རླུང་ཁ་ན་འདར་གྱིན་འདུག

དམྱལ་བའི་ཚེར་མདུང་སྙིང་ལ་ཟུག་པའི་འོ་དོད་དག

ཁྱོད་ཀྱི་རྣ་རྒྱབ་ནས་ལྷགས་པ་དང་འགྲོགས་ནས་བཞུད་དུས།

ལས་དབང་གི་ལྷན་པ་ནག་པོ་དེ་ཡང་།

བར་སྣང་ན་རླུང་གིས་སྒུལ་གྱིན་འདུག

འཇའ་ཚོན་གོས་སུ་རེ་བའི་རྟ་ཁ་ཧར་གྱིས་བསྒགས་ཏེ།

མགོ་བོ་ཇི་ལྟར་མཐོ་རུ་བསྲིངས་ནའང་།

ཆར་བ་དེས་སྨིན་མའི་རྫུབས་ཀྱང་བརླན་པར་བྱས་པས།

གདམ་འོས་པའི་ཁ་ཕྱོགས་དེ་ཡང་།

སྔར་བཞིན་རླུང་ཁ་ན་འདར་གྱིན་འདུག

                         ༢༠༡༡    ༩     ༡༨ ཉིན་རོང་བོ་ནས།

བརྩེ་དུང་ནི་ཅི་རེད།

དེ་ནི་བཟུང་ན་ལག་པ་འཚིག་ཅིང་བཏང་ན་སིལ་བུར་ཆག་འགྲོ་བའི་རྫ་མ་དེའོ།

བཟུང་ན་སྤར་མོས་ཁེབས་ཤིང་བཏང་ན་ཁང་པ་གང་འགྲོ་བའི་མར་མེ་དེའོ།

བརྡབ་ན་སྙིང་གི་རུས་པ་འབིག་ཅིང་རུམ་ན་ལུས་ཀྱི་ཚ་བ་བསྐྱེད་པའི།

འཐུང་ན་ལྕེ་ལ་མདུད་པ་རྒྱག་ཅིང་མྱིད་ན་རྒྱུ་མའི་ཁ་ཁུགས་གཟེར་བའི།

མེ་ཡི་ཕུར་བུའམ        ཆུ་ཡི་ཞགས་པ་དེ་ཡང་བརྩེ་དུང་སྟེ།

ད་རུང    སྐྱི་ལྤགས་ཀྱི་སྲ་མཁྲེགས་རལ་བར་བྱེད་པའི།

མིག་ཤེས་ཀྱི་ཚོར་བ་སྦྲིད་པར་བྱེད་པའི།

རུས་རྐང་གི་ཁུ་ཞག་འཕྱོ་བར་བྱེད་པའི        དེ་དང་དེ་ཡང་ངོ་།

                              ༢༠༡༡   ༩   ༡༩ ཉིན་རོང་བོ་ནས།