འདོད་པའི་སྙན་ངག་གི་ཕྲན་བཤད།
ཁྱོད་ནི་ལྕགས་ཀྱི་ཐབ་ཀ་དང
བདག་ནི་དེའི་སྟེང་ན་ལྷོག་ལྷོག་ཏུ་གདུ་བཞིན་པའི་ཆུ་ཁོལ་ཏེ
ཁྱོད་རང་འཁྱག་པས
བདག་ཀྱང་འཁྱག་པར་འགྱུར་ལ
ཁྱོད་ཀྱི་འདོད་པའི་མེ་ལྕེར་གཟིམས་པ་མེད་པས
བདག་ནི་རླངས་པར་གྱུར་ཏེ་སྟོང་བའི་དབྱིངས་སུ་ཐིམ
ཁྱོད་ནི་རི་མོའི་ངོས་ཀྱི་མིག་དང
དར་ཟབ་གྱོན་པའི་མཚོ་མོ
ཨར་འདམ་ལས་སྐྱེས་པའི་ཨུཏྤལ་དམར་པོ་དང
སྤང་གཞོང་གི་ཨུག་ཆོས
བདག་གིས་བགྲང་མི་ཚར་བའི
སྡུག་བསྔལ་གྱི་གསེར་སྒོར
ཁྱོད་ནི་དཔའ་བོའི་རྨི་ལམ་ལས་འཁྲུངས་པའི
འཇའ་ཚོན་དང
བདག་ནི་དེ་འཛིན་ཕྱིར་རྒྱུག་པའི་བྱིས་པ་གཅེར་བུ་མ་ཞིག་སྟེ
ཅི་ཙམ་སོང་བས་དེ་ཙམ་རྒྱང་རིང་དུ་གནས་པ་དེས
བདག་གི་ཚེ་གཅིག་གི་རྨི་ལམ་ཇེ་རིང་དུ་བསྲིངས
ཤ་དང་ཁྲག་གི་ཟམ་པ་གྲངས་མེད་པ་བརྩིགས
ཁྱོད་ནི་ཐིག་ལེ་དམར་པོས་མཚན་པའི་གཟིག་མོ
འཆི་བ་མཚོན་པའི་ཆང་ཁང་ཞིག་ཁྱོད་ཀྱི་མིག་ལས་མངོན
ཡང་དང་བསྐྱར་དུ ཆར་བ་ཟ་ཟི་དག་སྲེག་བྱེད་ཀྱི་གློག་ཞགས་དང་ལྷན་དུ་མངོན
༢༠༡༣ལོའི་ཟླ་༣པའི་ཚེས་༡༩ཉིན།
སྙན་ངག་འདི་ནི་གཞོན་རྩོམ་པ་བོ་གྲག་ཅན་སྐྱབས་ཆེན་བདེ་གྲོལ་གྱིས་བརྩམས།
ཕྲན་བཤད་པ་གུས་པ་ཁ་བ་རྐང་གླིང་ཡིན།
སྙན་ངག་ལེགས་པོ་ཞིག་ཁྱོང་དགོས་ན་ངེས་པར་དུ་མེ་ལོང་ནང་དུ་གཟུགས་བརྙན་
འཆར་བ་ལྟར་མ་ཡིན་པར། དེའི་ལྟག་རྒྱབ་ནས་སྡུག་ན་མྱ་ངན་གྱིས་ངུ་འདོད་
པའི་སེམས་ཚོར་ཞིག་དང་དགའ་ན་གླུ་དབྱངས་ལེན་ཞིང་གར་འཁྲབ་བྱེད་པའི་
སེམས་ཚོར་ཞིག་སྦྱིན་ཐུབ་ན་སྙན་ངག་པའི་འགན་འཁྲི་ཁྱོངས་ཚར་བ་ཡིན་ལ་
དེ་ནི་ཆེས་ལེགས་ཤོས་ཀྱི་སྙན་ངག་ཞིག་ཀྱང་རེད།།
