གླུ་མ་ཚེ་དབང་ལྷ་མོར་འདི་ལྟར་བཤད་པ།

                                ཁ་བ་རྐང་གླིང་།

ཁོང་གིས་ལྷ་མོ་རེད་འདྲ་ཟེར། །

མོ་ཡིས་མཛེས་མ་རེད་ཞག་ཟེར། །

ཁོང་ཚོ་དང་ཁོང་མོའི་བར་ནས། །

ཁྱེད་རང་མཛེས་མའི་མཛེས་མ་འདྲ། །

སྙན་མོ་གླུ་ཡི་གདང་དབྱངས་ཀྱི །

དབྱངས་ཅན་ལྷ་མོ་ཞེས་པ་ཡང་།

འདི་ལས་ལྷག་ཅིག་ཨེ་ཡོད་ཟེར། །

འདི་ལས་སྙན་ཅིག་ཨ་ཡོད་ཟེར། །

མི་རིགས་གཉིད་ལས་དཀྲོག་པའི་གླུ །

ཡ་གིའི་དགོན་པའི་སྤྲུལ་སྐུས་ཀྱང་ །

འདི་ལས་ལྷག་ཅིག་མི་འཇོན་ཟེར། །

འདི་ལས་གཟབ་ཅིག་མི་བརྗོད་ཟེར། །

རྒྱ་སྲང་ཁྲོམ་ལམ་གང་ས་རུ། །

ཁྱེད་ཀྱི་འོད་སྡེར་ཁོ་ནས་ཁྱབ། །

ཁྱེད་ཀྱི་གླུ་སྐད་ཁོ་ནས་རྒྱན། །

སུན་ནོ་ཟེར་མཁན་ཡོད་རེ་དཀོན། །

ཆང་ཁང་མྱུལ་བའི་སྐྱེ་བོ་འགའ། །

ཁྱེད་ལ་འོ་ཞིག་བྱེད་པའི་ཚེ། །

སྤྱུག་ཀྱང་སད་ཀྱང་མི་འགྱོད་ཟེར། །

གཏུབ་ཀྱང་སྦས་ཀྱང་མི་ངུ་ཟེར། །

མཚར་པོ་མཚར་བའི་མཁའ་འགྲོ་མ། །

ས་འགྲོ་གླུ་མ་ཁྱེད་ཉིད་ལས། །

འུ་ཅག་སྐྱེ་བོའི་མདུན་ས་རུ། །

གླུ་མ་ཁྱེད་ཉིད་མཚར་བཞིན་རྒྱུ །

ད་དུང་སྒུག་ཡོད་གླུ་མ་ལགས། །

མི་རིགས་གཉིད་སློང་སྒུག་ནས་ཡོད། །

སྙན་མོའི་གླུ་དབྱངས་སྒུག་ནས་ཡོད། །

ལྡེམ་མྱུར་ཞབས་བྲོ་སྒུག་ནས་ཡོད། །