གཤེན་རབ་མི་བོ།

        --- བོན་གྱི་ཐང་ཀ་ཞིག་མཐོང་རྗེས་ཇ་ཐུན་གཅིག་གི་ཚེར་བྲིས་པ།

            འདི་ནས་ཉི་མ་ནུབ་ཀྱི་བྱང་ཕྱོགས་ཏེ།།

            སྟག་གཟིག་འོལ་མོ་གླིང་ཞེས་གྲགས་པ་ན།།

            སྐལ་ཆེན་སྟོན་པ་རྒྱལ་བ་གཤེན་རབ་ཞེས།།

མཚན་གྱི་ཆོ་པན་སྲིད་ཞིའི་དཔལ་དུ་གྲུབ།།

རྨད་བྱུང་མཚན་དཔེའི་སྐུ་མཆོག་བརྟན་ཞིང་བརྗིད།།

གསུང་གི་འཁོར་ལོ་བསྟན་འགྲོའི་མགོན་དུ་དཔའ།།

ཤེས་བྱའི་དཀྱིལ་འཁོར་ཀུན་ཀྱང་གསལ་བ་ཉིད།།

སྐྱེ་དགུར་བོན་གྱི་སྐལ་བ་སྦྱིན་པའི་མགོན།།

ལྷོ་གླིང་དགེ་བཅུའི་ཉི་གཞོན་མ་འཛུམ་གོང་།།

འདྲེ་སྲིན་བྱུར་གྱི་ཟ་ཁ་ཞི་མཛད་པ།།

ལྷ་མི་གཤེན་གསུམ་དགྱེས་པའི་དགའ་སྟོན་དུ།།

འཕྲུལ་ངག་བོན་སྒོ་སྟོན་ལ་ཕྱག་འཚལ་ལོ།།

བཅུ་གསུམ་གནམ་གྱི་རིམ་པའི་གོང་ཤད་ནས།།

སྨིན་གྲོལ་རྒྱལ་བསྟན་ཞི་བའི་འོད་ཆེན་པོ།།

སྐྱེ་དགུར་སྣང་བའི་དཔལ་དུ་སྦྱིན་པའི་གཉེན།།

འདྲེན་མཆོག་གང་དེ་སྲིད་ཞིའི་ལྷ་དང་གཤེན།།