འོད་ཀྱི་ལམ་བུ་བསྙེགས་པའི་མཛེས་སྡུག
__ སྣང་ཞིག་རྒྱལ་ཚབ་རིན་པོ་ཆེར་ཕུལ་བ།
༡
སྟོན་པ་བྱོན་ནས
ལང་ལོང་འཁྲིགས་པའི་ས་རྡུལ་ལ་ཆག་ཆག་བཏབས་རྗེས།
ཁ་བ་ཉི་མས་བཞུས་ཤིང་ལྗང་མྱུག་རླུང་བུས་དཀྲོགས་སོང་ཟེར།
ཟླ་གཞོན་དབྱིངས་ནས་འཛུམ་ཞིང་སྤྲིན་ནག་མཐོངས་སུ་ཡལ་སོང་ཟེར།
༢
དུས་ཚོད་ཀྱི་ཆུ་བོ་ཤུགས་ཀྱིས་འབབ་པའི་རྒྱུན་དག་ལས་ཀྱང་།
སྐྱེས་ཆེན་གྱི་ཕྲེང་བ་ཆལ་ཆིལ་དུ་གཡོས་ཤིང་།
ལུང་རིགས་ཀྱི་ཟེགས་མ་སིལ་སིལ་དུ་འཐོར་བས།
ས་གཞིའི་གདུང་བ་བསལ་ཞིང་།
སྤང་དཀར་གྱི་གོང་བ་བརླན་སོང་བའི་ངོ་མཚར་རེ་རེའང་།
ད་དུང་ཡང་ལོ་རྒྱུས་ཀྱི་གདོང་ན་འཚེར་ཞིང་།
གླེགས་བམ་གྱི་ཁོང་ན་འཛུམ་ཨང་།
༣
རེད་ཡ དེ་ལྟ་བུའི་ཤེས་རབ་ཀྱི་བྱུང་བའི་རི་མོ།
དེ་ལྟ་བུའི་ལོ་ཟླ་ཡི་གོམ་སྒྲ་རིང་མོ།
རེ་རེ་བཞིན ལོ་ཡི་ཆར་བས་ཀྱག་ཀྱོག་ཏུ་དེད་ཅིང་།
ལས་ཀྱི་རླུང་བུས་སྟེང་འོག་ཏུ་བསྒྱུར་ཏེ།
དུས་རབས་ཉི་ཤུ་བའི་སྒལ་བར་ཆོ་འཕྲུལ་གྱིས་ལྷུང་བའི་དུས་ནི།
ཏག་ཏག ཁྱེད་སྐུའི་ཐུགས་སྐྱེད་ཀྱི་ས་བོན་མི་ཡུལ་ནས་འབུས་ཏེ།
དབྱངས་གསལ་གྱི་ཐང་ཆེན་པོ་བློ་ཡིས་གཞལ་བའི་ལོ་རབས་དེའོ།
སྙན་བརྒྱུད་ཀྱི་བོན་ཟབ་མོ་ཐུགས་ལ་བསྲེལ་བའི་དུས་རབས་དེའོ།
༤
ཀྱེ་མ། སེམས་ཅན་གྱི་བསོད་ནམས་དེས་ལན་ནམ།
སྙིགས་མ་ཡི་རང་མཚང་དེ་བརྡོལ་སོང་།
ཅང་མ་འགོར་བར ས་གཞི་བཀྲེས་ལྟོགས་ཀྱིས་རུད་ཅིང་གྱོང་ལ།
གཙང་བོ་སྐོམ་གདུང་གིས་ངུ་ཞིང་སྔངས་པས།
ཉེས་མེད་ཀྱི་རྣམ་ཤེས་མང་བོ་ལུག་ཁྱུ་ལྟར་བཞུད་སོང་།
ལོ་དེ་ལ་ཀུན་གྱིས་ང་བརྒྱད ང་བརྒྱད་དུ་འབོད་སྐད།
ཉི་མ་བཀྲེས་པའི་མེ་ཡིས་སྲེག་ཅིང་།
ཟླ་བ་གཅེར་བུའི་ལུས་ཀྱིས་འདར་བའི་དུས་དེ་ལ།
ཁྱེད་སྐུའི ཏིང་ངེ་འཛིན་གྱི་ཕྱག་རྒྱ་མ་ལྷོད་ཅིང་།
བཟོད་པའི་གོ་ཆ་བཙའ་དང་གཡའ་ཡིས་མ་འཁྱེར་བས།
ཁྱེད་ནི་གཤིན་རྗེའི་མཆེ་བར་ནས་ཤོར་བའི་ཤེས་རབ་ཀྱི་མདའ་མོ་དེའོ།
ཁྱེད་ནི་བསྟན་པའི་ལས་དོན་དུ་ལྷག་པའི་གཡང་ཊིའི་ཐམ་ག་དེའོ།
༥
ད་རུང་རིག་གསར རིག་གསར་གྱི་མེ་ལྕེས།
ཕྱི་ཡི་སྐྱ་རྩིག་ཤུལ་ནས་མ་བསྐྱུར་ཞིང་།
