དྲན་གདུང་སེམས་ཀྱི་སྐྱོ་གླུ །

ལྷ་གཅིག་ཚངས་པའི་བུ་མོ་ཀྱེ །

འཇིག་རྟེན་སྙན་པའི་ངག་བསྡུས་མ།།

སྙན་འཇེབས་ཚིག་གི་བུ་རམ་དང་།།

དོན་ཟབ་རྒྱ་མཚོར་ངོ་སྐྱེངས་པའི།།

ངག་རིག་ལྷ་མོ་བདག་མགྲིན་ཕེབས།།

ཀྱེ་ཀྱེ་ངག་རིག་སྒྱུ་འཕྲུལ་མ།།

ཕྱི་ཕྱིར་ཕྱོགས་ནས་མ་ཕེབས་པར།།

དད་པའི་བུ་ཆུང་ལེགས་སྐྱངས་ཏེ།།

སྙན་ངག་སྦྲང་ཆར་འབེབ་མཛོད་ལགས།།

ངག་རིག་དངོས་གྲུབ་འོད་ཟེར་གཏོད།།

ཡིད་འཕྲོག་ཡིད་ཀྱི་དགའ་མ་ཁྱེད།།

མུན་པའི་ཀློང་གི་ཟླ་བ་ཡིན།།

ཚ་གདུགས་དྲག་པོའི་གྲིབ་བསིལ་ལགས།།

སྙིང་སྡུག་སྙིང་གི་མཛའ་མོ་ཁྱེད།།

ཡུད་ཙམ་མ་ཐུག་མུན་པས་གཡོགས།།

དུས་ཡུན་ཞགས་དང་ཟླ་བ་འདི།།

ལོ་ངོ་སྟོང་ལ་བུད་པ་ལྟར །།

བདག་སེམས་གདུང་བས་ན་ཟུག་གིས།།

ཟས་ཀྱི་དང་ག་ཉམས་བཞིན་དུ།།

ནད་ཀྱི་རྩེད་མོ་རྩེ་བར་བྱེད།།

སྙིང་གྲོགས་ཡིད་ཀྱི་ལྷ་མོ་ཀྱེ །

ཁྱེད་ནི་གནས་མཆོག་ལྷ་སའི་གཞུང་།།

ཇི་ལྟ་ཇི་ལྟར་སྐྱིད་ན་ཡང་།།

བདུད་རྩི་སྨན་དང་འདྲ་བའི་ཁྱེད།།

ང་ཉིད་སྐྱོབས་པར་ཕེབས་ཤོག་ལགས།།

སེམས་པའི་ཐང་གི་མེ་ཏོག་གཅིག །

ནམ་ཡང་ཁྱེད་ལ་བལྟས་པ་ན།།

ང་ཡི་ལུས་སྟོབས་འཕེལ་བཞིན་དུ།།

དྲོད་ཀྱི་སྣང་བ་ཚོར་འོང་ལ།།

སྐྱིད་པའི་སེམས་པ་དྲོས་ཡོང་།།

ཡིད་འཕྲོག་ང་ཡི་ལྷ་མོ་ལགས།།

དྲན་པའི་གདུང་བ་ནག་པོ་ཡིས།།

ང་ཡི་ལུས་སེམས་གཉིས་པོ་ལ།།

ཐོ་བ་ནག་པོས་བཞུས་པ་ཡིས།།

ད་ནི་ནད་ཀྱི་བཟི་ནས་འཐོམ།།