བོན་དང་བོད་དབོན་ཞེས་པའི་ཐ་སྙད་བར་གྱི་འབྲེལ་བ།_{༡}

སྤྱིར་བོན་ཞེས་པའི་ཐ་སྙད་འདི་བོད་ཀྱི་ཐ་སྙད་ཅིག་ཡིན་པ་ནི་ཡོངས་གྲགས་སུ་གྲགས་པ་ཞིག་རེད། དེའི་རྒྱུ་མཚན་ནི། བོན་གྱི་དཔེ་རྙིང་གྲགས་ཅན་ཞང་བོད་ཀྱི་སྒྲ་སྡེབ་སྲིད་པའི་མཛོད་ཕུགས་ཀྱི་འགྲེལ་བ་དྲན་པའི་སྒྲ་འགྲེལ་ལས་རྐོ་རླང་ཤིམ་རེ་ཚར་གྱེར་ནི། །གཟུགས་སྒྲ་དྲི་རོ་རིགས་བོན་ཏེ།།_{༢} ཞེས་པ་འདི་ལྟར་རམ། གཞང་ཡང་ཞུ་ཡི་སྒྲ་སྡེབ་སོགས་སུ་ཞང་སྐད་དུ་གྱེར་ཞེས་པ་དེ་བོད་སྐད་དུ་བསྒྱུར་ཚེ་གཤེན་དང་བོན་ཞེས་འབྱུང་བར་བཤད་པ་དེ་དག་གིས་གསལ་ཁ་ཞིག་བྱས་ཡོད་པར་འདོད་ཅིང་། དེ་འདྲའི་ཐ་སྙད་དེའི་གོ་དོན་གྱི་ཐད་ནས་བཤད་པ་ཡིན་ན་གསོལ་ཟས་ཕུལ་བ་དང་། སྙན་དུ་བོས་པ། ཐོག་མའི་འབྱུང་ཁུངས་ལྟ་བུ་སྟེ་ནས་ཀྱི་ས་བོན་སོགས་ཀྱི་ཕྱོགས་ལྟ་བུར་ཁྱབ་ཚད་གཏིང་ཟབ་པ་ཞིག་ཡིན་ཞིང་། དང་ཐོག་ཆོས་ལུགས་ཤིག་གི་ཁྱབ་ཁོངས་ནས་ཐོན་པ་ཡིན་ནམ། ཐ་སྙད་དེའི་འབྱུང་ཁུངས་དེ་ལས་གཞན་ཞིག་ཡིན་མིན་གྱི་སྐོར་ལ་དེ་ཙམ་སྡོམ་ཚིག་འགོད་སླ་བོ་མིན་ལ། དེའི་སྐོར་ནས་ད་རུང་དཔྱད་རྒྱུར་ལྷག་ཡོད་པ་རེད་སྙམ། ད་སྔོན་འཛམ་གླིང་གི་ཞིབ་འཇུག་པའི་ཁྲོད་དུ་བོན་ཞེས་པའི་ཐ་སྙད་འདིའི་སྐོར་ལ་དཔྱད་པ་གཏོང་མཁན་མང་པོ་ཞིག་བྱུང་ཡོད་ལ། དེ་དག་ཕལ་ཆེ་བས་ནི་སྔ་རབས་དང་། དེང་གི་མཁས་དབང་ཚོས་_{༤} བོན་ཞེས་པའི་ཐ་སྙད་ཀྱི་གོ་དོན་བཟླས་པ་དང་། སྟོང་པ་ཉིད་ཅེས་བཞག་ཡོད་པ་ལྟ་བུས་མཚོན་པའི་ཐ་སྙད་འདིའི་གོ་དོན་གྱི་ཐད་ནས་དཔྱད་པ་གཏོང་གིན་ཡོད་པ་ལས་གོང་གི་བོན་དང་བོད། དབོན་ཞེས་པའི་ཐ་སྙད་དེ་དག་གི་བར་གྱི་འབྲེལ་བའི་སྐོར་ནས་དཔྱད་བརྗོད་བྱས་པ་ཉུང་ཉུང་ཞིག་ཏུ་གྱུར་ཡོད། དེར་བརྟེན་དཔྱད་ཐུང་འདིར་གོང་གསལ་ཐ་སྙད་དེ་གསུམ་གྱི་འབྲེལ་བའི་སྐོར་ཞིག་ཀྱང་གླེང་འདོད་པ་ཡིན།

