དུས་གློ་བུར་བའི་གོད་ཆག
ཡུལ་མཆོག་གནས་བཞིའི་ཐུགས་རྗེས་མཁྱེན་གཟིགས་སམ།།
དུས་ངན་འགྱུར་བ་བྱུང་བའི་སུམ་མདོ་འདིར།།
དཀར་ནག་སེར་གསུམ་འབངས་མའི་སྐྱབས་མགོན་ཉིད།།
གློ་བུར་མི་ཡུལ་འདི་ནས་གཟིམ་འདི་ཅི།།
ཉིད་ཀྱི་གསང་གསུམ་གདུལ་བྱ་བྱེ་བ་ཡི།།
བསོད་ནམས་མཚོ་ཡི་ཆུ་ཐིག་སྐམ་སོང་ངམ།།
ཡང་ན་སྐུ་ཚེའི་མཛད་པ་རྫོགས་པ་ཡིན།།
གང་ལྟར་གོད་ཆག་འདི་ནི་འཇིགས་སུ་རུང་།།
ཁྱེད་ཉིད་མི་ཡུལ་འདི་དང་གྱེས་འགྲོ་བའི།།
བསམ་པ་ཙམ་གྱི་སྟ་གོན་མེད་བཞིན་དུ།།
རྐྱེན་ངན་ཞིག་གིས་བར་ཆོད་བྱས་པ་ཡིས།།
གློ་བུར་གཟུགས་སྐུའི་བཀོད་པ་བསྡུས་འདི་ཅི།།
ཟླ་བ་ཇི་བཞིན་འགྲོ་ལ་ཐུགས་བརྩེ་བའི།།
དུས་ཙེ་བྱེ་མའི་འཁོར་ཚོགས་གཞོམ་པའི་གཉེན།།
དབལ་གཤེན་མི་ཡི་གར་དུ་ཆེས་རོལ་བའི།།
རྗེ་གཅིག་གཤེགས་འདི་སུ་ཡི་བཀོད་སྒྲིག་ལགས།།
ཤར་ཕྱོགས་ཉི་འོད་རི་རྩེར་ཕོག་མ་ཐག །
ཁོ་བོའི་སྒྲ་འཛིན་རྣ་བའི་གསང་ལམ་དུ།།
གོ་ཆག་ཞིག་གི་གནས་ཚུལ་ཐོས་ཙམ་གྱིས།།
ཐེ་ཚོམ་རེ་རེས་མིག་མཐར་མཆི་མས་བརླན།།
འདུས་སྡེ་བརྒྱ་འཚོགས་བྱས་པའི་གྲལ་དཀྱིལ་ནས།།
གྲྭ་རྐྱང་འགའ་ཞིག་ངུ་ངག་འབྱིན་བཞིན་དུ།།
སྨོན་ཚིག་དབྱངས་རྟ་མགྲིན་ནས་བསྐྱོན་པ་ཡིས།།
ཁོ་བོ་ན་ཟུག་སྟོང་གིས་ཡང་ཡང་མནར།།
དེ་ལྟའི་གོད་ཆག་བྱུང་བའི་ཉིན་འགའ་ཞིག །
གདུང་རྟེན་མཇལ་ཁ་ཞུ་བའི་གོ་རིམ་བར།།
འདུས་པའི་སྡེ་སོགས་གདུལ་བྱའི་སློབ་འབངས་ཀུན།།
ཀྱེ་མ་ངུ་དང་བརྒྱལ་བའི་རྣམ་ཐར་མོད།།
འགྲོ་ཁམས་སྡུག་ལ་སྤྱར་བའི་ཉིན་ཞིག་ཏུ།།
གཤེན་སྨྱུག་ཟུག་ངུ་སྟོང་གིས་མནར་བཞིན་དུ།།
སེམས་སྡུག་ཀློང་གི་དབུགས་རིང་རེ་རེ་ཡིས།།
བཅོས་མིན་མྱང་བྱང་འདིར་ལྟར་སྨྲས་ནས་ཡོད།
2012—4—4ཉིན།
- ཟིན་ཐོ་གོང་མ།གཤེན་སྨྱུག་གི་རྩོམ་དེབ་ཁེར་རྐྱང་གི་རོལ་དབྱངས་དང་འབྲེལ་བའི་གནས་ཚུལ།
- ཟིན་ཐོ་འོག་མ།སྒྲ་བླའི་བསང་གསོལ་ལས་འཕྲོས་པའི་སྐད་ཆ།
གཡུང་དྲུང་གཙུག་ཕུད་ལ་བཀྲ་ཤིིས་བདེ་ལེགས་ཞུཞུ
གོད་ཆག ངའི་སེམས་ཀྱི་ཟབ་ས་སྨིན་པའི་ན་ཟུག་ཁེར་འགྲོ། བཟོད་དཀའ་ཞིང་ཐེག་དཀའ་བའི་ངའི་རྨི་ལམ་རབ་རིབ། ངས་ཟློག་མི་ཐུབ་པའི་དད་གུས་ཤིག་ཁོང་ལ་བཅོས་མིན་དུ་བཞག་ཡོད། རྒྱུ་མཚན། གཡུང་དྲུང་བོན་གྱི་བཤད་སྒྲུབ་སློབ་གླིང་ཞིག་སྟོགས་དང་ལྡན་པའི་སྒོ་ནས་བཙུགས་ཡོད་པས་རེད། ཡིན་ན་ཡང་ཁོང་འདི་ལྟར་ཕེབས་སོང་། དད་གདུང་གི་ངང་ནས་བོན་ནག་ཚང་གིས་ཕུལ།ཁྱེད་ནམ་ཡིན་ཡང་བདག་གི་རྩོམ་ཡིག་ཡག་སྡུག་ལ་མ་ལྟོས་པར་གཟེགས་མཛད་པར་བཀའ་དྲིན་ཆེ། མཆེད་གྲོགས་གཙང་ཚྭ་བ། གཤེན་བཙུན་སྨྱུག་ཐོག་པས།