ནང་གི་ཆོས་རྩིག་གོང་ནས་མ་བཞག་པར།
ཡོད་ཚད་བཅགས བརྡུངས བསྲེགས འཁྱེར།
ཐ་ན་ཤ་ཡི་ཁ་ལ་ལྕགས་ཀྱི་སྒོ་ཟྭ་རྒྱག་པའི་དུས་རྣམས་སུའང་།
ཁྱེད་ཀྱི་ལྟ་བའི་རི་བོ་ཆུ་ལ་མ་ནུབ་ཅིང་།
སྤྱོད་པའི་སྤོས་དཀར་དྲི་དང་ངད་ཀྱིས་མ་བཏང་བར།
སླར་ཡང སྤྲིན་ཀློང་ནས་མངོན་པའི་ཉི་མའི་ཚུལ་གྱིས་འཛུམ་པ་དེ།
ཀྱེ ང་ཚོའི་ལས་སྐལ་འདི་ཇི་འདྲའི་བཟང་ཨང་།
བདག་གི་རྒྱལ་ཚབ་ལགས།
༦
དེ་ལྟར དཀའ་བའི་རི་བོ་རྔུལ་ཆུས་བཏེགས་ཤིང་།
གདུང་བའི་ཁུར་བོ་བརྩོན་པས་དྲུད་དེ།
ཁྱེད་རང་ཡུལ་དུས་ཇུས་གསུམ་གྱི་ལམ་མདོར་འབྱོར་དུས།
མདུན་ཕྱོགས་ཀྱི་ནམ་མཁའ་སྔོ་སངས་ངེ་བ་དེ་ཁྱེད་ཀྱི་གདུལ་ཞིང་རེད།
རྐང་འོག་གི་ས་གཞི་སྐྱ་ཤ་ལེ་བ་དེ་ཁྱེད་ཀྱི་གདན་ས་རེད།
རེད་ཡ དུས་དེ་ཉིད་དུ ཁྱེད་ཀྱིས་དུས་དེ་ཉིད་དུ།
རྟེན་བཞེངས་ཀྱི་དཔུང་བ་ཤར་ནས་ལྷོ་རུ་བརྐྱངས་ཤིང་།
འཆད་རྩོད་ཀྱི་ང་རོ་བྱང་ནས་ནུབ་ཏུ་བསྒྲགས་ལ།
བོན་ཁྲིམས་ཀྱི་དར་སྐུད་སྲིད་ནས་ཞེང་དུ་འཐེན་པས།
ད་གཟོད འགྱེལ་བའི་རྒྱལ་མཚན་སླར་ཡང་བསྒྲེངས་ཤིང་།
འགག་ཟིན་པའི སིལ་སྙན་གྱི་སྒྲ་དབྱངས་སིལ་སིལ་དེ་ཡང་ག་ལེར་འཁྲོལ་སོང་།
ཉམས་དགའ་བའི་སྣང་ཚུལ་ཡོད་ཚད ཡོད་ཚད་རེ་རེ་བཞིན།
མིག་ཁྲ་ཆུང་གི་ངོ་ན་ཁྲ་ཅོག་གེར།
རྣ་ཐོས་ཆུང་གི་ལམ་ན་སྙན་ལྷང་ངེར།
ཡིད་དྲན་འཛིན་གྱི་དབུས་ན་བརྗིད་ལྷམ་མེར་གནས་པ་འདི་ལགས་ཨང་།
༧
ལས་དོན་ཇི་ལྟར་རྒྱ་ཆེ་ཡང་ད་ནི་ཁྱེད་ཀྱིས་སྐུ་ངལ་ཙམ་གསོ་འོས་ཏེ།
མི་ལོ་བརྒྱད་ཅུའི་ལོ་ཟླ་ལ་བསྔས་ཏེ ད་ནི་སྐུ་ངལ་ཙམ་གསོ་རོགས།
ཁྱེད་རང་མ་སོང་བའི་ལོ་ཟླ་དང་ཁྱེད་ཀྱིས་མ་ཁུར་བའི་བསྟན་པའི་ཁུར་ཆེན་ཞིག་གང་ན་ཡོད་ཨང་།
ངོ་མ ཁྱེད་ནི་ངུར་སྨྲིག་གི་རྒྱ་མཚོའི་ཀློང་ན་འོད་ལམ་ལམ་འཚེར་བའི་མུ་ཏིག་ཅིག་དང་འདྲ་ཞིང་།
ཁྱེད་ནི་མན་ངག་གི་དྲི་ངད་ལྡང་བའི་ཚལ་ན་དྲོད་ལམ་ལམ་འབར་བའི་ཉི་གཞོན་ཞིག་དང་ཡང་མཚུངས་སོ།
སྐུ་ཚེ་བརྟན་པར་སྨོན རྒྱལ་ཚབ་ལགས།
སྐུ་ཚེ་རྒྱལ་མཚན་ཇི་སྲིད་བར་དུ་བརྟན་པར་ཤོག
དྲུང་ཆེ་རྒྱ་ཐར་ལགས་ཀྱི་རེ་བ་བཞིན ༢༠༡༠ ལོའི་ཟླ ༡༡ པའི་ཚེས ༡༣ ཉིན་ཁྱུང་བོ་ནས་བྲིས།