བོན་དང་དབོན་ཞེས་པའི་ཐ་སྙད་བར་གྱི་འབྲེལ་བའི་སྐོར།

དེ་ཡང་དཔྱད་བརྗོད་འདིའི་མིང་བྱང་དུ་གསལ་བའི་བོན་དང་། དབོན། བོད་ཅེས་པའི་ཐ་སྙད་འདི་དག་གཅིག་ལ་གཅིག་འབྲེལ་གྱི་ཚུལ་དུ་གནས་ཡོད། དབོན་ཞེས་པའི་ཐ་སྙད་འདི་ང་ཚོ་བོད་ཀྱི་ཡིག་ཚང་མང་པོའི་ཁྲོད་དུ་མཇལ་རྒྱུ་ཡོད་པ་ཞིག་ཡིན་ལ། དེའི་གོ་དོན་གང་ཡིན་ནི་ཤིན་ཏུ་རྟོགས་དཀའ་བ་ཞིག་ཡིན་ཡང་དོན་དུ་དཔོན་ཞེས་པ་དང་འདྲ་བར་ཆེ་བརྗོད་ཀྱི་རང་བཞིན་ལྡན་པའི་ཚིག་ཅིག་ཡིན་པར་བཤད་ཆོག གཤམ་དུ་དཔྱད་གཞུང་གཞན་ནས་བོན་དང་དབོན་ཞེས་པའི་ཐ་སྙད་གཉིས་འབྲེལ་བའི་སྐོར་གྱི་གནས་ཚུལ་ཞིག་འཚོལ་བར་འདོད། དེ་ཡང་བོད་ཀྱི་ལོ་རྒྱུས་དཔེ་ཆ་སོགས་ཀྱིས་མཚོན་པའི་དཔྱད་གཞུང་རྣམས་སུ་གོང་གི་ཐ་སྙད་གཉིས་ཕན་ཚུན་འབྲེལ་བའི་སྐོར་རྒྱ་ཆེར་མཐོང་རྒྱུ་མེད་ནའང་། དཔེ་རྙིང་རྣམས་སུ་བོན་གྱི་ཚབ་ལ་དབོན་ཞེས་བཀོལ་བ་དང་། དབོན་གྱི་ཚབ་ལ་བོན་ཞེས་བྲིས་ཡོད་པ་ཁ་ཤས་རྙེད་རྒྱུ་ཡོད་པ་རེད། དཔེར་ན། དེ་ཆོས་ཡིན་པས་ང་མི་དགའ། ངེད་རང་དབོན་བྱ་ཟེར་བ་དང་། རྗེའི་ཞལ་ནས་ངའི་བཀའ་བཅོག་པ་རྟག་ར་ཀླུ་གོང་བྱང་དུ་སྤྱུགས་ཤིག་_{༥}ཅེས་པ་འདི་ལྟ་བུ་རེད། ལུང་ཚིག་དེའི་ཐོན་ཁུང་ནི་ཆོས་རྒྱལ་ཁྲི་སྲོང་ལྡེ་བཙན་གྱི་བློན་པོ་སྦ་གསལ་སྣང་ངམ་སྦ་ཡེ་ཤེས་དབང་པོས་བརྩམས་པར་གྲགས་པའི་སྦ་བཞད་ཅེས་པ་དེ་རེད་ལ། སྟག་ར་ཀླུ་གོང་ནི་སྤྱི་ལོའི་དུས་རབས་བརྒྱད་པའི་བོད་ཀྱི་རིག་གནས་འགྲན་རྩོད་སྐབས་སུ་ཡོད་པའི་བོན་གྱི་ཁ་འཛིན་གཙོ་བོ་དེ་ཡིན་པ་དང་། གོང་