བརྒྱད། དཔེ་ངོས་ཀྱི་རིག་གནས་ཆུ་ཚད་ནི་རིག་གནས་ཆུ་ཚད་ཧྲིལ་བོ་མིན། 

          དཔེ་ཆ་ནི་འཚོ་བ་ལས་བྱུང་ཞིང་མིའི་རིགས་ཀྱི་འཚོ་བའི་ཀློང་གི་དགའ་སྐྱོ་ཆགས་སྡང་དང་།  གཞོམ་གཞིག་བྲལ་བའི་ཤེས་རབ།  ཉམས་མེད་གཟི་བྱིན་འབར་པའི་སྙིང་སྟོབས།  ཕུན་ཚོགས་གྱ་ནོམ་གྱི་འཆར་ཡན་སོགས་ཡི་གེའི་གཟུགས་སུ་ཤར་བའི་ཟད་མེད་གྱི་ལོངས་སྤྱོད་ཅིག་ཡིན།  སུ་ཞིག་གིས་དཔེ་ཆ་ཀློག་པ་ནི་འོད་ཟེར་གྱི་མིག་ཟུང་འཚོལ་བ་ཡིན་ལ།  བླ་མེད་ཀྱི་སྐྱེས་ཆེན་དག་ལ་བར་ཐག་གང་ཡང་མེད་པར་གླེང་མོལ་བྱེད་པ་ཡིན། དེ་བས་དཔེ་ཆ་ནི་ལམ་སྟོན་གྱི་སྒྲོན་མེ་དང་། དཔེ་ཆ་ནི་ཕུན་ཚོགས་ཀུན་སྣང་གི་མེ་ལོང་ཆེན་པོ་ཞིག་ལགས།

ཡང་འཚོ་བ་དང་དཔེ་ཆའི་འབྲེལ་བ་ནི་རྒྱུ་དང་འབྲས་བུའི་འབྲེལ་བ་ཡིན་ལ།  རྟེན་དང་བརྟེན་པའི་འབྲེལ་བའམ། ཡང་ན་མཚོན་བྱ་དང་མཚོན་བྱེད་གྱི་འབྲེལ་བའང་རེད།   དེ་ན་ང་ཚོས་འདི་ལས་ཤེས་པ་ནི་འཚོ་བ་དང་དཔེ་ཆའི་འབྲེལ་བ་ནི་གཅིག་ལ་གཅིག་བརྟེན་ཏུ་གནས་པ་ལས་ཁ་བྲལ་སོ་སོར་འཛིན་རུང་བ་ཞིག་གམ། དཔེ་ཆ་ནི་རིག་གནས་ཡོད་ཚད་ཀྱི་གན་མཛོད་དང་དགོས་འདོད་ཀུན་འབྱུང་གི་ནོར་བུ་ཞིག་ཏུ་བརྩི་རུང་བ་ཡང་མ་ཡིན་ཏེ། དཔེ་ཆའི་ཉིང་དགོས་ནི་འཚོ་བའི་ངོས་འཛིན་ལ་རམ་འདེགས་ཞུ་བ་ལས།  འཚོ་བའི་ངོས་འཛིན་གྱི་ཚབ་བྱེད་མི་རུང་ལ།  དཔེ་ཆ་ནི་མིའི་རིགས་ཀྱི་ཤེས་རབ་མངོན་ཚུལ་མི་འདྲ་བ་རེ་རེ་ཙམ་ལས། དུས་གསུམ་གྱི་འཚོ་བའི་ངོས་འཛིན་གྱི་ལུང་བསྟན་དང་འཚོ་གནས་ཐག་གཅོད་ཀྱི་བཀའ་རྒྱ་གང་ཡང་མིན་པར་གསུངས་པས་སོ།།

          དེ་ན་དཔེ་ཆ་ལས་འཚོ་བ་རྒྱ་ཆེ་ཞིང་དཔེ་ཆ་ལས་འཚོ་བ་གཏིང་ཟབ་པས།  འཚོ་བ་ནི་ནམ་མཁའ་ཡིན་ན་དཔེ་ཆ་ནི་སྐར་ཚོམ་དང་། འཚོ་བ་ནི་རྒྱ་མཚོ་ཡིན་ན་དཔེ་ཆ་ནི་དེ་ལས་བྱུང་བའི་གཡུ་བྱུར་དང་མུ་ཏིག་རེད། དེའི་ཕྱིར་ང་ཚོས་དཔེ་ཆའམ་ཡི་གེ་སློབ་པ་ནི་འཚོ་གནས་ཀྱི་ཆེད་དུ་ཡིན་པ་དང་། དཔེ་ངོས་རིག་གནས་ཀྱི་ཡང་སྙིང་སློབ་པ་ཡང་འཚོ་བའི་ངོས་འཛིན་ལ་ངར་ལྡུད་པ་དང་འཚོ་གནས་རིན་ཐང་གི་སྟོབས་སྐྱེད་པའི་ཆེད་ཡིན་པ་ངང་གིས་གྲུབ་ཅིང་། དཔེ་ཆ་སློབ་པའི་དགོས་པ་ཡང་དཔེ་ཆའི་སྟེང་ན་མེད་པར་འཚོ་བའི་སྟེང་དུ་གནས་པ་གསལ་ཐག་ཆོད་པ་རེད།

