གསུམ། སྒྲིག་ལམ་གྱི་ཚད་གཞིར་ཁྱིམ་བདག་རང་ཉིད་འཇོག་མི་འོས།
ང་ཚོ་རོང་འབྲོག་གཞི་རིམ་ས་ཁུལ་གྱི་ཕ་མ་མང་བོ་ཞིག་ལ་མཚོན་ན་རང་གི་བྱིས་པར་དམིགས་བསལ་གྱི་སྒྲིག་ལམ་གང་ཡང་མེད་ལ། གྲོང་ཁྱེར་དང་གྲོང་བརྡལ་གྱི་ཁྱིམ་བདག་གང་མང་ཞིག་ལ་མཚོན་ན་བྱིས་པར་ཆེད་བཀོད་ཀྱི་སྒྲིག་ལམ་སྣ་ཚོགས་ཤིག་ཡོད་པ་རེད། སྤྱིར་སྒྲིག་ལམ་གང་ཡང་མེད་པ་དེས་ཁ་ཕྱོགས་གང་ཡང་མེད་པ་མཚོན་ཞིང་། སྒྲིག་ལམ་གྱི་རྣམ་པ་སྣ་ཚོགས་པ་དེས་བྱིས་པ་གཅེས་སྐྱོང་ལ་ཁ་ཕྱོགས་དང་དམིགས་ཡུལ་ངེས་ཅན་ཞིག་ཡོད་པ་མཚོན་པ་རེད། ཡིན་ནའང་སྒྲིག་ལམ་ཡོད་པའི་ཁྱིམ་ཚང་གི་ཕ་མ་མང་བོས་སྒྲིག་ལམ་གྱི་གཞི་འཛུགས་དུས་ཕ་མ་རང་ཉིད་གཙོ་གཞི་བྱས་ཏེ། རང་གི་འཚོ་བའི་ཉམས་མྱོང་དང་ལྟ་ཚུལ། འདོད་མོས་སོགས་ལ་མཐའ་གཅིག་ཏུ་བསྟུན་པ་ལས་བྱིས་པའི་ལོ་ཚོད་དང་། འཚར་ལོངས་ཀྱི་གོ་རིམ། ལུས་སེམས་འཕེལ་རྒྱས་ཀྱི་ཆོས་ཉིད། བྱིས་པའི་དམིགས་བསལ་ཁྱད་ཆོས་སོགས་ལ་མཉམ་འཇོག་དང་དབྱེ་ཞིབ་གང་ཡང་བྱས་མེད་པ་རེད། དོན་ངོ་མ་བཤད་ན་སྒྲིག་ལམ་བཅའ་མཁན་ཕ་མ་ཁྱོད་ཉིད་ཡིན་པ་བདེན་ཡང་སྲུང་མཁན་བྱིས་པ་ཁོ་རང་ཡིན་པས། བྱིས་པ་ཡིས་དེ་སྲུང་ཐུབ་མིན་དང་དེ་སྲུང་ན་བྱིས་པ་ཁོ་རང་ལ་ཕན་ཁེ་ཡོད་མེད་སོགས་ལ་མ་མཐའ་ཡང་འདང་རྒྱག་དགོས་པ་རེད། ཡང་གཅིག་བཤད་ན་ཕ་མ་གཉིས་ནི་འདས་ཟིན་པའི་དུས་རབས་ཀྱི་ཐོན་དངོས་ཡིན་ལ། བྱིས་པ་ནི་ད་ལྟའི་དུས་རབས་ཀྱི་ཐོན་དངོས་ཡིན་པས། ཕ་མ་དང་བྱིས་པའི་འཚོ་གནས་ཁོར་ཡུག་དང་རིག་གནས་སྣང་ཚུལ་མི་འདྲ་ལ། སྤྱི་ཚོགས་ངོ་བོ་དང་འགྲན་རྩོད་གནས་བབ་མི་འདྲ། ཁ་གཏོད་སའི་གནད་དོན་ཡང་དེ་བཞིན་དུ་མི་འདྲ་བ་རེད། དེས་ཕ་མ་རང་གི་ཉམས་མྱོང་དང་ལྟ་ཚུལ། ཡང་ན་དེ་ཁོ་ན་ལས་བྱུང་བའི་སྒྲིག་ལམ་གྱི་གཅུན་འབྲས་དེས་བྱིས་པ་དང་བྱིས་པ་དེས་ཅིས་ཀྱང་ཁ་གཏོད་དགོས་པའི་འཕེལ་རྒྱས་འགྲན་རྩོད་གྱི་སྤྱི་ཚོགས་ལས་རིགས་ཁྲོད་ནུས་པ་གང་ཡང་མི་ཐོན་པའམ། ཡང་ན་ལྡོག་ཕྱོགས་ཀྱི་ནུས་པ་འབྱུང་མི་སྲིད་པའི་ངེས་པ་ག་ལ་ཡོད།
ད་དུང་ཁྱིམ་བདག་མང་ཆེ་བ་ཞིག་གིས་བྱིས་པར་སློབ་གསོ་གཏོང་དུས་ང་ཚོའི་དུས་འདི་དང་འདི་འདྲ་ཡིན་ཚུལ་དང་། ཡང་ན་ང་ཚོ་ཁྱོད་ཚོའི་ལོ་ཐོག་ན་ཡོད་དུས་དེ་དང་དེ་འདྲ་བྱས་ཚུལ་སོགས་འདས་ཟིན་པའི་ནང་དོན་དཔེར་དྲངས་ནས་བརྗོད་པར་དགའ་བ་རེད། ཡིན་ནའང་བྱིས་པ་དག་ལ་མཚོན་ན་དེ་ནི་ཆེས་སུན་སྣང་སྐྱེ་བའི་སློབ་གསོ་གཏོང་ཐབས་ཤིག་ཏུ་ཟད་ལ། རང་ཉིད་དང་འབྲེལ་བ་གང་ཡང་མེད་པར་སྙམ་པ་རེད། རྒྱུ་མཚན་ནི་སློབ་གསོ་དེའི་རིགས་ཀྱིས་སློབ་གསོའི་བརྗོད་སྙིང་ལ་ཁྱིམ་བདག་རང་ངམ་རང་ཉིད་ཀྱི་འདས་དོན་བཞག་པ་ལས། བྱིས་པ་དང་བྱིས་པའི་མིག་མཐོང་ལག་ཟིན་གྱི་དོན་དངོས་བཞག་མེད་ལ། བྱིས་པའི་མ་འོངས་བ་དང་བྱིས་པའི་དམིགས་བསལ་ཁྱད་ཆོས་ཀྱང་བཞག་མེད་པ་རེད།
དེའི་ཕྱིར་མི་ཞིག་གིས་རང་གི་བྱིས་པ་འཇོན་ཐང་ཅན་ཞིག་ཏུ་བསྒྱུར་འདོད་ན། ཁྱིམ་གཞི་སློབ་གསོའི་ཁོངས་གཏོགས་སུ་གྱུར་བའི་བྱིས་པའི་ཆེད་བཀོད་སྒྲིག་ལམ་དེ་ཡང་བྱིས་པར་རྐང་འཛུགས་པ་དང་བྱིས་པ་གཙོ་གནད་དུ་འཇོག་པ་ལས་ཁྱིམ་བདག་གི་ཞེན་འདོད་ཁོ་ན་གཙོ་བོར་འཇོག་མི་རུང་ངོ་།།