གི་ལུང་ཚིག་དེ་དུས་རབས་བརྒྱད་པའི་ཆར་བན་བོན་རྩོད་འཁྲུག་སྐབས་ཀྱི་གནས་ཚུལ་ལས་བྱུང་བ་སོགས་གནས་ཚུལ་ཁ་ཤས་གུང་བསྒྲིགས་ནས་ཡོང་ན། སྐབས་དེར་གསལ་བའི་དབོན་ཞེས་པ་དེ་བོད་བཙན་པོའི་དུས་སྐབས་ཀྱི་བོན་ཆོས་ལས་གཞན་པའི་ཕྱོགས་སུ་གོ་བ་ལེན་ས་མེད་ལ། དེའི་ཟུར་དུ་སྦ་བཞད་རྩོམ་སྒྲིག་པ་རང་ངོས་ནས་བོན་ཞེས་པའི་མཆན་བུ་ཞིག་བྲིས་ཡོད་པ་ནི་དོན་ལ་གནས་པ་ཞིག་རེད། གནད་དེ་དག་གིས་བོན་དང་དབོན་ཞེས་པའི་ཐ་སྙད་བར་གྱི་འབྲེལ་བ་ཞིག་དངོས་སུ་བསྟན་ཡོད་ཅེས་ངོས་འཛིན་ཐུབ་པ་ཞིག་ཡིན་ལ། བོན་དང་དབོན་ཞེས་པའི་མིང་འདི་གཉིས་ཕན་ཚུན་བརྗེ་སྤོར་བྱས་པའི་སྐོར་དེ་དག་ཀྱང་གསལ་ཁ་ཅུང་ཟད་ཅིག་བསྟན་ཡོད་པ་རེད། གཞན་ཡང་བོད་རྒྱ་ཚིག་མཛོད་སོགས་ཀྱིས་གཙོས་པའི་ཡིག་ཚགས་ཕལ་ཆེ་བ་ལས་ཁུ་དབོན་_{ཚིག་མཛོད་རྣམས་སུ་ཨ་ཁུ་དང་ཚ་བོ་སོགས་ལ་གོ་བར་བཤད།}ཞེས་པ་ཞིག་ལས་ཁུ་བོན་ཞེས་པ་ཞིག་བྲིས་པ་ཕལ་ཆེར་མཐོང་རྒྱུ་མེད་པའི་ཚད་དུ་ཡོད། འོན་ཀྱང་ཁུ་བོན་དང་ཁུ་དབོན་གཉིས་དོན་ཐ་དད་དུ་བཀར་བར་མི་ནུས་པ་ཞིག་རེད། བོན་གྱི་ཡིག་ཚང་རེ་འགའ་ནས་ཁུ་བོན་དང་ཁུ་དབོན་ཞེས་རེས་མོས་སུ་བྲིས་པའི་སྐབས་ཡོད་པ་ནི་དཔེར་ན་ལུང་མཚན་ཉིད་སྲིད་པའི་མཛོད་ཕུགས་ལས་ཁུ་བོན་མཐོང་གྲགས་ཞེས་བྱུང་བ་འདི་ལྟ་བུ་རེད།_{༦} དེར་བརྟེན་ཁུ་དབོན་ཞེས་པའི་འབྲི་ཚུལ་གཅིག་པུ་ལ་ཡང་དབོན་དང་བོན་ཞེས་སྔོན་འཇུག་ཡོད་མེད་གཉིས་སུ་མཆིས་པ་འདིས་ཀྱང་བོན་དང་དབོན་ཞེས་པའི་ཐ་སྙད་གཉིས་ཀྱི་འབྲེལ་བ་ཞིག་བསྟན་ཡོད་པ་ཡིན།

