ཀ་ཁ་ག་ང།

བགྲང་བྱ་ཁྲི་ཁྲི་ཕྲག་གི་གནའ་སྔ་མོར།

ལོ་རྒྱུས་དང་གཏམ་རྒྱུད་ཀྱི་བང་རིམ་བརྩིགས་པའི་ཡར་སྔོན་ཏེ།

བཤད་མི་བཏུབ་པའི་མི་རབས་དང་དུས་རིམ་ཆ་གཅིག་གི་རྒྱབ་རོལ་དུ།

སྙན་ངག་འདིའི་བྱིན་རླབས་ཀྱི་ཆུ་ཐིགས་འགྲོ་ཀུན་ལ་ཐིམས་ཤིང་།

ངག་རྟ་འདིས་ང་ཚོའི་ཞལ་འབྱེད་གནང་བ་ཨི་ཚོར།

ཀ་ཁ་ག་ང།

གནམ་རིམ་པ་བཅུ་གསུམ་གྱི་ཡ་ཐོག་ན།

མཚན་དཔེའི་འོད་སྣང་འབར་སྟེ།

ས་རིམ་པ་བཅུ་གསུམ་འདིའི་གོང་ཤད་དུ།

ཚངས་དབྱངས་ཀྱི་རོལ་མོ་དཀྲོལ་བའི་མེས་པོ་ཞིག་གིས།

ཁམས་གསུམ་གྱི་འགྲོ་བའི་ལྐུགས་ཁ་འབྱེད་པས་ཁྱེད་གནའ་སྔ་མོ་སྔ་མོ་ཞིག་ནས་དུང་གི་ཚེམས་བར་ནས་འཁྲུངས་ཟེར།

ཀ་ཁ་ག་ང།

ཡུལ་ཞང་བོད་ན་ཁ་འབབ་རྣམ་བཞིའི་བཞུར་རྒྱུན་བཞིན་ཚེ་སྲོག་གི་དམུ་ཐག་མ་ཆད་ཅིང་།

ཁྱེད་ཀྱི་དབྱངས་རྟ་ལས།

མེས་པོ་ཚོའི་སློབ་གསོ་ཡི་རོལ་དབྱངས་རེ་རེ་ན་སོན་པས།

མི་རིགས་ཤིག་གི་གཅེས་ཕྲུག་ཚོའི་ངག་རྟའི་མཛེས་པ་མཆེད་ཡོད།

ཀ་ཁ་ག་ང།

གཤེན་རབ་མི་བོ་ཡིས་རྔ་ཞིག་བརྡུང་པས།

ཁྱེད་ཀྱི་ཟུང་ཁྲག་ལ་ཁ་སྣོན་བྱས་ཤིང་།

ཕྱྭ་ཟ་ངང་འབྲང་མས་གཤང་ཞིག་དཀྲོལ་བས།

ཁྱེད་ཀྱི་རང་གཤིས་ལ་མཛེས་ཉམས་ཀྱིས་ཕྱུག

ཀ་ཁ་ག་ང།

རི་ཏི་སེ་ལྷུན་པོའི་གངས་རླུང་གིས་དེད་པའི་མཚོ་མ་པང་གི་རླབས་སྒྲ་བཞིན་སྙན་འཇེབས་ཀྱིས་མཚོན་ཞིང་།

རྣམ་ཐར་གྱི་རི་མོ་ཡང་ལས་རླུང་གི་རྒུད་པ་ཞི་བས་ཡར་ཆབ་གཙང་པོའི་བཞུར་རྒྱུན་བཞིན།

མི་རིགས་འདིའི་ཕྱི་རབས་པ་ཞིག་གི་ངག་རྟ་ལས་གསོན་ཤུགས་རྒྱས་ནས།

མ་འོང་པའི་ཁྲི་ལོ་དུ་མར་མཚན་སྙན་གྱི་གཟི་བརྗིད་འབར་ཞིང་།

ང་དང་ཁྱེད་ཚོའི་རེ་བ་དང་ཡིད་ཆེས་ཀྱི་ཀློང་ནས་དུས་ནམ་ཡང་རྒྱལ་ཁ་ཞིག་གི་དཔལ་དུ་སྨོན།

སྙན་ངག་གྱེར་འདོན་གྱི་བྱེད་སྒོའི་སྐབས་སུ་ཀོ་རྒྱལ་བོན་གྱི་གླིང་ནས།