རྒན་དཔལ་ལྡན་ཉི་མ་མཆོག་གིས།
༡ གལ་སྲིད་ང་ཚོས་མིའི་རིགས་ཀྱི་དཔལ་ཡོན་ལ་གོ་བ་ཡག་པོ་ལེན་མ་ཐུབ་ན་ང་ཚོས་ཚན་རྩལ་དཔལ་ཡོན་དུ་རློམ་སྲིད། མ་གཞི་དཔལ་ཡོན་ཞེ་ན། ཚེ་སྲོག་གི་ངེས་ཤེས་དང་ཚེ་སྲོག་གི་འབྲེལ་བ་ཐག་གཅོད་ཀྱི་ཐབས་ལ་གོ། དཔལ་ཡོན་ཞེ་ན་དེ་འདྲ་བ་ཞིག་ཡིན་པ་ལས།གནམ་གྲུ་དང་མེ་སྒྱོགས་མིན། ཚེ་སྲོག་གི་འབྲེལ་བ་ཐག་གཅོད་ཡག་པོ་བྱེད་མཁན་ཞིག་ཡིན་ན། དེས་ཚེ་སྲོག་གི་འབྲེལ་བར་ངེས་ཤེས་གཏིང་ཟབ་མོ་བླངས་ཡོད་པ་མཚོན། འབྲེལ་བ་ཐག་གཅོད་ཡག་པོ་ཞེ་ན། ཚང་མ་འདྲ་མཉམ་ཡིན་པ་དང་། ཚང་མ་མཉམ་དུ་བསྡད་པ་སྐྱིད་པོ་ཡིན་པ་ལ་ཡག་པོ་ཟེར། དཔལ་ཡོན་ཞེས་པ་དེ་འདྲ་ཞིག་རེད།
༢ སློབ་གསོ་ནི་དཔལ་ཡོན་ལ་ཞབས་ཞུ་གནང་བྱེད་ཡིན། ཡང་ན་སློབ་གསོ་ནི་མི་དཔལ་ཡོན་ཅན་དུ་བསྒྱུར་བའི་གོ་རིམ་ལ་གོ་ནའང་ཆོག། སློབ་གསོ་ནི་མི་རང་ཉིད་ལ་ཡོད་འོས་པའི་ཐོབ་ཐང་ཞིག་ཡིན་པ་ལས།མི་གཞན་པ་ཞིག་གི་སློབ་གསོ་དང་དུ་ལེན་དགོས་པ་ཞིག་མིན། མི་རང་རང་སོ་སོ་ནར་སོན་པའི་གོ་རིམ་ལ་སློབ་གསོ་ཟེར།ཡང་ན་ཚེ་སྲོག་སྨིན་པའི་གོ་རིམ་ཡོད་ཚད་ལ་སློབ་གསོ་ཟེར་བ་རེད།
༣ སྦྱོང་བརྡར་གྱི་གོ་དོན་དང་པོ་འདུ་ཤེས་ཡིན། སློབ་གསོའི་འདུ་ཤེས་ཐག་གཅོད་ཡག་པོ་མ་ཐུབ་ན་རྩིས་ཐང་མེད་འགྲོ། གལ་སྲིད་མི་སོ་སོས་རང་ཉིད་ཀྱི་རྩིས་ཐང་ངོས་མ་ཟིན་ན། སོ་སོས་རང་ཉིད་ཀྱི་ཚེ་སྲོག་གི་རིན་ཐང་མི་ཤེས། ཚེ་སྲོག་སུ་ལ་དབང་བ་རེད། རང་ལ་དབང་བ་རེད་དམ། ཡང་ན་མི་གཞན་པའམ་ཚོགས་པ་ཞིག་ལ་དབང་བ་རེད།
༤ ང་ཚོས་བཤད་པའི་འདྲ་མཉམ་ཞེས་པ་ལུས་ཀྱི་འདྲ་མཉམ་ཞིག་མིན།ལུས་པོ་འདྲ་མཉམ་ཡོང་ཐབས་མེད། རྟེན་དང་། མི་རིགས། གཟུགས་ཀྱི་རིང་ཐུང་། ཚོ་རྗུད། ངོ་གདོང་སོགས་འདྲ་མཉམ་ཡོང་ཐབས་ཤིག་མེད། འདྲ་མཉམ་ངོ་མ་ནི་རྩིས་ཐང་འདྲ་མཉམ་ཡིན་དགོས། མི་ཞིག་ཡིན་པའི་འདང་རྩིས་འདྲ་མཉམ་ཡིན་དགོས།
༥ སྲིད་གཞུང་གིས་སློབ་གསོ་ལ་དཔལ་འབྱོར་ལྟར་འབྲས་བུ་མྱུར་ཏུ་ཐོན་དགོས་པར་འདོད་ཀྱི་ཡོད། དེ་ནི་ས་གནས་འགོ་ཁྲིད་ཀྱི་མགོ་ན་བྱེད་གཙོ་བོ་རེད། གལ་སྲིད་ད་ལོའི་མཐོ་རྒྱུགས་བཟང་པོ་མིན་པ་དང་། སང་ལོ་ཡང་དེ་ལྟར་ཡིན་ན་འགོ་ཁྲིད་ལ་དཀའ་ངལ་མང་པོ་འབྱུང་སྲིད། རྒྱ་ནང་གི་དཔལ་ཡོན་ལ་ཉམས་རྒུད་ཧ་ཅང་ཆེ་བའི་རྒྱུ་མཚན་གཙོ་བོ་དེ་ན་ཡོད། རྒྱ་ནང་གི་མི་རྣམས་ལ་བརྩེ་བ་མེད་པ་དང་། གཞན་ལ་སེམས་ཁུར་མི་བྱེད་པ་སོགས་མང་པོ་ཞིག་མཐོ་རྒྱུགས་དང་འགྲན་རྩོད་ཁོ་ན་ལ་བསྙེགས་པའི་འབྲས་བུ་རེད།
