'190'){this.resized=true;this.style.height=190+'px';}">

                            དཔེ་སྐྲུན་གསལ་བཤད།།

གཡུང་དྲུང་དཔེ་ཚོགས་ཞེས་པ་འདི་ནི་བོད་ཀྱི་ཤེས་རིག་གི་གྲུབ་ཆ་རྩ་ཆེན་ཡིན་པའི་གཡུང་དྲུང་བོན་གྱི་རིག་གཞུང་གཙོ་བོར་བསྟན་པའི་གངས་ཅན་བོད་ཀྱི་རིག་གཞུང་བརྩམས་ཆོས་དཔེ་རྙིང་དག་སྒྲིག་དང་དཔེ་སྐྲུན་བྱེད་པའི་དཔེ་ཚོགས་ཤིག་རེད། དཔེ་ཚོགས་འདིས་གཡུང་དྲུང་བོན་གྱི་དཔེ་རྙིང་དང་དཔེ་དཀོན་རིན་ཐང་ཅན་འཚོལ་བསྡུ་དང་ལེགས་སྒྲིག་ཞུས་ཏེ་པེ་ཅིན་མི་རིགས་དཔེ་སྐྲུན་ཁང་དང་མཉམ་ལས་ཀྱི་འབྲེལ་བ་གཙུགས་ནས་དཔེ་རྙིང་རྣམས་དེབ་གཟུགས་སུ་དཔར་སྐྲུན་འགྲེམས་སྤེལ་བྱེད་རྒྱུ་རེད། དམིགས་ཡུལ་ནི་བོད་ཀྱི་རིག་གནས་སྤྱི་དང་ལྷག་པར་དུ་གཡུང་དྲུང་བོན་གྱི་དམིགས་གསལ་གྱི་རིག་གཞུང་མི་ཉམས་གོང་དུ་སྤེལ་རྒྱུ་དང་ཉམས་པ་སོར་ཆུད་བྱེད་རྒྱུ་དེ་རེད། དེ་ཡང་མ་དཔེ་འཚོལ་བསྡུ་དང་དག་སྒྲིག་གི་བྱ་བ་རྣམས་བོད་ལྗོངས་སྤྱི་ཚོགས་ཚན་རིག་ཁང་གི་ཞིབ་འཇུག་པ་དོན་གྲུབ་ལྷ་རྒྱལ་དང་ནག་ཆུ་ས་ཁུལ་རིག་གནས་ཅུད་ཀྱི་ནོར་བུ་བཀྲ་ཤིས་དང་ཧོར་ཀླུ་ཕུག་དགོན་གྱི་དགེ་བཤེན་གཡུང་དྲུང་གཙུག་ཕུད་བཅས་རྣམ་པ་གསུམ་གྱིས་འགན་ཁུར་གནང་བཞིན་ཡོད།

དཔེ་ཚོགས་ཀྱི་ཞིབ་ཆའི་ནང་དོན་ནི་གཡུང་དྲུང་བོན་གྱི་ལོ་རྒྱུས་དང་རིག་གནས་སྤྱི་དང་དེ་བཞིན་ཕྱི་ནང་གསང་གསུམ་གྱི་གཞུང་ལུགས་བཅས་ཚུད་ཡོད།

དཔེ་ཚོགས་ལེགས་སྒྲིག་གྱི་རྩ་དོན་ནི་དཔེ་རྙིང་གི་མ་དཔེ་ལ་བརྩི་འཇོག་བྱས་ནས་དམིགས་བསལ་གྱི་ཡིག་ནོར་ཡིན་པ་ཕུད་བརྡ་རྙིང་དང་དེ་བཞིན་དོགས་གཅོད་ཁ་གསལ་བྱེད་མི་ཐུབ་པའི་རིགས་ཚང་མ་མ་དཔེ་ཇི་བཞིན་སོར་བཞག་ཐོག་དེའི་མཇུག་ཏུ་གུག་རྟགས་ནང་དུ་འོས་འཚམས་ཀྱི་དཔྱད་གཞི་འགོད་རྒྱུ་ལས་ཧོལ་རྒྱུག་དང་རང་འདོད་ཀྱིས་མ་དཔེ་དག་སྒྲིག་མི་བྱེད་རྒྱུ་བཅས་རེད། དཔེ་ཚོགས་དཔེ་སྒྲིག་ཚོགས་པའི་བྱང་ཚད་དམན་པ་དང་ཉམས་མྱོང་ཕུན་སུམ་ཚོགས་པོ་མེད་པའི་རྐྱེན་གྱིས་དཔེ་ཚོགས་ཀྱི་སྤུས་ཚད་རྒྱ་ཆེའི་ཀློག་པ་པོའི་ཐུགས་རེ་དང་འཚམས་པོ་མེད་པའི་གནད་དོན་ལྷག་ངེས་ཡིན་པས་དེའི་ཐད་ལ་ལྷག་བསམ་དག་པའི་ལེགས་བཅོས་ཀྱི་དགོངས་འཆར་གང་ཡོད་ལྷུག་སྩོལ་ཡོད་པ་མཁྱེན་མཁྱེན།                   ཅེས་གཡུང་དྲུང་དཔེ་ཚོགས་དཔེ་སྒྲིག་ཚོགས་པ་ནས།