བོན་དང་བོད་ཀྱི་ཐ་སྙད་བརྗེ་སྤོར་བྱས་པའི་སྐོར།

ད་ནི་ས་བཅད་གཉིས་པ་བོན་དང་བོད་ཅེས་པའི་མིང་གཞི་འདི་གཉིས་ཀྱི་འབྲེལ་བ་ཞིག་གླེང་བར་བྱ། སྤྱིར་བོན་ཞེས་པ་འདི་ཆོས་ལུགས་ཀྱི་ཁྱབ་ཁོངས་སུ་ཁྱེར་ཡོང་ཚེ་རགས་པའི་དབང་དུ་བྱས་ན་སྲིད་པའི་བོན་དང་གཡུང་དྲུང་བོན་གཉིས་སུ་དབྱེ་ཆོག་པ་རེད་ལ། དེ་གཉིས་ཀ་ཡང་འཚེ་བ་ཆོས་སུ་སྨྲ་མིན་ཙམ་ལས་བོན་གྱི་ཆོས་ལུགས་ཤིག་ཏུ་ངོས་འཛིན་དགོས་པ་ནི་གཅིག་མཚུངས་ཤིག་རེད། དེར་བརྟེན་སྲིད་པའི་བོན་དང་། གཡུང་དྲུང་གི་བོན་གང་ཡིན་ཡང་བོད་ཀྱི་ཡུལ་གྲུ་འདིར་མཚོན་ན་གལ་ཆེའི་གནས་བབས་བཟུང་ཡོད་པས་ཆོས་ལུགས་འདི་གཉིས་ཀ་ཡང་བོད་ཀྱི་ངོས་ནས་བཤད་ན་དམངས་ཀྱི་རང་བཞིན་ཅན་ཞིག་དང་། ཡུལ་སའི་རང་བཞིན་ལྡན་པའི་ཆོས་ལུགས་ཤིག་གི་ངོ་བོར་གནས་ཡོད་པ་རེད། དེའི་རྒྱུ་མཚན་གྱིས་བོད་ཀྱི་ངོས་ནས་བཤད་ན་བོན་ཞེས་པའི་ཐ་སྙད་འདི་སྐད་གྲགས་ཆེ་བའི་ཐ་སྙད་ཅིག་རེད། སྐབས་དེ་ཤད་དུ་བོད་ཡུལ་ཞེས་པ་དེ་བོད་རུ་བཞི་ལྟ་བུ་ཙམ་མ་ཡིན་པར་ད་ལྟའི་བོད་ཀྱི་ས་ཁོངས་སུ་མེད་པའི་ཡུལ་ཕྱོགས་ཁ་ཤས་བོད་ཡུལ་གྱི་ཁོངས་སུ་འདུས་པ་རེད། གཤམ་དུ་ངས་བོན་དང་བོད་གཉིས་ལོ་རྒྱུས་ཀྱི་འཕྲང་ལམ་ཞིག་ནས་འགྱུར་བ་རེས་མོས་སུ་ཐེབས་ནས་ཡོང་བའི་ཐ་སྙད་ཅིག་དུ་ངོས་འཛིན་བྱས་ཡོད་ལ། དེའི་རྒྱུ་མཚན་ནི་གཙོ་བོ་བོན་ནི་ཆོས་ལུགས་ཤིག་ཡིན་པས་དེ་བོད་ཀྱི་དམངས་སེམས་དང་། བོད་ཀྱི་ཡུལ་སྲོལ་གོམས་གཤིས་སོགས་ཀྱི་བར་ན་ས་འདྲེས་རྡོ་འདྲེས་སུ་གྱུར་ཡོད་པའི་གནད་དོན་དེ་དག་ལ་ཐུག་ཡོད་པར་ངོས་འཛིན་བྱེད་བཞིན་ཡོད་ཅེས་གཤམ་དུ་ཐ་སྙད་དེ་གཉིས་ཀྱི་བརྗེ་སྤོར་བྱུང་བའི་སྐོར་སྡུས་ཙམ་གླེང་བར་བྱ། དེ་ཡང་རྒྱལ་རབས་དེབ་ཐེར་དཀར་པོ་ལས་_{༧}བོན་དང་བོད་གཉིས་ཕན་ཚུན་བརྗེ་རེས་བྱས་ཡོད་པའི་སྐོར་གྱི་དོགས་སློང་ཅུང་ཟད་ཅིག་བྱས་ཡོད་པ་ཡིན་ལ། དེ་ནི་དེབ་དཀར་རྩོམ་པ་པོ་ཁོང་གི་འདོད་དོན་ཞིག་ཡིན་པར་མཐའ་གཅིག་ཏུ་ངོས་འཛིན་མི་འོས་པའི་ཚད་དུ་ཡོད་པ་ནི་དེའི་སྐོར་ཆ་ཚང་ཞིག་བཀླག་ན་བདེ་ལག་ཏུ་ཤེས་ཐུབ་པར་འགྱུར། སྤྱིར་བོན་དང་བོད་ཅེས་པའི་ཐ་སྙད་འདི་གཉིས་དེབ་དཀར་ལས་གསུངས་པ་ལྟར་ན་དོན་གཅིག་ཏུ་གོ་དགོས་པར་སྣང་ཡང་། ཐ་སྙད་འདི་གཉིས་ཀྱི་ཁྱབ་ཚད་དང་གོ་དོན་སོགས་ཀྱི་ཐད་ནས་དཔག་ན་མཐའ་གཅིག་ཏུ་དོན་གཅིག་པའི་གོ་བ་རྒྱག་མི་ཐུབ་པ་ཞིག་རེད། ཡིན་ནའང་ཏུན་ཧོང་ཡིག་ཆ་སོགས་ཀྱིས་མཚོན་པའི་དཔྱད་གཞིའི་ཡིག་ཚགས་རྣམས་གུང་བསྒྲིགས་ནས་དཔྱད་བསྡུར་བྱས་ཡོང་ན་ཕན་ཚུན་འགྱུར་རེས་བྱུང་བ་སོགས་ཀྱི་འབྲེལ་བ་ངེས་ཅན་ཞིག་ཡོད་པར་བཤད་ཆོག་པར་འདོད་ལ། བོད་ཅེས་པ་འདི་བོན་ཞེས་པའི་འབྲི་ཚུལ་གཞན་ཞིག་ཀྱང་ཡིན་པར་སྣང་། དུས་རབས་དགུ་པའི་སྔོན་གྱི་དཔྱད་ཡིག་རེ་འགར་_{༧}བོནད་ཅེས་པའི་ཐ་སྙད་ཅིག་བྱུང་བ་དེས་གནའ་དུས་སུ་བོན་ཞེས་པའི་ཐ་སྙད་ལ་ད་དྲག་སྦྱར་སྲོལ་ཡོད་པའི་སྐོར་ར་སྤྲོད་གསལ་པོ་ཞིག་བྱས་ཡོད་པ་རེད། ཡིག་རྙིང་རྣམས་སུ་_{༨}རྗེས་འཇུག་གི་ད་ན་གཉིས་ཕན་ཚུན་རེས་མོས་སུ་བརྗེ་རེས་བྱས་པའི་སྐོར་ཡོད་པ་ནི་དཔེར་ན་སྲིད་པ་རྒྱུད་ཀྱི་ཁ་བྱང་དུ་ཏིང་ཁྲི་བཙད་པོ་ཞེས་པ་ལྟ་བུ་དང་། བེེ་རོ་ཙ་ནས་བརྩམས་པར་གྲགས་པའི་ཨོ་རྒྱན་པད་མའི་རྣམ་ཐར་དུ་མུ་ཏིག་བཙད་པོ་ཞེས་པ་ལྟ་བུ་དང་། གཞན་ཡང་སྤྱི་ལོའི་དུས་རབས་བཅུ་གསུམ་པའི་ནང་དུ་གཡས་རུའི་སྟོན་པ་འ་ཞ་བློ་གྲོ་རྒྱལ་མཚན་གྱིས་མཛད་པའི་ལུང་མཚན་ཉིད་སྲིད་པའི་མཛོད་ཕུགས་ལས་རྗེ་བཙད་པོ་ཞེས་བྲིས་ཡོད་པ་མཐོང་རྒྱུ་ཡོད་ལ། མཁས་བཞིའི་མཛོད་དུ་སྲིད་པ་ཕྱིན་ཀ་ལོག་ལ་སྲིད་པ་ཕྱིད་ཀ་ལོག་ཅེས་སུ་བྲིས་ཡོད་པ་_{༡༠}འདི་ལྟ་བུའི་རིགས་མང་བའམ། དེབ་དཀར་ལས་_{༡༡}གནའ་སྔ་མོར་ཆུན་པོ་ལ་ཆུད་པོ་ཞེས་སུ་འབྲི་སྲོལ་ཡོད་པར་གསལ་བ་དེ་དག་གིས་སྒྲུབ་ཐུབ་པ་རེད། གཅིག་བྱས་ན་འབྲི་སྲོལ་དེ་དག་བོནད་ཅེས་པའི་ཐ་སྙད་འདི་དང་འདི་ལྟ་བུའི་རྗེས་འཇུག་གི་ན་དང་ད་དྲག་གཉིས་ཕན་ཚུན་བརྗེ་རེས་བྱས་པ་མ་ཡིན་པའི་ངེས་པ་མེད། དེ་ལྟར་བཙན་པོ་ལ་བཙད་པོ་དང་། ཆུན་པོ་ལ་ཆུད་པོ་ཞེས་སུ་མིང་གཞི་འདི་དག་གི་རྗེས་འཇུག་ད་ན་གཉིས་རེས་མོས་སུ་བརྗེ་རེས་བྱུང་ཡོད་པ་ལ་དཔྱད་ན་བོན་ཞེས་པའི་མིང་གཞི་འདིའི་རྗེས་འཇུག་ནའི་ཚབ་ཏུ་ད་སྦྱར་མི་ཆོག་པའི་རྒྱུ་མཚན་མེད་པ་དང་བོད་ཅེས་པའི་མིང་འདི་བོན་ཞེས་པའི་ཐ་སྙད་དེའི་རྗེས་འཇུག་ད་ན་གཉིས་ཕན་ཚུན་བརྗེས་ནས་ཡོང་བ་ཞིག་ཡིན་པའི་ཚོད་དཔག་ཅུང་ཟད་ཙམ་ཐུབ་པ་རེད་སྙམ། བོད་རིག་པའི་ཞིབ་འཇུག་པ་ངག་དབང་རྒྱ་མཚོ་མཆོག་གིས་ཏུན་ཧོང་ཡིག་ཆའི་ཁྲོད་དུ་བྱུང་བའི་སྤུ་རྒྱལ་པོན་ཞེས་པའི་ཐ་སྙད་ཅིག་ལོ་དེབ་དཔྱོད་ལྡན་མཆོད་པའི་མེ་ཏོག་ཏུ་ཟུར་འདྲེན་བྱས་ཡོད།_{༡༢}དེ་ནི་དོན་གྱི་ཆ་ནས་བཤད་ན་གནའ་དུས་སྤུ་རྒྱལ་བོད་ཅེས་པའི་ཚབ་ཏུ་སྤུ་རྒྱལ་བོན་ཞེས་འབོད་པའམ། གཞན་ཡང་བོད་ཡུལ་ལ་བོན་ཡུལ་ཞེས་འབོད་ཀྱིན་ཡོད་པའི་བདེན་དཔང་གལ་ཆེ་བ་ཞིག་རེད། སྐབས་འདིར་དེའི་ཐད་ནས་བོད་དང་བོན་ཞེས་པའི་ཐ་སྙད་སྐོར་ལ་དཔྱད་པ་ཅུང་ཟད་ཅིག་བྱེད་པར་འདོད། མདའ་འཕང་བོད་འགྱུར་མར་_{༡༣}ཏུན་ཧོང་ཡིག་ཆའི་ནང་གི་ལུང་ཚིག་དེ་རང་རྩོམ་དུ་ཚན་བཤུས་བྱས་ཚེ་སྤུ་རྒྱལ་པོན་ཞེས་མ་བྲིས་པར་སྤུ་རྒྱལ་བོན་ཞེས་སུ་བྲིས་ཡོད་པ་དེས་གོང་དུ་གསལ་པའི་སྤུ་