མཛེས་མ་ཚོར་འདི་ལྟར་ལབ་ན།
ཆུ་མོས་རྡོང་ཀ་གཞུ་ལ་ཉ་མོས་དངངས་འདར་བྱེད།།
གཟིག་གིས་མཆེ་སྡེར་ངོམ་ཞིང་ལུག་གིས་མིག་མཆུ་འདོན།།
ལྦ་མོས་གཡོ་རྒྱུ་འཁྲབ་ཅིང་བོད་ཁྱི་ངུ་སྐད་འཆོར།།
དེ་རིང་བསུས་པའི་བག་མ་ཁྱོ་གའི་མཆན་འོག་ཤུམ།།
རྩེ་ཤིང་དག་གིས་སྙིང་བརྗེའི་མིག་ཆུ་ཤམ་ཤམ་ལྷུང་།
མེ་ཏོག་འདི་ཚོས་རླུང་དང་མཉམ་དུ་སྐྱོ་གླུ་ལེན།།
ཆུ་བོ་བཞུར་གྱིན་བཞུར་གྱིན་སེམས་གསོ་ཡང་ཡང་བྱེད།།
བག་གསར་འདི་ལ་འུ་ཚོས་སྙིང་བརྗེ་བྱེད་ལགས་སམ།།
རི་བོས་མགོ་བོ་དུད་ཅིང་སྤྲིན་པས་ངུ་ཚིག་འདོན།།
ཆར་པས་སྐྱོ་ཆར་ཕབ་ཅིང་འབྲུག་གིས་ཚིག་ངན་བསྒྲོག།
ཚངས་པ་ཁོང་ཁྲོས་བཟི་སྟེ་ཆད་པ་སྤྱོད་ལ་བྲེལ།།
མཛེས་མས་ད་དུང་འདི་ལྟར་བསྡད་ན་འགྲིག་གམ་ཀྱེ།།
