ལྔ། བྱིས་པར་ཆུང་དུས་ནས་དུས་ཚོད་ཀྱི་འདུ་ཤེས་ཆགས་སུ་འཇུག་དགོས།
འབྲོག་པ་ཞིག་ལ་མཚོན་ན་དུས་ཚོད་ནི་ཕྱུགས་རིགས་ཀྱི་འཕེལ་ཁ་རེད། ཞིང་བ་ཞིག་ལ་མཚོན་ན་དུས་ཚོད་ནི་འབྲུ་རིགས་ཀྱི་བང་མཛོད་རེད། དེ་བཞིན་དུ་ཚོང་བ་ཞིག་ལ་མཚོན་ན་དུས་ཚོད་ནི་སྒོར་མོ་དང་སློབ་མ་ཞིག་ལ་མཚོན་ན་དུས་ཚོད་ནི་ཤེས་རིག་ལགས་ཏེ། འཇིག་རྟེན་འཚོ་བའི་ཁྲོད་ཀྱི་ལས་རིགས་མི་འདྲ་བ་གང་ཡིན་ཡང་དུས་ཚོད་དང་མ་འབྲེལ་བ་གཅིག་ཀྱང་མེད། གལ་ཏེ་མི་སུ་ཞིག་གིས་དུས་ཚོད་དུས་ཚོད་དུ་ཤེས་ཤིང་དེ་ཉིད་གཅེས་འཛིན་བེད་སྤྱོད་གཏོང་ཤེས་ན་མི་དེ་ལ་རྒྱལ་ཁ་དང་གྲུབ་འབྲས་ཡོད་ཅིང་། མི་སུ་ཞིག་གིས་དུས་ཚོད་སྣང་མེད་དང་དུས་ཚོད་བཀོད་སྒྲིག་བྱེད་མི་ཤེས་ན་དེ་ལ་འབྲས་བཟང་ཞིག་ནམ་ཡང་སྟོན་རྒྱུ་མེད། དེ་བས་དུས་ཚོད་ནི་ཚེ་སྲོག་དང་རྒྱལ་ཁ། ཤེས་རིག ལོངས་སྤྱོད་ཡིན་ཞེས་བཤད་ཀྱང་ཆོག་ལ། དུས་ཚོད་ནི་ཡོད་ཚད་ཡིན་ཞེས་བཤད་ཀྱང་ཆོག
ང་ཚོ་བོད་རིགས་སྤྱི་ལ་མཚོན་ན་དུས་ཚོད་ཀྱི་འདུ་ཤེས་ཧ་ཅང་ཞན་ལ། བྱ་བ་ཅི་སྒྲུབ་ཀྱང“སང་ཉིན་སྒྲུབ”ཅེས་བྱ་བ་མང་བོ་རྗེས་ལ་བསྐྱུར་འཇོག་པས། ང་ཚོ་ནི་སང་ཉིན་མང་བའི་མི་རིགས་སྒྱིད་ལུག་ཅན་གྱི་གྲས་སུ་འཚུད་ཡོད། དོན་དངོས་འདིས་ང་ཚོ་ལ་དུས་ཚོད་ཀྱི་འདུ་ཤེས་ཞན་ཅིང་ང་ཚོས་དུས་ཚོད་ལ་གཅེས་འཛིན་མི་བྱེད་པ་དེ་མཚོན་པ་རེད། དེ་ལ་རྒྱུ་རྐྱེན་ཅི་ཡང་མེད་དམ་ཞེ་ན། རྒྱུ་རྐྱེན་ཡོད་དེ་གཅིག་ནི་འཚོ་གནས་ཁོར་ཡུག་དང་གཉིས་ནི་ཐོན་སྐྱེད་འཚོ་བར་འབྲེལ་བ་ཡོད་པ་རེད།
