སེམས་ཀྱི་གངས་ལྗོངས།­     

   སྟོད་མངའ་རིས་སྐོར་གསུམ་རྫིང་བུ་ཡིན།།

   བར་དབུས་གཙང་རུ་བཞི་ཡུར་བ་ཡིན།།

   སྨད་མདོ་ཁམས་སྒང་དྲུག་ས་ཞིང་ཡིན།།

   གནས་ལྔ་རིག་གསེར་གྱི་ལོ་ཏོག་ཡིན།།

   སྟོད་གངས་དཀར་ཤེལ་གྱི་མཆོད་རྟེན་ཡིན།།

   བར་ཀླུང་ཆེན་དར་གྱི་སྐ་རགས་ཡིན།།

   སྨད་མཚོ་མོ་གཡུ་ཡི་མེ་ལོང་ཡིན།།

   གནས་དགེ་མཚན་འཇའ་འོད་འཁྱིལ་མ་ཡིན།།

   སྟོད་སྤང་དཀར་ཕྱུགས་ཀྱི་ཕ་ས་ཡིན།།

   བར་ནགས་ཀླུང་བྱ་ཡི་ཚང་མལ་ཡིན།།

   སྨད་ས་ཞིང་འབྲུ་ཡི་བང་མཛོད་ཡིན།།

   གནས་བཀྲ་ཤིས་གཡང་གི་མཆོད་པ་ཡིན།།

   སྟོད་ཆོས་སྒར་ལྷ་ཡི་ཕོ་བྲང་ཡིན།།

   བར་འབྲོག་རུ་གནམ་གྱི་སྐར་མ་ཡིན།།

   སྨད་ཁང་ལེབ་ཀ་གདུང་སྦྲེལ་མ་ཡིན།།

   གནས་ཕུན་ཚོགས་བདེ་བའི་འབྱུང་གནས་ཡིན།།

   སྟོད་ས་ལམ་གནམ་གྱི་ཐེམ་སྐས་ཡིན།།

   བར་མི་ཆོས་འཚོ་བའི་རྟེན་ཕུར་ཡིན།།

   སྨད་སྲིད་དོན་འཆི་ཁའི་གསོས་སྨན་ཡིན།།

   གནས་གང་བཟང་ལག་ནང་ནོར་བུ་ཡིན།།

                       2012 . 6 . 30 ཉིན།