ཡིན་ནའང་ང་ཚོའི་སློབ་གསོའི་འཐབ་ཕྱོགས་སྟེང་ན་དཔེ་ཆ་གཙོ་བོར་འཛིན་པ་ལས་འཚོ་བ་གཙོ་བོར་འཛིན་པའི་སྣང་ཚུལ་ཧ་ཅང་ཞན་སྟེ།  སྤྱིར་དཔེ་ཆའི་ནང་དོན་འཚོ་བ་ལས་འདའ་ཐབས་མེད་ནའང་དཔེ་ཆའི་ནང་དོན་གྱིས་འཚོ་བ་ལེགས་བཅོས་ལ་ནུས་པ་ཐོན་གྱིན་མེད་ལ། སློབ་གྲྭ་མང་ཆེ་བས་དེ་ལ་སྣང་འཇོག་ཀྱང་ཆེར་བྱེད་ཀྱིན་མེད། དཔེར་ན་སློབ་མའི་དཔེ་དེབ་ལས་《རང་བྱུང》དང་《དངོས་ལུགས》《རྫས་འགྱུར》《སྐྱེ་དངོས》སོགས་མིའི་འཚོ་བ་ལ་ཐད་ཀར་ནུས་པ་ཐོན་པའི་ཚན་རྩལ་རང་བཞིན་གྱི་བསླབ་བྱ་ཁག་སློབ་ཚན་དུ་བཀོད་སྒྲིག་གིས་ཁྲིད་སྦྱོང་བྱེད་ཀྱིན་ཡོད་ནའང་། དེ་དཔེ་ངོས་ཀྱི་ནང་དོན་དང་རི་མོ་ཙམ་གཙོ་བོར་འཛིན་པ་ལས་ཚོད་ལྟ་ལག་ལེན་བྱས་པ་ཧ་ཅང་ཉུང་ཞིང་དཔེ་ཆ་བསླབས་ཚར་བ་མ་ཟད་རྒྱུགས་འབྲས་ཀྱང་ཡིན་ཚིམས་པ་བྱུང་ཡང་དངོས་ཡོད་འཚོ་བའི་གནད་དོན་ལ་སྐོར་ཚེ་ཅི་ཡང་མི་ནུས་ལ་གང་ཡང་མི་ཤེས་པའི་གནས་སུ་གྱར་ཡོད།  དེ་ནི་མཐར་གཏུག་ན་རྒྱུགས་གཉེར་སློབ་གསོའི་ཞན་ཆ་ཆེན་པོ་ཞིག་དང་།  རྒྱུགས་འབྲས་ནི་རིག་གནས་ཆུ་ཚད་ཀྱི་སྡོམ་དུ་རྩིས་པའི་ནག་ཉེས་རིགས་ཤིག་རེད།

དེའི་ཕྱིར་ངས་འདི་ནས་དཔེ་ངོས་རིག་གནས་ནི་རིག་གནས་ཡོད་ཚད་མིན་ལ། དཔེ་ངོས་ནས་ཐོབ་པའི་རིག་གནས་ཆུ་ཚད་དེ་ཡང་རིག་གནས་ཆུ་ཚད་ཧྲིལ་བོ་མིན་ཞེས་བརྗོད་པ་ཡིན་ཏེ་དཔེ་ངོས་གཞུང་ལུགས་ཀྱི་ཆུ་ཚད་མཐོ་ཡང་ལག་ལེན་མི་འཁྱོངས་བ་དང་།  ལག་ལེན་ལ་མཁས་ཀྱང་གཞུང་ལུགས་མི་མཁྱེན་པ། དེ་གཉིས་གར་བྱང་བ། གཉིས་གའི་གང་ཡང་མི་འཇོན་པའི་མི་ནི་ང་ཚོའི་དངོས་ཡོད་འཚོ་བའི་ཁྲོད་རྒྱུན་ཏུ་མཐོང་བས། ང་ཚོས་དཔེ་ཆ་སྦྱོང་བ་དང་ང་ཚོས་འཚོལ་སྙེག་བྱེད་པ་ནི་དེ་གཉིས་ཀར་མཁས་པ་ཞིག་བྱེད་རྒྱུ་དེ་ཡིན། དེ་ལྟར་བྱེད་ནུས་ན་ད་གཟོད་འཚོ་གནས་ལ་སྙིང་བོ་བསྐྱེད་ཐུབ་པ་མིན་ནམ།

མདོར་ན་དཔེ་ངོས་རིག་གནས་ནི་རིག་གནས་ཕྱེད་ཀ་དང་ལག་ལེན་ཉམས་མྱོང་ནི་རིག་གནས་ཕྱེད་ཀ་སྟེ། དེ་གཉིས་གཞི་གཅིག་ཏུ་སྦྱར་བས་ད་གཟོད་འཚོ་གནས་སྙིང་བོ་བསྐྲུན་པའི་རིག་གནས་ཧྲིལ་བོ་ཞིག་འབྱུང་བར་འདོད་དོ།།