ཚང་མས་མཁྱེན་གསལ་ལྟར་ང་ཚོ་བོད་རིགས་ནི་མདོ་དབུས་མཐོ་སྒང་དུ་གནའ་ནས་ད་བར་དུ་འཚོ་ཞིང་གཞེས་པའི་མི་རིགས་ཤིག་ཡིན་ལ། མདོ་དབུས་མཐོ་སྒང་དེ་ས་རྒྱ་ཆེ་ཞིང་རི་ལུང་མང་བས་དེ་ན་འཚོ་སྡོད་བྱེད་པའི་ང་ཚོ་ཡང་ཁ་ཐོར་རང་བཞིན་གྱི་ཚུལ་དུ་གནས་ཤིང་། མི་མང་འདུས་སྡོད་ཀྱི་གོ་སྐབས་ཤིན་ཏུ་ཉུང་ལ་རྒྱུན་པར་མི་རིགས་གཞན་དང་འགྲན་རྩོད་ཀྱི་གནས་ཚུལ་ལྷག་ཏུ་ཉུང་བས། ནམ་རྒྱུན་སོས་དལ་བག་ཕེབས་ཀྱིས་དུས་འདས་ཏེ་ཆུ་ཚོད་བརྩོན་ལེན་གྱི་བསམ་བློ་ངང་གིས་མ་ཆགས་པ་རེད། གཞན་ཐོན་སྐྱེད་ཀྱི་ཆ་ནས་ཞིང་འབྲོག་ལས་ཏེ་རང་བྱུང་ཆ་རྐྱེན་གཙོ་བོར་བརྟེན་པའི་ལས་རིགས་གཉེར་ཞིང་། དེ་ཡང་ཆར་ཆུ་སོགས་རང་བྱུང་གི་དུས་བབ་ཆ་རྐྱེན་ལ་བརྟེན་པ་ཤོས་ཆེ་བ་ལས་རང་དགར་དུས་ཚོད་བརྩོན་ལེན་བྱེད་མིན་གྱིས་ཐག་ཆོད་ཡོང་བ་ཞིག་གཏན་ནས་མ་ཡིན་པས་དུས་ཚོད་ཀྱི་འདུ་ཤེས་དེ་ཚད་མཐོན་པོར་སླེབས་མ་ཐུབ་པ་རེད། གལ་སྲིད་ང་ཚོར་བཟོ་ལས་ལག་རྩལ་དང་ཚོང་ལས་ཁེ་གཉེར་གྱི་རིགས་གནའ་ནས་ཆེ་རུ་དར་ཞིང་། དེ་ལ་བརྟེན་ནས་འཚོ་བ་རོལ་དགོས་པའི་སྤྱི་ཚོགས་འགྲོ་ལུགས་ཤིག་ཆགས་ཡོད་ཚེ། ང་ཚོར་ཡང་དུས་ཚོད་ཀྱི་འདུ་ཤེས་དེ་རང་བཞིན་གྱིས་འབྱུང་ངེས་ལ་འགྲན་རྩོད་ཀྱི་བློ་སྟོབས་ཀྱང་ངང་གིས་རྫོགས་སྲིད་པ་རེད། དེས་ན་ང་ཚོས་འདིར་བོད་རིགས་ཀྱི་དུས་ཚོད་འདུ་ཤེས་ཞན་པ་ནི་ཐོན་སྐྱེད་འཚོ་བ་ཞན་པ་རེད་ཅེས་བཤད་ཆོག་ལ། ཐོན་སྐྱེད་ཆུ་ཚད་ཞན་པ་ནི་དུས་ཚོད་ཀྱི་འདུ་ཤེས་ཕྲ་བས་ལན་པ་རེད་ཅེས་ཀྱང་བཤད་ཆོག་པར་བསམ།
འོ་ན་ང་ཚོ་ལ་དུས་ཚོད་དམ་འཛིན་བྱེད་མཁན་དང་དུས་ཚོད་བཀོད་སྒྲིག་གནང་ཤེས་མཁན་སྔར་མ་བྱུང་ལ་ད་ཡང་མི་གནས་སམ་ཞེ་ན། དེ་ནི་གཏན་ནས་མ་ཡིན་ཏེ་ང་ཚོ་བོད་ལ་ཚེ་གཅིག་ལུས་གཅིག་ཏུ་ཟག་མེད་རྒྱལ་བའི་ཁྲི་ལ་བཞུགས་པ་རྗེ་བཙུན་མི་ལ་རས་པ་དང་། བཅུ་ཕྲག་རིག་པའི་ཕ་མཐར་སོན་པ་ས་སྐྱ་ཀུན་དགའ་རྒྱལ་མཚན། གླེགས་བམ་བརྒྱ་ཕྲག་ཕྱག་སོར་རྩལ་གྱིས་བསྐྲུན་པའི་བོ་དོང་ཕྱོགས་ལས་རྣམ་རྒྱལ། མཁས་དང་གྲུབ་པའི་དབང་ཕྱུག་མཉམ་མེད་ཤེས་རབ་རྒྱལ་མཚན། ཕྱི་དར་བསྟན་པའི་སྲོག་ཤིང་རྗེ་ཅོང་ཁ་བ་བློ་བཟང་གྲགས་པ། འཇའ་ལུས་འཕོ་ཆེན་བརྙེས་པ་ཤར་རྫ་བཀྲ་ཤིས་རྒྱལ་མཚན་སོགས་གྲུབ་མཐའ་རིས་མེད་གྱི་མཁས་གྲུབ་གནམ་གྱིས་ས་བཀབ་པ་ལྟ་བུ་བྱུང་བ་དག་གིས་གཉིད་བཅག་ཟས་བརྗེད་ཀྱིས་བསླབ་པ་སློབ་གཉེར་བྱས་ཤིང་འགྲོ་བའི་དོན་མཛད་པ་རེད། དེ་དག་ཐམས་ཅད་ང་ཚོ་ཕྱི་རབས་པ་རྣམས་ཀྱི་མིག་དཔེ་དང་སློབ་སྦྱོང་གི་ཡུལ་དུ་གྱུར་ཡོད་པ་ནི་སྨོས་མ་དགོས་ལ། མིག་སྔར་ཡང་དུས་ཚོད་བརྩོན་ལེན་གྱིས་མཁས་པའི་རྒྱལ་ཐབ་ཟིན་ཏེ་མི་རིགས་ལས་དོན་གྱི་ཁུར་ཆེན་འདེགས་པའི་ཀ་བ་དང་གདུང་མའི་ཚུལ་དུ་གྱུར་བ་མང་དུ་བཞུགས་པ་འདི་དག་ལས་ཀྱང་ང་ཚོས་དུས་ཚོད་ཀྱི་གལ་ཆེན་རང་བཞིན་མཐོང་ནུས་ཤིང་། དེ་དག་གི་གྲུབ་འབྲས་ཡོད་ཚད་དུས་ཚོད་དང་འབྲེལ་ཞིང་དུས་ཚོད་བཀོད་སྒྲིག་དང་དུས་ཚོད་དམ་འཛིན་ལས་བྱུང་བའང་བདེ་བར་རྟོགས་ནུས་པ་མིན་ནམ།
དེས་ན་ང་ཚོ་བོད་རིགས་ཀྱི་དགེ་སློབ་སྤྱི་དང་ལྷག་པར་རོང་འབྲོག་ཁྱིམ་བདག་རྣམས་ལའང་ཡབ་མེས་གོང་མ་དག་གི་ལམ་སྲོལ་བཟང་བོ་སྟེ། དུས་ཚོད་དམ་འཛིན་བྱེད་པ་དང་དུས་ཚོད་བརྩོན་ལེན་གྱི་འདུ་ཤེས་གཏིང་ཟབ་མོ་ཞིག་དགོས་ལ། དེ་ནི་གཞན་ལྟ་ཅི་དཔེར་ན་སློབ་གྲྭ་བ་ཞིག་ལ་སློབ་གྲྭ་ནས་དགེ་རྒན་གྱིས་ལྟ་རྟོག་བྱས་ཏེ། དུས་ཚོད་ལྟར་མལ་ལས་ལངས་བ་དང་སློབ་ཁྲིད་ལ་འཇུག་པ། རང་སྦྱོང་བྱེད་པ་སོགས་ལ་འབད་འབུངས་བྱས་ནའང་དབྱར་དགུན་གྱི་གནང་བ་སོགས་སུ་ཡུལ་ཕ་མས་བྱིས་པར་གཅེས་མདོག་གིས་གུང་ཉལ་གུང་ལངས་དང་རང་སྣང་གང་ཤར་བྱེད་དུ་བཅུག་ན་འབྲས་བུ་བཟང་བོ་ཞིག་མཐོང་དུ་མེད་ཅིང་ཐོབ་པའི་རེ་བའང་ཆུང་ལ། གཞན་གྱི་རྗེས་ཆོད་པ་ནི་དེ་བས་ཀྱང་བཤད་མི་དགོས་པར་འགྱུར་བ་བཞིན་ནོ།།