རྒྱལ་པོན་ཞེས་པའི་ཟུར་གྱི་པོན་ཞེས་པ་དེ་ཞིབ་འཇུག་པ་མཁར་རྨེའུ་བསམ་གཏན་ལྟར་ན་བོན་ཞེས་པའི་ཐ་སྙད་དེ་ཙམ་དུ་ངོས་འཛིན་གནང་ཡོད་ཅེས་བཤད་ཆོག་པར་འདོད། སྤྱིར་མིང་གཞིའི་པ་བ་གཉིས་སྒྲ་གདངས་ཐག་ཉེ་བ་དང་། ཏུན་ཧོང་ཡིག་ཆའི་ཁྲོད་དུ་_{༡༤}བུ་དང་བུ་ཚ་ཞེས་པ་ལ་པུ་དང་བུ་ཚ་ཞེས་སུ་བྲིས་ཡོད་པ་ལྟ་བུ་མིང་གཞིའི་པ་བ་གཉིས་ཕན་ཚུན་བརྗེ་རེས་བྱུང་བའི་སྐབས་ཡོད་པའི་སྐོར་འདི་དག་ལ་ཚོད་དཔག་བྱས་ན་སྐབས་འདིའི་སྤུ་རྒྱལ་པོན་ཞེས་པའི་པོན་དེ་ཐད་དཀར་བོན་ཞེས་པའི་སྒྲ་མ་དག་པའམ་དེའི་འབྲི་ཚུལ་གཞན་ཞིག་ཡིན་པར་ཁ་ཚོན་གཅོད་ཆོག་པ་ཡིན་ལ། དོན་གྱི་ཆ་ནས་བཤད་ན་སྐབས་འདིའི་སྤུ་རྒྱལ་ཞེས་པའི་ཟུར་གྱི་པོན་ཞེས་པ་དེ་བོན་ཞེས་པ་ལས་གཞན་པར་གོ་བ་རྒྱག་ཏུ་མེད་པས་སྐབས་འདིའི་པོན་ཞེས་པ་དེ་དོན་དུ་བོན་ཞེས་པའི་ཐ་སྙད་དེ་ལས་གཞན་མི་འདས་པ་ཞིག་རེད། བོད་ཀྱི་ལོ་རྒྱུས་གཡུ་ཡི་ཕྲེང་བ་སོགས་སུ་ཏུན་ཧོན་ནས་ཐོན་པའི་བོད་ཀྱི་ལོ་རྒྱུས་ཡིག་ཆ་འདི་དག་སྤྱི་ལོའི་དུས་རབས་བདུན་པ་དང་དགུ་པའི་བར་དུ་བྱུང་པ་ཞིག་ཏུ་བཤད་ཡོད།_{༡༥}དེའི་དབང་གིས་ཏུན་ཧོང་ཡིག་ཆར་འཁོད་པའི་སྤུ་རྒྱལ་པོན་ཞེས་པའི་ཐ་སྙད་དེས་སྤྱི་ལོའི་དུས་རབས་དགུ་པའི་སྔོན་དུ་བོན་དང་བོད་ཅེས་པའི་མིང་འདི་གཉིས་ཡིག་ཐོག་ཏུ་བརྗེ་རེས་བྱུང་ཡོད་པའི་སྐོར་ནས་དཔེ་མི་སྲིད་པའི་ངོ་སྤྲོད་གཅེར་དུ་ཕྱུང་བ་ཞིག་ཀྱང་བྱས་ཡོད་པ་རེད་ཅེས་གླེང་ཆོག་པར་འདོད། དེ་ལྟར་བོན་དང་བོད་ཅེས་པའི་མིང་གཞིའི་འདི་གཉིས་ཀྱི་སྐོར་ནས་བོད་ཅེས་པའི་མིང་དེ་བོན་ཞེས་པའི་ཐ་སྙད་ཀྱི་འབྲི་ཚུལ་གཞན་པའི་ཚུལ་དུ་བྱས་ནས་འོང་བ་ཞིག་ཡིན་པའི་གསལ་བཤད་ཀྱི་ཚུལ་དུ་རེ་ཞིག་གླེང་ཟིན་པ་ཡིན།། །།

