ཡབ་ཆེན།
༡
རླུང་དམར་འུར་འུར་གྱི་ལོ་དང་ཟླ་རུ།
སྡུག་རུས་ཀྱི་མགོ་བོ་བགས་ཀྱིས་དགྱེས་ཏེ།
རྒྱང་རིང་གི་ལམ་སྣེ་རྡོག་པས་གནོན་མཁན་དེ་ཁྱེད་ཡིན།
བདག་གི་ཡབ་ཆེན།
སུ་ཞིག་གི་རྒྱབ་རི་བཞིན་བརྟན་པོར་འགྲེང་དུས།
འཇིག་རྟེན་ཡོད་ཚད་ཀྱི་སྒོ་མོ་ཁྱེད་ལ་ཕྱེས་ཤིང་།
འབྲས་བུ་གྲངས་མེད་ཀྱི་མདུད་པ་ཁྱེད་ལ་བརྒྱབ་ཡོད།
ཨ ཡབ་ཆེན། ངའི་སེམས་ཁོང་གི་གསེར་གྱི་ཉི་མ།
རྟག་ཏུ་ངའི་མཁའ་དབྱིངས་སུ་ལམ་ལམ་འབར་ཡོད།
༢
ཉི་འོད་ལམ་ལམ་གྱི་ཉིན་དང་དུས་ལ།
ཤེས་རབ་ཀྱི་མིག་ཟུང་དལ་གྱིས་ཕྱེས་ཏེ།
འོད་ཟེར་གྱི་ལམ་བུ་སྟོབས་ཀྱིས་འདེད་མཁན་དེ་ཁྱེད་ཡིན།
བདག་གི་ཡབ་ཆེན།
སུ་ཞིག་གི་སེམས་རྟེན་བཞིན་འཛུམ་གྱིས་བཞུགས་དུས།
ཕུན་ཚོགས་ཡོད་ཚད་ཀྱི་ལག་པ་ཁྱེད་ལ་བསྲིངས་ཤིང་།
རྒྱལ་ཁ་གྲངས་མེད་ཀྱི་ནོར་བུ་ཁྱེད་ལ་སྤུངས་ཡོད།
ཨ ཡབ་ཆེན། ངའི་སེམས་ཁོང་གི་དངུལ་གྱི་ཟླ་བ།
རྟག་ཏུ་ངའི་མཁའ་དབྱིངས་སུ་ལམ་ལམ་འཚེར་ཡོང་།
༢༠༡༡ ༡༠ ༢༡ ཉིན་རྩེ་ཁོག་ནས།
