བདུན། རྒྱུགས་འབྲས་ནི་སློབ་མའི་སྤུས་ཚད་ཀྱི་བསྡོམས་གྲངས་མིན།
རྒྱུགས་ནི་སློབ་གསོའི་ལས་དོན་ཁྲོད་ཀྱི་བྱེད་ཐབས་ཁྱད་པར་བ་ཞིག་དང་། རིག་གནས་ཁྱབ་གདལ་ཏུ་གཏོང་བའི་བྱ་བཞག་ལ་ནུས་པ་གལ་ཆེན་ཐོན་པའི་སྒུལ་ཤུགས་གཞན་དང་མི་མཚུངས་པ་ཞིག་སྟེ། གནའ་ནས་ད་ལྟའི་བར་དུ་རྒྱུགས་འབྲས་གྱི་རྒྱལ་ཁ་དེས་དགེ་སློབ་རྣམས་ལ་སྔར་མེད་གྱི་སྤོབས་པ་དང་མདུན་བསྐྱོད་ཀྱི་སྤྲོ་སྣང་རབ་དང་རིམ་པར་སྦྱིན་ཞིང་། རྒྱུགས་འབྲས་ཀྱི་ཕམ་ཁ་དེས་དགེ་སློབ་གྲངས་མེད་ཅིག་ལ་ཕྱིར་རྟོག་དང་བཅོས་སྒྱུར། བདེན་འཚོལ་བཅས་ཀྱི་ལམ་བུ་གསར་བ་ཞིག་ཡང་དང་ཡང་དུ་ཕྱེས་པ་རེད། དེ་བས་རྒྱ་ནག་ལ་མཚོན་ན་རྒྱུགས་སྤྲོད་ལམ་ལུགས་དེ་བཀས་བཀོད་རྒྱུད་འཛིན་གྱི་རྒྱལ་རབས་མང་བོ་ཞིག་བརྒྱུད་དེ་ད་ལྟའི་དུས་རབས་གསར་བའི་ནང་དུ་ཡང་ད་དུང་བརྟན་པོར་གནས་ཤིང་། སློབ་གསོའི་ཁྱབ་ཁོངས་ལས་གཞན་སྲིད་དོན་དཔོན་འདེམས་ཀྱི་ལམ་ལུགས་ཁྲོད་དུའང་གནའ་སྔ་མོ་དང་འདྲ་བར་བེད་སྤྱོད་གནང་དང་གནང་མུས་སུ་ཡོད།
དྲང་ཕྱོགས་ནས་བཤད་ན་རྒྱུགས་སྤྲོད་ཀྱི་ཤེས་རྟོགས་ལ་ཚོད་བགམ་བྱེད་ཐུབ་ཅིང་། རྒྱལ་ཕམ་ཐག་གཅོད་ཀྱི་སྙིང་སྟོབས་སོགས་ལ་སྦྱོང་བརྡར་ཡང་གཏོང་ཐུབ་པ་རེད། ཡིན་ནའང་རྒྱུགས་འབྲས་ནི་བསླབ་འབྲས་ཡོད་ཚད་ཀྱི་སྡོམ་ལྟ་བུར་འཛིན་པ་ནི་ནོར་འཁྲུལ་གྱི་བསམ་བློ་ཞིག་རེད། ང་ཚོ་བོད་ཁུལ་གྱི་ཞིང་འབྲོག་མང་ཚོགས་ཕར་ཞོག་ཐ་ན་སློབ་གསོའི་བྱ་བ་སྒྲུབ་བཞིན་པའི་དགེ་རྒན་དག་ལ་མཚོན་ནའང་བྱིས་པའི་བཟང་ངན་སྐར་མ་ཁོ་ནས་འབྱེད་ཅིང་སྐར་མའི་གྲངས་ཀ་ཁོ་ནར་མཐོང་ཆེན་བྱེད་པ་རེད། དེ་ནི་སྤྱི་ནས་བཤད་ན་རྒྱུ་མེད་རྐྱེན་མེད་དུ་བྱུང་བའི་བསམ་བློའི་འཛིན་སྟངས་ཤིག་མ་ཡིན་པར་ཀྲུང་གོའི་རྒྱུགས་སྤྲོད་ལམ་ལུགས་ལས་མཆེད་པའི་ནད་ཡམས་རིགས་ཤིགས་རེད། རྒྱལ་ཁབ་འདིར་མཚོན་ན་གཙོ་བོ་མཐོ་རྒྱུགས་ནི་མི་ཞིག་གི་མི་ཚེ་ཧྲིལ་བོའི་བདེ་སྡུག་ཐག་གཅོད་ཀྱི་འགག་འཕྲང་ཞིག་ཏུ་གྱུར་ཡོད་ལ། སྐར་མ་ནི་འགག་འཕྲང་དེ་བདེ་བར་བརྒལ་བའི་གཤོག་པ་ལྟ་བུ་རེད། དེས་ན་གང་ཞིག་འོད་ཟེར་མཐོང་འདོད་པ་དང་འཛུམ་མདངས་ལ་རོལ་འདོད་པ་ཞིག་ཡིན་ན་ངེས་པར་ཏུ་གཤོག་པ་ལྟ་བུའི་སྐར་མ་དེ་བརྩོན་ལེན་བྱེད་དགོས་པར་གྱུར་བ་རེད། ངོ་མ་བཤད་ན་འཇིག་རྟེན་འདིར་མུན་ནག་དང་འོ་དོད་ཀྱི་འཚོ་བ་རོལ་འདོད་མཁན་དུ་ཡོད། གཅིག་