①འདི་ནི་ཁོ་བོའི་ཆེད་རྩོམ་ཞིག་གི་གླེང་སློང་ལས་བོན་དང་བོད་ཅེས་པའི་ཐ་སྙད་སྐོར་ནས་ཅུང་ཟད་བྱུང་བ་དེའི་གནད་དོན་རེ་ཞིག་རྒྱས་སྤྲོས་བྱས་པ་དེ་ཡིན།

②ཆབ་མདོའི་ལྕགས་དཔར་མའི་མཉམ་མེད་གསུང་འབུམ་ཁྲོད་ཀྱི་ཤོག་གྲངས་༡༦ལས་གསལ།

③༢༠༠༩ལོར་མི་རིགས་དཔེ་སྐྲུན་ཁང་ནས་བསྐྲུན་པའི་རྦ་བཞད་ཕྱོགས་བསྒྲིགས་ཞེས་པའི་ཤོག་གྲངས་༡༡༤ལས་གསལ།

④སི་ཁྲོན་མི་རིགས་དཔེ་སྐྲུན་ཁང་གིས་བསྐྲུན་པའི་སངས་རྒྱས་གཡུང་དྲུང་བོན་གྱི་དཔེ་ཚོགས་ཀྱི་ཤོག་གྲངས་༧༢ལས་གསལ།

⑤དུས་རབས་བཅུ་གཉིས་པའི་ནང་དུ་བྱུང་བའི་བཅོམ་ལྡན་རིག་རལ་དང་། ནམ་མཁའི་ནོར་བུ་སོགས།

⑥༢༠༠༩ལོར་སི་ཁྲོན་མི་རིགས་དཔེ་སྐྲུན་ཁང་ནས་བསྐྲུན་པའི་མཁས་དབང་དགེ་འདུན་ཆོས་འཕེལ་གྱི་གསུང་འབུམ་སྨད་ཆའི་ཤོག་གྲངས་༣༡༣ལས་གསལ།

⑧༢༠༠༦ལོར་མི་རིགས་དཔེ་སྐྲུན་ཁང་ནས་བསྐྲུན་པའི་སྤུ་རྒྱལ་བཙན་པོའི་སྐབས་ཀྱི་བརྡ་རྙིང་ཡིག་ཆ་སློབ་གསལ་སྟོང་གི་འཇུག་སྒོའི་ཤོག་གྲངས་༢༦༣ལས་གསལ།

⑨༢༠༡༡ལོར་ཅང་ཧའོ་གློག་རྡུལ་དཔེ་སྐྲུན་ཁང་ནས་སྐྲུན་པའི་སྲིད་པ་རྒྱུད་ཀྱི་ཁ་བྱང་གི་ཤོག་གྲངས་༤༥ལས་དང་། ༢༠༠༧ལོར་སྲི་ཁྲོན་མི་རིགས་དཔེ་སྐྲུན་ཁང་ནས་སྐྲུན་པའི་སངས་རྒྱས་གཡུང་དྲུང་བོན་གྱི་དཔེ་ཚོགས་ཨང་དགུ་པའི་ཤོག་གྲངས་༧༥ལས་གསལ།

⑩ཀན་སུའུ་མི་རིགས་དཔེ་སྐྲུན་ཁང་ནས་སྐྲུན་པའི་བརྟེན་འགྱུར་ཁྲོད་ཀྱི་མཁས་བཞིའི་མཛོད་འགྲེལ་གླེགས་བམ་དང་པོའི་༣༤ལས་གསལ།

⑪གོང་མ་ལྟར་གྱི་ཤོག་གྲངས་༣༡༣ལས་གསལ།

⑫དཔྱོད་ལྡན་མཆོད་པའི་མེ་ཏོག་འདོན་ཐེངས་དགུ་པའི་ཤོག་གྲངས་༢༤ལས་གསལ།

⑬༢༠༡༠ལོར་ཀྲུང་གོའི་བོད་རིག་པ་དཔེ་སྐྲུན་ཁང་གིས་སྐྲུན་པའི་མདའ་དང་འཕང་གི་སྨད་ཆའི་ཤོག་གྲངས་༨༠ལས་གསལ།

⑭༢༠༠༣ལོར་སི་ཁྲོན་མི་རིགས་དེ་སྐྲུན་ཁང་ནས་སྐྲུན་པའི་བོད་ཀྱི་གནའ་རབས་ཡིག་ཆ་གཅེས་བསྡུས་ ཀྱི་ཤོག་གྲངས་༡༥༠ལས་གསལ།

⑮བོད་ཀྱི་ལོ་རྒྱུས་གཡུ་ཡི་ཕྲེང་བའི་སྨད་ཆའི་ཤོག་གྲངས་༧༩༠ལས་གསལ།