༧ མདའ་ཆེན་དཀར་མོ་རི་ཁྲོད།
དབྱངས་ཅན་བཞད་པའི་སྒྲ་དབྱངས
བོན་བརྒྱ་རིན་པོ་ཆེ།
ཨེ་མ་མཁས་མཆོག་སྐྱང་བསྟན་ཝང་གི་དྲན།། དབྱངས་ཅན་བཞད་པའི་ལང་ཚོ་དྲན་ཙམ་ན།།
ལྷ་སྔགས་རིམ་གཉིས་ཟབ་མོ་མཐར་ཕྱིན་ཅིང་།།
རྗེ་བཙུན་ཡོངས་འཛིན་སྒོམ་པས་འོད་གསལ་ཤར།།
༧སྐྱབས་ཀྱི་ཀུན་མཁྱེན་ཀུན་མཁས་སྒྲུབ་བསྔགས་གཅེས།།
མཆོག་རྗེ་སྙིང་སྟོབས་ཐུགས་དག་རྣམ་དཔྱོད་ཕུལ།།
འཕྲུལ་དབྱིངས་བོན་སྨྲ་གཙང་མཚར་མཛེས་ཝལ་བཞིན།།
ཟེར་འོད་ཡོངས་རབ་ལེགས་ཤེས་གསལ་ཧྰུཾ་ཨྰ༔
ཚིག་བར་སོ་དྲུག་གི་ནང་དུ་གསལ་བྱེད་སུམ་ཅུ་ཚང་བ་ནི་བྱ་དཀའ་བའི་གནས་མ་ཡིན་ཀྱང་
ཀ་ཁ་རིམ་པར་བསྒྲིགས་པ་དང་ལུགས་འབྱུང་ལྡོག་གཉིས་ཀར་འགྲེལ་བའི་བརྗོད་བྱ་ལེག་ན་བྱ་དཀའ་བའི་རྒྱན་དུ་ངེས་ཞེས་བོན་བརྒྱ་བས་སོ།
༧དབྱངས་ཅན་མགྲིན་པར་རོལ་བའི་རྩེ་དགའ་ཡིས།།
དབྱངས་ཀྱི་འཕྲུལ་འཁོར་བསྐྱོད་པའི་དབང་ཐོབ་པ།།
དབྱངས་ལྡན་དགྱེས་པའི་བློ་གྲོས་སྨྱུག་རྩེ་ལས།།
དབྱངས་གསལ་ཚང་བའི་ཚིགས་བཅད་འདི་རྣམས་བྱུང་།།
༧ཚིག་སྦྱོར་ཙམ་མིན་དོན་གྱིས་ཕྱུག་པ་དང་།།
གསལ་བྱེད་མིང་གཞིར་ཚང་ན་བྱ་དཀའ་ཙམ།།
སྔོན་རྗེས་བགྲང་ན་བྱ་དཀའ་མ་ཡིན་ཞེས།།
བདག་གི་བླ་མ་སྨྲ་བའི་སེང་གེས་གསུངས།།
༧བློ་གསལ་ཀློག་ལ་སློབ་པ་ནས་བཟུང་སྟེ།།
བློ་ཆེན་གཞུང་ལུགས་དུ་མར་མཁས་པའི་བར།།
བློ་ཁ་མཐོ་དམན་དབྱངས་གསལ་སྦྱངས་ལ་རགས།།
བློ་གསལ་གཞོན་ནུས་དགའ་བའི་དང་དུ་ལོངས།།
༧བསླབ་པ་སྣ་གཅིག་བླངས་པ་ནས།།
བསོད་ནམས་ཚོགས་ཀྱི་དབུ་བརྙེས་ཤིང་།།
དབྱངས་གསལ་རེ་རེ་ཤེས་པ་ནས།།
ཡེ་ཤེས་ཚོགས་ཀྱི་རྨང་གཞི་བྱུང་།།
༧ཚོགས་གཉིས་རྒྱ་མཚོའི་འཕེལ་སྟོབས་ཀྱིས།།
རིག་པ་རྒྱ་མཚོ་ནོར་བུའི་མཛོད།།
རྒྱལ་སྲས་རྒྱ་མཚོའི་གྲལ་ལ་དབང་།།
ཀུན་མཁྱེན་རྒྱ་མཚོ་མཆོག་བརྙེས་ཤོག།
ཅེས་འདི་རྩོམ་པ་པོ་ནི་ ཡུལ་མདོ་སྨད་ཀྱི་མཁས་པ་ཆེན་པོ་ སྐྱང་སྤྲུལ་ལུང་རྟོགས་སྐལ་བཟང་རྒྱ་མཚོ་ཕྱོགས་ལས་
རྣམ་པར་རྒྱལ་བའི་སྡེ་གང་གི་ཞབས་པད་སྤྱི་བོའི་ཅོད་པན་དུ་ཐོབ་པའི་སྐལ་བ་ཅན་
བོན་བརྒྱ་དགེ་ལེགས་ལྷུན་གྲུབ་རྒྱ་མཚོའམ་
མིང་གཞན་ངག་དབང་དབྱངས་ལྡ་དགྱེས་པའི་བློ་གྲོས་སོ།
