དྲུག ཕ་མས་བྱིས་པར་ཚད་བརྒལ་གྱི་རེ་བ་བཅང་མི་རུང་།
བྱིས་པ་ནི་མ་འོངས་པ་ཡིན། མི་རིགས་ཕར་ཞོག་ཁྱིམ་ཚང་ཞིག་གི་རྒྱུན་དེ་ཡུན་རིང་དུ་གནས་ཐུབ་མིན་དང་འཕེལ་རྒྱས་འབྱུང་མིན་བྱིས་པ་དག་ལ་རགས་ལས་ཤིང་། ཡབ་མེས་གྱི་ཤུལ་བཞག་རིག་གནས་འཛིན་སྐྱོང་སྤེལ་གསུམ་བྱེད་མིན་ཡང་ཐད་ཀར་བྱིས་པའི་སྤུས་ཚད་ལ་རགས་ལས་པ་རེད། དེའི་ཕྱིར་རང་གི་ཁྱིམ་གཞིའི་གལ་ཆེན་རང་བཞིན་མཐོང་མཁན་ཞིག་གམ་རང་གི་མི་རིགས་ཀྱི་ནོར་བུའི་ནོར་ངོ་ཆོད་པའི་མི། ལྷག་པར་དུ་དུས་ཀྱི་འཁོར་ཕྱོགས་དང་འབྱུང་འགྱུར་མཐོང་མཁན་ཞིག་ཡིན་ཚེ། ཅིས་ཀྱང་རང་གི་བྱིས་པ་ཆུང་དུས་ནས་དྲང་ལམ་དུ་འཇུག་པ་དང་། བྱིས་པ་ཁྱིམ་ཚང་དང་ཕ་ཡུལ། མི་རིགས། རིག་གནས། འཚོ་བ་བཅས་ལ་དགའ་སྣང་ལྡན་ཞིང་དུངས་ཞེན་ཆེ་བ་ཞིག་ཏུ་བསྐྱེད་ཅིང་བསྲིང་བ་དེ་ཤིན་ཏུ་ནས་གལ་ཆེ་བ་རེད། ཡིན་ནའང་ཁྱིམ་བདག་རྣམས་ཀྱིས་བྱིས་པར་ཚད་བརྒལ་གྱི་རེ་བ་བཅངས་མི་རུང་།
འདིར་གླེང་བའི་ཚད་བརྒལ་གྱི་རེ་བ་ཞེས་པ་ནི་ཕ་མས་རང་གི་ཉམས་མྱོང་དང་རིག་གནས་ཆུ་ཚད། བསམ་བློའི་གོ་རྟོགས། མི་ཚེའི་ལྟ་ཚུལ་སོགས་ཚད་གཞི་དང་རྒྱུ་མཚན་ཙམ་དུ་བཀོད་དེ་བྱིས་པར་ངེས་པར་དུ་བསླབ་བྱ་ཚང་མར་སྐར་མ་བརྒྱ་ལེན་དགོས་པ་ལྟ་བུ་དང་། ཅིས་ཀྱང་འཛིན་གྲྭའི་ཡང་རྩེར་འབུད་དགོས་པ་ལྟ་བུ། ངེས་པར་མི་དེ་ལྟ་བུ་ཞིག་འཁྱོངས་དགོས་ལ་བྱ་བ་འདི་འདྲ་ཞིག་རེག་དགོས་ཟེར་བ་ལྟ་བུའི་རེ་བ་འདོན་པ་ལ་ཟེར་ཞིང་། རེ་བ་དེའི་རིགས་ཀྱིས་བྱིས་པའི་ལྷན་སྐྱེས་ཀྱི་འཇོན་ཚད་དང་། དངོས་ཡོད་ཆུ་ཚད། དགའ་ཁ་ཁྱེར་ཕྱོགས་སོགས་ཡན་པོར་བོར་ཞིང་རྩིས་མེད་དུ་བཏང་བས་ཐད་ཀར་བྱིས་པའི་སེམས་ལ་གནོན་ཤུགས་མི་ཉུང་བ་གཏོང་བའི་ཁར། བྱིས་པས་ནམ་ཡང་ཁྱིམ་བདག་གི་རེ་བས་ཁེངས་པའི་སེམས་ཁམས་མཐོང་མི་ཐུབ་ལ། ཐ་ན་རང་གི་སེམས