཉིད་ཤེས་ནས། །
འདི་སྣང་ལ་ངེས་འབྱུང་སྐྱེས་ན། །
ལམ་ཁ་དེ་ཤིན་ཏུ་བཟང་མོད། །
ཁོ་བོ་ནི་དེ་ལྟ་མིན་ནོ། །
གཉུག་མ་ལ་འགྱུར་བ་མེད་རུང་། །
དུག་གསུམ་གྱི་རྫོང་དེ་མཐུག་པས། །
སྡིག་པ་འདི་མ་དག་བར་དུ། །
སྡུག་བསྔལ་ལ་ཟད་མཐའ་མི་འདུག །
ལྷད་མེད་ཀྱི་རང་གཤིས་གཙང་མ། །
འདི་ཕྱི་ཡི་དོན་གྱི་སྙིང་བོ། །
དེ་ཉིད་ནི་སུ་མཆིས་ན། །
གང་དེ་ནི་མི་བུ་རྣལ་མ། །
༢༠༡༤ ༣ ༢༣
