༧  དཀའ་བའི་ལས་ཞིག

གངས་རི་ར་བའི་སྐོར་ཞིང་།།བསིལ་ལྡན་ཁ་བའི་ལྗོངས་སུ།།

མི་ཚེའི་ངུ་སྐད་ཐོག་མ།།ནོར་ལུག་འབའ་སྒྲའི་ལྷན་དུ།།

སྐྱེ་སྔོན་བསགས་བས་རྒྱུ་ལ།།འཆི་ཁའི་གསོས་བཏབ་རྐྱེན་གྱིས།།

རྐང་གཉིས་ལང་ཚོའི་འདབ་མ།།འཛིན་མའི་ཁྱོན་དུ་བཞད་ཡོད།།

སྐྱེ་དཀའ་གླིང་བཞིའི་ནང་ཚན།།ལྷོ་རྒྱལ་འཛམ་གླིང་སོར་ཀར།།

ལུས་རྟེན་ད་རེད་རྙེད་པ།།གདོད་མའི་ལེགས་བྱས་ཡིན་སྙམས།།

ཐོབ་དཀའ་རིན་ཆེན་ནོར་ལས།།དལ་འབྱོར་བཅོ་བརྒྱད་མི་ལུས།།

ཉིན་མོའི་སྐར་བཞིན་དཀོན་པ།།ཤར་བ་ད་ཐེངས་ལན་གཅིག།

ཕྲད་དཀའ་བསྟན་པའི་རྒྱན་གཅིག།འཕྲུལ་ངག་གཡུང་དྲུང་བོན་ལ།།

ལྟ་ཀློག་མཛད་བས་སྐལ་བ།།གོ་སྐབས་ལྡན་པ་ད་རེད།།

མཇལ་དཀའ་སངས་རྒྱས་སྔོན་བྱོན།།རིག་འཛིན་ལོ་པཎ་རྣམས་ཞལ།།

མཇལ་སྐལ་མེད་ཡང་ད་ལྟ།།མཚན་ལྡན་བླ་མའི་ཞབས་ཟིན།།

༢༠༡༡ ༡༡ ༣༠