གཉིས། ཕ་མའི་བྱམས་བརྩེ་ལ་དམིགས་ཡུལ་ཡོད་དགོས།
ང་ཚོ་བོད་ཀྱི་ཕ་མ་དག་ལའང་སྔོན་ཐོན་སྤྱི་ཚོགས་ནང་གི་ཕ་མའམ་ཡང་ན་ཕ་མ་དེ་དག་ལས་ལྡབ་འགྱུར་གྱིས་ལྷག་པའི་བྱམས་དང་བརྩེ་བ་ཡོད་པ་རེད། དེ་ནི་ང་ཚོའི་མི་རིག་རིག་གནས་ཀྱིས་བསྐྱེད་པའི་ཐོན་དངོས་ཁྱད་དུ་འཕགས་པ་ཞིག་ཡིན་ལ། གཞན་ལ་ངོམ་དུ་རི་བ་ཞིག་ཀྱང་ཡིན། ཡིན་ནའང་སྤུས་ཀའམ་མིག་རྒྱང་གི་ཆ་ནས་བལྟས་ན་ང་ཚོའི་ཕ་མ་བྱིངས་ཀྱི་བྱམས་བརྩེ་ལ་དམིགས་ཡུལ་ཁ་གསལ་གང་ཡང་མེད་ལ། བྱམས་བརྩེ་རིགས་དེས་ང་ཚོའི་བྱིས་པ་ནི་དཀའ་སྡུག་གི་ཉམས་སད་མི་ཐེག་པ་ཞིག་ཏུ་བསྒྱུར་དང་སྒྱུར་བཞིན་པ་རེད།
དཔེར་ན་ང་ཚོའི་དངོས་ཡོད་སྤྱི་ཚོགས་ནང་ཕ་མ་མང་བོ་ཞིག་གིས་རང་གི་བྱིས་པར་སྒོར་མོ་གང་འདོད་དུ་སྟེར་བ་དང་། དེས་རང་ཉིད་བྱིས་པར་དགའ་ཞིང་བྱིས་པ་ལ་གཅེས་སྐྱོང་བྱེད་པ་མཚོན་གྱིན་ཡོད། དོན་དངོས་སུ་སྣང་ཚུལ་དེས་བྱིས་པར་སྒོར་མོ་གང་འདོད་དུ་བཀོལ་བའི་ངན་གོམས་ཞིག་བསྐྱེད་པ་དང་། ནམ་ཞིག་སྒོར་མོ་མེད་ཚེ་བྱིས་པ་རྐུ་དང་ཇག་ལ་འཇུག་པའི་སྔོན་འགྲོའི་ཆ་རྐྱེན་བསྐྲུན་པ་རེད། ཡང་ཁ་ཅིག་གིས་བྱིས་པར་སྒོར་མོ་སྟེར་བ་ནི་མ་རུང་བ་ཞིག་ཏུ་རྩིས་ཏེ། བྱིས་པར་མཁོ་མཁོ་ཐམས་ཅད་རང་ཉིད་ཀྱིས་ཉོས་ཏེ་བྱིས་པའི་འདོད་བློ་སྐོང་བ་ལས་བྱིས་པའི་ལག་ལ་རང་དགར་སྒོར་མོ་མི་འཇོག་ལ། བྱེད་སྟངས་དེས་སྒོར་མོ་གང་འདོད་དུ་བརླག་པའི་ངན་གོམས་བཟློག་ཐུབ་ནའང་། སླར་ཡང་བྱིས་པར་གང་འདོད་ཀྱི་ཆ་རྐྱེན་འདོན་པའི་ངན་གོམས་ཤིག་བསྐྱེད་ཅིང་། ཕ་མས་རང་གིས་ཆ་རྐྱེན་གང་བཏོན་སྒྲུབ་དགོས་སྙམ་པའི་སྤུས་མ་དག་པའི་བསམ་བློ་དང་། ལྷག་པར་དུ་ཡོད་ཚད་ཕ་མའམ་མི་གཞན་ལ་བརྟེན་པའི་ནུས་མེད་ཀྱི་སྲོལ་ངན་ཞིག་ཀྱང་ཆགས་སུ་འཇུག་པ་རེད། ཕ་མའི་བྱེད་སྟངས་འདིའི་རིགས་བྱམས་བརྩེ་དང་བྱམས་བརྩེའི་མངོན་ཚུལ་ཞིག་མིན་པར་ནི་སུས་ཀྱང་སྒྲུབ་མི་ནུས་མོད། འོན་ཀྱང་བྱམས་བརྩེའི་དམིགས་ཡུལ་དང་མཐའ་འབྲས་བཟང་ངན་གྱི་ཆ་ནས་རླབས་ཆེ་བའི་ཕ་མ་དག་ལ་མཚོན་ནའང་འདང་མི་རྒྱག་རང་རྒྱག་གི་དངོས་ཡོད་གནད་དོན་ཞིག་རེད།
དོན་དངོས་སུ་བྱིས་པར་སྒོར་མོ་གང་བྱུང་དུ་སྟེར་བ་དེ་ཅང་མིན་ལ། གཅིག་ཀྱང་མི་སྟེར་བ་དེ་ཡང་ཅང་མིན་ཏེ་བྱིས་པར་འོས་འཚམ་གྱི་སྤྱོད་དངུལ་སྟེར་དགོས་པ་མ་ཟད། བྱིས་པ་ལ་ལེགས་ཉེས་ཀྱི་དབྱེ་མཚམས་གསལ་བའི་རང་གི་འགུལ་སྐྱོད་རང་དབང་ཐོབ་དགོས་པ་རེད། གཙོ་བོའི་གཙོ་བོ་ནི་བྱིས་པར་སྒོར་མོའི་ཡོང་ཁུངས་གསལ་བོར་ངེས་པར་བྱེད་པ་སྟེ་དཀའ་སྡུག་དོན་སྙིང་གིས་ཕྱུག་པའི་བྱ་བ་སྣ་ཚོགས་སྒྲུབ་ན་ད་གཟོད་སྒོར་མོ་ཐོབ་ཅིང་། ཅི་ལྟར་རང་ལ་དཀའ་སྤྱད་ཁུར་ཁྱེར་གྱི་སྙིང་སྟོབས་དང་བརྩོན་འགྲུས་ཡོད་ན་དེ་ལྟར་སྒོར་མོ་མང་བོ་ཐོབ་ཐུབ་པའི་གནས་ལུགས་ངེས་པར་བྱེད་པ་དང་། སྒོར་མོའི་བཟང་ངན་ཡང་སྒོར་མོ་རང་སྟེང་ན་མེད་པར་བེད་སྤྱོད་བྱེད་མཁན་རང་གི་སྤུས་ཚད་ཀྱི་སྟེང་ན་གནས་པ་སོགས་སྒོར་མོའི་ཐད་ལ་ངོས་འཛིན་ཡང་དག་བྱེད་པར་སློབ་སྟོན་གནང་རྒྱུ་དེ་རེད།
ངོ་མ་བཤད་ན་བྱིས་པ་ཞིག་གི་འཚར་ལོངས་གོ་རིམ་ཁྲོད་ཕ་མའི་བྱམས་བརྩེ་ནི་མེད་དུ་མི་རུང་བའི་གཙོ་ཤུགས་ཞིག་ཡིན་ལ། དེ་ཡང་ཁ་ཕྱོགས་དང་དམིགས་ཡུལ་གསལ་ལ་མཇུག་འབྲས་ཁག་ཐེག་བྱེད་ཐུབ་པ་ཞིག་ཡིན་དགོས་ཏེ། དེ་མིན་ཚེ་བྱམས་བརྩེ་ནི་བྱིས་པ་རྒྱ་ཡན་དུ་གཏོང་བའི་སྒུལ་ཤུགས་ཆེན་པོར་འགྱུར་སྲིད་པ་ནི་རང་རང་གི་ཁོར་ཡུག་ནས་རྒྱུན་པར་མཐོང་བའི་བུ་ཕྲུག་ལང་ཤོར་དག་གི་ནག་ཉེས་དང་སྤྱོད་ངན་སྣ་ཚོགས་ལས་ཡོངས་སུ་རྟོགས་ནུས་སོ།།