དེས་ན་བོད་ཀྱི་སྙན་ངག་པ་གྲག་ཅན་སྐྱབས་ཆེན་བདེ་གྲོལ་གྱི་སྙན་ངག་
༼འདོད་པའིོ་སྙན་ངག་༽ཅེས་པ་འདི་ལ་ཡང་གོང་གི་ལེགས་ཆ་མཐའ་དག་ཚང་
ནས་འདུག ༼ཁྱོད་ནི་ལྕགས་ཀྱི་ཐབ་ཀ་དང་༽ ཞེས་པའི་མཚན་པ་དང་པོ་འདིར་
གཅིག་ལ་གཅིག་བརྟེན་གྱི་བསམ་པའམ་ཕོ་མོ་གཉིས་ཀྱི་བྲལ་མེད་ཀྱི་དགའ་རོགས་བསྒྲིགས
ཚར་ཙམ་གྱི་སེམས་ཚོར་མངོན་རྗེན་དུ་བཏོན་ཏེ་སྙན་ངག་མཚན་པ་དེ་ཀློག་པའི་སྐབས་
ང་དང་ངའི་ཆུང་མ་ངེད་གཉིས་དགའ་རོགས་བསྒྲིགས་དུས་ཀྱི་སེམས་ལྗོངས་མིག་ལམ་དུ་
ལམ་ལམ་འཆར་་གྱིན་འདུག མཚན་པ་གཉིས་པ་དང་གསུམ་པའི་ནང་དེའི་ནང་
སྙན་ངག་པས་ཇི་ལྟར་མདུན་ནས་མདུན་དུ་བཅར་ཀྱང་སེམས་ཀྱི་ཕོ་མོ་གཉིས་ཀྱི་བརྩེ་
དུངས་ལ་བརྒལ་བ་ཞིག་བྱུང་ནས་རྒྱང་ནས་རྒྱང་དུ་འགྲོ་བཞིན་ཡོད་པས་སེམས་ཀྱི་སྡུག་
ངལ་ནི་བཤད་ནས་བཤད་མི་ཐུབ་པ་ཞིག་ལ་གོ་ན་འགྲིག་གི་བསམ། མཇུག་མཐར་
སྙན་ངག་པའི་སེམས་ཀྱི་མཛའ་མོ་དེས་སྙན་ངག་པ་དང་་རྒྱང་བཞུད་བྱས་པས། སྙན་ངག་
པ་ཡིད་མུག་དང་སྡུག་ངལ་གྱི་ཁོའི་འཚོ་བའི་ནང་ཆེས་བདེ་སྐྱིད་ཆེ་ཤོས་ནི་ལྦུ་ཆང་བརྔམས་
བཏུངས་བྱེད་རྒྱུ་དེ་ལས་མེད་ཅིང་། ཁོའི་འཚོ་བ་ནི་མག་མོག་དང་རབ་རབ་ཞིག་དུ་མངོན་
ཞིང་། དེ་ཡང་མེད་བརླགས་དུ་གཏོང་མཁན་ནི་བུ་མོ་བརྩེ་བ་མེད་པ་དེ་ལས་གཞན་མིན་
པ་གོ་བས་ཆོག་པ་འདྲ།།
མ་གཞི་སྙན་ངག་ལ་འབྲེལ་བཤད་ཅིག་རྒྱག་མི་ཐུབ་ཟེར་ཡང་། མི་སོ་སོས་གོ་བ་ལེན་
གཏང་དེ་བརྗོད་རྒྱུ་ནི་ཀློག་པ་བོ་ཞིག་གིས་འགན་འཁྲི་རེད་ལ་རྩོམ་པོ་ཉིད་དང་འབྲེལ་འདྲིས་
བྱེད་པའི་ཐབས་ཞིག་ཀྱང་རེད། གོང་གི་ཕྲན་བཤད་འདི་ནི་ངས་གོ་བ་ལེན་གཏང་ཞིག་ཡིན་
འགྲིག་མིན་ལ་ལྷན་རྒྱས་ཀྱི་སྐད་ཆ་བཤད་རོགས།།