ཀྱང་མེད་པས་ན་ཕ་མ་དགེ་སློབ་ཀུན་གྱིས་འགག་འཕྲང་སྣ་ཚོགས་བརྒལ་ཐབས་སུ་སྐར་མ་ལ་མཐའ་གཅིག་ཏུ་མཐོང་ཆེན་དང་། དེ་ཉིད་ལ་ཉིན་མཚན་དུས་དྲུག་ཏུ་བརྩོན་ལེན་བྱེད་ཅིང་། ཚང་མའི་སྣང་ངོར་སྐར་མ་ནི་སློབ་མའི་གྲུབ་འབྲས་ཡོད་ཚད་ཀྱི་སྡོམ་ལྟ་བུར་གྱུར་བ་རེད། ཚུལ་དེ་ནི་དེང་སྐབས་མི་མང་བོ་ཞིག་གིས་སྒོར་མོ་ནི་ཡོད་ཚད་ཡིན་ལ་སྒོར་མོ་ཡོད་ན་ཡོད་ཚད་ཡོད་པར་འདོད་པ་དང་ཡོངས་སུ་མཚུངས་མོད། དོན་དངོས་སུ་དེ་འདྲ་ཞིག་མ་ཡིན་ཏེ། ཚོད་ལྟའི་རྒྱུགས་ཆུང་དང་བར་རྒྱུགས། སྤྱི་རྒྱུགས། མཐོ་རྒྱུགས། མཐར་ཕྱིན་རྒྱུགས་སོགས་རྒྱུགས་གཞི་ཆེ་ཆུང་གང་ཡིན་ཡང་ཚང་མའི་དམིགས་ཡུལ་གཙོ་བོ་བསླབས་ཟིན་པའི་ཤེས་བྱའི་རྟོགས་ཚད་ལ་ཚད་འཇལ་ཅིག་བྱེད་པར་འདོད་པ་དེ་རེད། དེ་ན་རྒྱུགས་གཞིའི་སྟེང་ནས་སློབ་མའི་གསར་གཏོད་ཀྱི་ཁྱད་ནུས་དང་བསམ་བློའི་ཆུ་ཚད། ཀུན་སྤྱོད་སྤུས་ཚད་དེ་ཡོད་འཕྲོག་གི་གཤིས་ཀ་དང་སྙན་འཇེབས་ཀྱི་ངག་ཚིག མཐུན་སྒྲིལ་གྱི་སྙིང་སྟོབས། རྣམ་དཀར་གྱི་ཀུན་སློང་། གཞན་ཕན་གྱི་ལྷག་བསམ། འཚོ་བར་བཅིངས་བའི་དགའ་ཞེན་སོགས་མི་ལ་མཁོ་གལ་ཆེ་ཞིང་མི་ལ་རང་ཆས་སུ་མངའ་བའི་འཇོན་ཁྱད་མང་བོ་ཞིག་ཇི་བཞིན་དུ་འཇལ་ཐབས་མེད་ལ། དེ་བཞིན་དུ་རྒྱུགས་གཞི་གཅིག་གམ་རྒྱུགས་ལེན་ཐེངས་གཅིག་གིས་བསླབས་ཟིན་པའི་རིག་གནས་ཆུ་ཚད་ཧྲིལ་བོ་ཇི་མ་ཇི་བཞིན་དུའང་འཇལ་ཐབས་མེད་དེ། རྒྱུགས་གཞི་ལ་རྣམ་པ་དང་ནང་དོན། མང་ཉུང་། དུས་ཚོད་སོགས་གྱི་ཚད་བཀག་ཧ་ཅང་མང་བས། བསླབ་ཟིན་པའི་ནང་དོན་ཚང་མ་རྒྱུགས་གཞི་གཅིག་གི་ནང་དུ་ཤོང་ཐབས་བྲལ་ལ་འཇལ་ཐབས་ཀྱང་དེ་བཞིན་ནོ།།
དེའི་ཕྱིར་སྐར་མ་མཐོ་ཚད་ཐམས་ཅད་སློབ་མ་མཆོག་གྱུར་ཡིན་པའི་ངེས་པ་མེད་ལ། སྐར་མ་དམའ་ཚད་ཐམས་ཅད་སློབ་མ་ཐ་ཤལ་ནུས་མེད་ཅིག་ཡིན་པའི་ངེས་པ་དེ་བས་ཀྱང་མེད་པས། ང་ཚོ་དགེ་སློབ་དང་ཁྱིམ་བདག་ཚང་མས་རྒྱུགས་ནི་འཇིགས་རུང་གི་གཡུལ་ས་ཞིག་ཏུ་བསམ་མི་འོས་ལ། རྒྱུགས་འབྲས་ནི་འབྲས་བུ་ཡོད་ཚད་ཀྱི་སྡོམ་དུ་འཛིན་མི་འོས་ཏེ། ང་ཚོས་རྒྱུགས་ནི་སྦྱོང་བརྡར་གྱི་ར་བ་ཞིག་དང་རྒྱུགས་འབྲས་ནི་སྒུལ་ཤུགས་ཞིག་དང་ཕྱིར་རྟོག་གི་ལམ་བུ་ཞིག་གམ། མདུན་སྐྱོད་ཀྱི་སྟ་གོན་ཞིག་ཏུ་རྩིས་ན་ཤིན་ཏུ་འོས་ལ། གཙོ་བོའི་གཙོ་བོ་ནི་ང་ཚོས་རང་གི་ངེས་དོན་གྱི་སྤུས་ཚད་མཐོར་འདེགས་སྲུང་འཛིན་བྱེད་པ་དེ་རེད།