་ཁམས་བདེ་འཇགས་སྲུང་འཛིན་གྱིས་བསླབ་འབྲས་གཡུར་དུ་ཟ་བ་ལེན་པར་ཡང་བར་ཆད་དང་རྐྱེན་ངན་འབྱུང་། སྐབས་འགར་ཁྱོད་ཀྱིས་བཏོན་པའི་རེ་བ་དེ་འགྲུབ་སྲིད་པ་ཕར་ཞོག་མི་གཤིས་ཇེ་སྡུག་དང་འཚོ་བར་སྤྲོ་སྣང་མེད་པར་འགྱུར་ཞིང་། ཁྱོད་ཀྱི་བློ་ཡུལ་དུ་མི་འཁོར་བའི་སྣང་ཚུལ་སྐྱོ་བོ་རེ་མི་འབྱུང་བའི་ངེས་པའང་མེད་དོ།།
དེའི་རྒྱུ་མཚན་ནི་བྱིས་པ་ལ་བྱིས་པའི་ལོ་ཚོད་ཅིག་དང་ལོ་ཚོད་དེ་དང་མཐུན་པའི་བསམ་བློ་རེ་དང་ནུས་པ་རེ་ཡོད་ཅིང་། ཁྱིམ་བདག་ལ་ཁྱིམ་བདག་གི་ལོ་ཚོད་རེ་དང་དེ་དང་མཐུན་པའི་ཉམས་མྱོང་དང་ཆུ་ཚད། སྙིང་སྟོབས་དང་ནུས་པ་རེ་ཡོད་པས། ཁྱིམ་བདག་གི་ལོ་ཚོད་དང་འཇོན་ཐང་། སེམས་ཤུགས་སོགས་ནི་བྱིས་པའི་ལོ་ཚོད་དང་ནུས་ཚད་སོགས་དང་འདྲ་ས་མི་འགྲོ་ལ། དུས་ཚོད་ཐུང་ངུའི་ནང་བྱིས་པ་མང་ཆེ་བ་ཁྱིམ་བདག་གི་ཚད་བརྒལ་གྱི་རེ་བའི་སྟེང་སླེབས་ཐབས་ཀྱང་མེད། སྣང་ཚུལ་འདི་ནི་གལ་ཏེ་ཁྱིམ་བདག་རྟ་ཞིག་ཡིན་པའི་དབང་དུ་བཏང་ན་བྱིས་པ་ནི་རྟེའུ་ཞིག་ཡིན་ལ། ཁྱིམ་བདག་གི་འཆར་གཞི་ནི་རྟེའུ་རྟ་རྗེས་མི་ཆོད་ཀྱང་རྗེས་སུ་ལུས་མི་ཆོག་ཅེས་ཨུ་ཚུགས་བྱེད་པ་དང་འདྲ་ཞིང་། ཡང་ཁྱིམ་བདག་གཡག་ཅིག་ཡིན་པར་བྱས་ཚེ་བྱིས་པ་ནི་བེའུ་ཞིག་སྟེ་ཁྱིམ་བདག་གི་ཚད་ལས་བརྒལ་བའི་རེ་བ་ནི་མཛོ་ཁལ་ཧྲིལ་བོ་ཞིག་མི་ཐེག་རུང་ཕྱེད་ཀ་ཐེག་དགོས་ཟེར་བ་དང་ཀུན་ནས་མཚུངས་པས་སོ།།
དེ་བས་ན་ང་ཚོ་ཁྱིམ་བདག་སུ་ཡིན་རུང་བྱིས་པར་གཅེས་སྐྱོང་བྱེད་པའི་འོས་འགན་ཡོད་ཅིང་། ང་ཚོས་བྱིས་པ་ལ་སློབ་གསོ་གཏོང་བ་དང་སློབ་སྦྱོང་གི་ཁོར་ཡུག་དང་ཆ་རྐྱེན་བཟང་བོ་བསྐྲུན་དགོས་པའི་ཁར། དེ་ལ་འོས་མཐུན་བབ་འགྲིག་གི་རེ་བ་འཛིན་རྒྱུ་དེ་ཡང་བྱིས་པ་རྣམས་ཡང་དག་པར་འཚར་ལོངས་འབྱུང་བ་ལ་མེད་དུ་མི་རུང་བའི་ནང་གི་ཆ་རྐྱེན་ཞིག་ཡིན་ནོ།།
