རྩོམ་པ་པོ་གཤེན་སྨྨྱུག་གམ།  གཙང་ཚྭ་གཡུང་དྲུང་གཙུག་ཕུད་ཆུང་།

    གཤེན་སྨྱུག་གི་ཆེས་ཐོག་མའི་རྩོམ་དེབ་ཁེར་རྐྱང་གི་

                                     རོལ་དབྱངས་དང་འབྲེལ་བའི་གནས་ཚུལ།

ད་ལན་དུས་སྐབས་བཟང་པོ་ཞིག་གིས་རྐྱེན་ཏེ་བདག་གི་མི་ལོ་བཅུ་བརྒྱད་ནས་ཉི་ཤུ་ཐམ་པའི་བར་ན་བྱུང་བའི་སེམས་ཀྱི་སྣང་སྟངས་གཙོ་ཆེ་བ་རེ་ཞིག་སྟོན་པར་བྱེད་པའི་སྙན་ཚིག་འགའ་ཕྱོགས་སྡོམ་དུ་བྱས་ཏེ་རྒྱ་ཆེ་བའི་སྨྱུག་ཐོག་པ་དང་། ཕྱོགས་སོ་སོའི་ཀློག་པ་པོ་རེ་ཞིག་གི་མཐོང་ལམ་དུ་བཤམ་སྟོན་བྱུང་བ་ནི་རྒན་ཁྱུང་སྨྱུག་མཛེས་དང་། དཔེ་དེབ་འདིའི་སྡོང་གྲོགས་སུ་གྱུར་པ་ཁོ་བོའི་རྒན་ཡོན་ཏན་ཕུན་ཚོགས་སོགས་ཀྱིས་གཙོས་པའི་ཤེས་ཅན་པ་འགས་བདག་ལ་གནང་བའི་མཐུན་སྦྱོར་ལ་བརྟེན་ནས་བྱུང་བར་སྨོས་མ་དགོས། དེ་ཡང་རྩོམ་དེབ་འདིའི་ནང་དུ་རྒན་ཁྱུང་སྨྱུག་མཛེས་ཀྱི་སློབ་སྟོན་བཞིན་སྙན་ཚིག་རེ་ཞིག་ལས་རྩོམ་གཞན་གང་ཡང་འཁོད་མེད་ལ་འདིའི་ནང་དུ་འཁོད་པའི་སྙན་ཚིག་དེ་དག་ནི་མཚམས་སྤྲིན་གྱི་གླིང་ཁ་ནས་ཕུལ་བའི་མཆོད་ཀ་དང་། མི་ཚེའི་ལམ་བར་ནས་རྙེད་པའི་གླུ་སྐད། གནས་ལུགས་དང་སྒྱུ་རྩལ་ལས་འཕྲོས་པའི་སྐད་ཆ་ཞེས། སྟོད་ཚིག་དང་རྗེས་དྲན་སོགས་ཀྱིས་མཚོན་པའི་སྙན་རྩོམ་གྱི་ལེའུ་ཚན་གཅིག་དང་། དེ་མིན་ཡང་སློབ་གསོ་དང་གླུ་གཞས་སོགས་བདག་གི་མྱོང་སྣང་དམར་བརྗེན་ཞེས་བརྗོད་ཆོག་པའི་ཚིགས་བཅད་དང་ཚིག་ལྷུག་འགའ་ལྷན་དུ་སྡོམ་པའི་ཚན་པ་གཅིག ཡང་ཚན་པ་གཅིག་གི་ནང་དུ་རང་ཉིད་སྙན་ངག་འབྲི་བའི་ལམ་སྣེ་ཟིན་པ་ནས་ཅི་ལྟར་སྙན་ངག་བྲིས་པ་དང་། རང་ཉིད་ཀྱི་སྙན་ངག་འབྲི་བ་ལ་ཅིས་ཀྱང་ཚང་དགོས་པའི་གྲུབ་ཆ་དང་། དེ་མིན་རང་ཉིད་ཀྱིས་གླུ་བྲོ་དང་འཁྲབ་སྟོན་ལ་གཞིག་པའི་སྣང་ཚུལ་རེ་ཞིག་བསྟན་པའི་ཐོལ་རྩོམ་འགའ་འཁོད་པར་བྱས་ཏེ་དེ་དག་ཕྱོགས་སྡོམ་གྱི་མིང་ལ་ཁེར་རྐྱང་གི་རོལ་དབྱངས་ཞེས་རང་དང་། ཡང་ན་ཁོ་བོའི་མི་ཚེ་གཅིག་གི་གོམ་གཤིས་མཚོན་པའི་མཚན་ཞིག་སྨོས་ནས་ད་ཆར་པར་དུ་བསྐྲུན་ཟིན་ནས་ཁྱབ་སྤེལ་བྱུང་ཡོད། ཡང་སྙན་དེབ་འདིའི་མགོ་མཇུག་བར་གསུམ་ལ་གཤེན་སྨྱུག་གི་རྩོམ་དེབ་དང་པོ་ཞེས་པའི་མིང་བྱང་རེ་བྱུང་ཡོད་ལ་དེ་ནི་རང་ཉིད་ཀྱིས་དེ་ལྟར་འདོག་དགོས་པའི་བསམ་སྟངས་དང་བསྟུན་ཏེ་འདོག་པ་ཞིག་གཏན་མིན་ལ་ཕྱི་ཤོག་འཆར་འགོད་ཀྱི་སྐབས་སུ་དགེ་བའི་བཤེས་གཉེན་ཚང་གིས་སྨོས་པ་ཞིག་རེད་འདུག་པས་རང་ཉིད་ལ་མཚོན་ན་དགེ་རྒན་ཆེན་མོས་གནང་བའི་ཁ་གཡང་ཞེས་བརྗོད་ཆོག་པར་འདོད་ཀྱི་ཡོད། དེའི་དགོས་པ་ནི་རེ་ཞིག་གིས་ཀྱང་ཤེས་ཡོད་པའི་བཟོ་འདྲ་འདུག་ལ་གསལ་བཤད་ཅིག་ཞུས་ན་མིང་བྱང་དེས་གཤེན་སྨྱུག་གམ་གཙང་ཚྭ་གཡུང་དྲུང་གཙུག་ཕུད་ཀྱི་རྩོམ་དེབ་གཉིས་པ་ཞིག་ཀྱང་མི་རིང་བར་ཐོན་ཐུབ་པར་སྟོན་གྱི་ཡོད་ཟེར་ན་མི་རུང་བ་རྒྱ་ཆེར་མེད་ལ་ད་ཆའི་རང་ཉིད་ཀྱི་འདོད་མོས་དང་བསྟུན་ནས་བཤད་ན་རྗེས་མའི་ལོ་ཟླ་ཞིག་གི་ནང་དུ་རྩོམ་པ་པོ་རྐྱེན་གཞན་ཞིག་གི་དབང་དུ་མ་སོང་ཚེ། རང་ཉིད་ཀྱི་རྩོམ་གསར་དཔྱད་གཏམ། བགྲོད་གླེང་། དྲི་བ་དྲིས་ལན། དགག་རྩོམ་སོགས་ལས་གྲུབ་པའི་རྩོམ་སྣ་མི་ཉུང་བ་ཞིག་འཁོད་པའི་རྩོམ་དེབ་གཉིས་པ་དཔེའུ་ཙེ་དཀར་པོ་ཞེས་པ་ཞིག་ཤེས་རིག་ལ་དུངས་བ་ཟབ་པའི་ན་གཞོན་ཕོ་མོ་དག་ལ་ལེགས་སྐྱེས་སུ་ཕུལ་ཐུབ་པའི་རེ་བ་ཡོད་བཞིན་དུ་འགྲུབ་པའི་སྨོན་ལམ་ལན་བརྒྱར་ཞུ་ཞུ་ཞུ།                                                                                                   གཙང་ཚྭ་གཤེན་སྨྱུག་པས་ཀོ་རྒྱལ་དགོན་ནས།

                          ཐོག་མའི་གཏམ་གླེང་།།  ཁྱུང་སྨྱུག་མཛེས།

དེ་ཡང་སྙན་དེབ་རེར་ཐོག་མའི་སྐད་ཆ་འདི་མགོ་བོའི་ཚུལ་དུ་དགོས་མིན་མི་ཤེས་ཀྱང་། དེང་ཆར་འོ་ཅག་ཀུན་ལ་གོམས་གཤིས་སུ་གྱུར་ཕྱིར་རྩོམ་པ་པོས་ཀྱང་གོ་སྐབས་དེ་ང་ལ་སྤྲད་པ་རེད། ངག་རིག་གི་སྒྱུ་རྩལ་ལས་མཆེད་པའི་སྙན་པའི་གླུ་དབྱངས་འདི་དག་དལ་གྱིས་ལན་པར་སྤྲོ་བ་ནི། མིའི་རིགས་ཀྱི་མཚན་ཉིད་དམ་སྙན་ངག་གིས་ང་ཚོར་སྤྲད་པའི་བྱམས་བརྩེ་དེ་ཡིན་ཡང་སྲིད། ངས་འདི་ནས་རྩོམ་པ་པོ་ངོ་སྤྲོད་བྱེད་དགོས་སམ་འོན་ཏེ་རྩོམ་ཡིག་ངོ་སྤྲོད་བྱེད་དགོས་ཆ་མ་འཚལ་མོད། རྩོམ་འདིས་བདག་ལ་བཤད་པའི་སྐད་ཆ་རེ་འགའ་བཟློ་བར་མོས། སྤྱིར་གྲྭ་བཙུན་སྙན་ངག་པ་ཞིག་ལ་མཚོན་ན་མ་སྐྱེས་ཨ་མ་ཞེས་ངུ་རྒྱངས་འཐེན་འོས་མིན་ཤོད་པར་དཀའ་ནའང་། ཕྱི་ཤུན་ལྟ་བུའི་སྙན་ངག་འབྲི་བ་ནི་སྙན་ངག་གི་བྲན་གཡོག་ཏུ་ཚུད་པར་འདོད་ལ། དེས་ཕྱིར་བསྟོད་ཚིག་ཐན་ཐུན་ཞེས་ཕལ་གྱིས་གཙོག་པའི་ཚད་དུ་འདོད། ཏག་ཏག་ཡུལ་དེར་དད་པ་དམ་ཡང་ན་དེའི་ཡོན་ཏན་གྱི་ཆ་གང་ཡང་རང་གི་བསམ་སྟེང་དུ་རྣམ་པར་མ་དག་པར་བསྟོད་ཚིག་ཅིག་བྲིས་པ་ནི་བྲན་གཡོག་ལས་མ་འདས་སྙམ། ད་ལན་དེབ་འདིའི་ནང་གི་མཚམས་སྤྲིན་གྱི་གླེང་ཀ་ནས་ཕུལ་བའི་མཆོད་ཀར་མཚོན་ན་ཐོག་མའི་མཆོད་ཡུལ་གྱིས་མིའི་རིགས་ལ་སྤྲད་པའི་དགེ་མཚན་དུ་མ་ཞིག་གིས་བསྐུལ་ཏེ་སོར་རྩེ་ནས་བཞུར་ཕྱིར་དྲན་གཡོག་ཏུ་ཚུད་དོགས་མི་འདུག་སྙམ་ལ། ལར་སུ་ཞིག་ཡིནའང་རང་ཉིད་རང་ཉིད་ཡིན་པར་ཤེས་དགོས་པ་ནི་ཆེས་གལ་ཆེན་དུ་སྣང་ཞིང་། ད་གཟོད་རྩོམ་ཡིག་རེ་བྲིས་ཀྱང་རང་ཉིད་རྩོམ་ཡིག་དེའི་སྲོག་ཏུ་ཞུགས་པར་ངེས་ཤིང་། གཞན་རང་ཉིད་དང་ཁ་བྲལ་བའི་རྩོམ་ཡིག་ནི་ནེའུ་ཙོའི་མ་ཎི་ལས་མ་འདས། མདོར་ན་སེམས་ཀྱི་གཡོ་འགུལ་ལས་ཏག་ཏག་བཞུར་ཚེ་དེ་ནི་ཁྱོད་ཀྱི་སྐུ་ཚབ་ངོ་མ་དེ་ཡིན། དེབ་འདིའི་རྩོམ་པ་པོས་ལོ་འགའི་རིང་རང་གི་ཚོར་འདུ་སོར་རྩེར་སྐྱོན་ཏེ་འུ་ཚོ་ལ་ལེགས་གཅེས་སུ་གནང་བ་ནི་དགའ་འོས་པའི་གནས་སུ་མཆིས་ལ། རྩོམ་ཡིག་འདིའི་གཤིས་ཀ་རེ་རེ་ནས་ཁོ་བོས་འདིར་མི་བརྗོད་པ་ནི་ཀློག་པ་པོའི་གོ་སྐལ་དུ་ཡིན། ཁ་བས་གཡོགས་པའི་ཞིང་ཁམས་འདིར་སྙན་ངག་རིག་པ་སྨྲ་བའི་སྐྱ་སེར་དབྱར་གྱི་རྩི་ཏོག་བཞིན་འཁྲུངས་ཤིང་བཞད་ཀྱིན་འདུག་ལ། རྩོམ་པ་པོ་གཤེན་སྨྱུག་ཀྱང་ཁྱུ་ཚོགས་དེར་བཞུགས་བཞིན་ཡོད་པ་ནི་དེབ་འདིས་ཁྱེད་ཅག་ལ་ཤོད་ངེས་རེད། རེ་འགས་ནི་གྲྭ་བཙུན་ཞིག་གིས་སྙན་ཚིག་འབྲི་བར་ཅི་བྱེད་ཟེར། དེ་དག་གིས་སྙན་ངག་ཅེས་པའི་ཚིག་འབྲུ་གཉིས་པོ་འདིའི་ཁྱབ་ཚད་མ་རྟོགས་པར་སྙན་ངག་ཅེས་པ་འཇིག་རྟེན་གྱི་ངོ་གདོང་གཞན་དག་ཏུ་ཡོད་པར་འདོད་སྲིད། གྲྭ་བཙུན་ཞིག་ལ་མཚོན་ན་འཆད་རྩོད་རྩོམ་གསུམ་གྱི་ལས་སྟེགས་རེ་རེ་སྙན་ཞིང་འཇེབས་པའི་དབྱངས་རྟ་ལས་གྲུབ་འདུག་པས། མི་ཚེའི་འཁོར་རྟེན་གལ་ཆེན་ཞིག་སྙན་ངག་གིས་ཟིན་ཡོད་པའམ། སྙན་ངག་ལས་གྲུབ་ཡོད་པས། དེ་ནི་རྒྱང་སྐྱོད་ཀྱི་རྟ་ཕོ་ཞིག་དང་ཅིས་མི་མཚུངས། དེབ་འདིའི་རྩོམ་པ་པོས་ཀྱང་རང་ཉིད་ཀྱི་ལས་དབང་ལས་གྲུབ་པའི་དད་འདུན་གྱི་དབྱངས་ཚིག་བོན་པོ་ཞིག་གི་རྣམ་པ་གསལ་བ་དང་། ཕ་ཡུལ་གྱི་རྩྭ་ཐང་དང་མི་རིགས་ལ་འཆང་བའི་བརྩེ་བ་ཟབ་པའི་མཛེས་རྟོག་ལྷང་ལ་བུད་པ་སོགས་ཀློག་པ་པོར་སྔོན་འགྲོའི་ཚུལ་དུ་མདོར་བསྡུས་སོ།།

 ཁྱུང་སྨྱུག་མཛེས་ཀྱིས་རང་ཤག་གཙུག་ལག་འཁྱིལ་ཁང་དུ་༢༠༡༢  ༡  ༨ཉིན།།