གློག་ཞུན་འོག་གི་གྲོང་སྡེ།

                            ཁ་བ་རྐང་གླིང་།

གློག་ཞུན་ཀླུབས་པའི་གྲོང་སྡེ

ཟླ་འོད་འོག་ན་རྒྱུ་སྐར་བཞིན་ལྷེམ་ཙམ་ལྷེམ་ཙམ

སྐར་མ་ལྷ་བུའི་གྲོང་སྡེ

གྲོང་སྡེ་དེའི་ནང

མི་ཆོགས་ཀྱི་ཁོལ་བཞིན

གཅིག་གིས་གཅིག་ལ་ཅེར་ནས

མཛུབ་མོ་དག་ཕན་ཚུན་སྣ་ལ་འཛུགས་རེས་བྱེད

བཅའ་དངོས་དག་ནང་དུ་བཅུག་དགོས

ལམ་ལ་སྐྱོད་རྒྱུ

མིག་ཟུང་ཕྱོགས་བཞི་ནས་འཚོལ་དགོས

སྔོ་ལྗང་གི་རྩ་ཐང

རྩ་ཐང་གི་ལུག་ཁྱུ      

ལུག་ཁྱུ་དང་ཁྱུང་དཀར་མཛོ་མོ

ངའི་ཆུང་དུས་ཀྱི་རྩེད་གྲོགས

རྩེད་གྲོགས་དེ་དག

སྨུག་པས་བཟུང་བའི་སྐར་མ་བཞིན

རེས་གསལ་རེས་མོག