མཆོད་མཇལ་ནི་མགོ་རྡུང་རྒྱུ་མ་ཡིན་ནོ།།

སྐར་མདའི་རླང་འཁོར་བསྡད་དེ།།

བདེ་འཇམ་གཞུང་ལམ་བརྒྱུད་ནས།།

ས་སྐྱའི་སྒོ་ཆེན་འཛུལ་ཡོད།།

སྒོ་ཆེན་ནང་གི་སྒོ་རྭ།།

ཟང་ཟིང་མི་ཡི་ཁེངས་འདུག།

བདག་ལ་བདག་རང་འདུག་སའི།།

སྦར་ལེབ་གནས་ཡང་མིན་འདུག།

མནོ་བསམ་སྐུད་སྣེར་རྒྱུས་ན།།

དད་པས་དེད་ནས་འོང་འདྲ།།

མཆོད་ཁྲིའི་སྐུ་འདྲར་མ་གཟིགས།།

མགོ་བོ་མཆོད་ཁྲིར་བརྡུང་གི།

སྒོར་མེད་དབུལ་པོ་ཡིན་ཀྱང་།།

བསག་པའི་སྒོར་མོ་དེ་དག།

ཕྱུག་པོའི་བདག་པོར་གཏེར་རོ།།

ག་ལེར་ཞིབ་མོར་ལྟས་ན།།

མཚར་པོའི་ལྟད་མོ་མང་ངོ་།།

དེ་འདྲ་དེ་འདྲའི་གནད་ལ།།

བསམ་བཞིན་བསམ་པར་བྱས་ན།།

ཨ་ཐང་ཆད་པར་བྱེད་དོ།།

དད་པ་དད་པ་ཟེར་བཞིན།།

དད་པའི་ནང་གི་དད་པ།།

གང་ལ་ཟེར་བ་མི་ཤེས།།

འདྲ་སྐུ་མཐོང་མ་ཉིད་དུ།།

གཟན་དམར་རེག་མ་ཉིད་དུ།།

མགོ་སྒུར་ལྕེ་སྣར་བྱེད་པ།།

བླུན་པོ་སྐྱག་གཟན་འགའ་ཡི།།

བླུན་རྟགས་སྟོན་ལུགས་ཡིན་ནོ།།

ཞིབ་མོས་ལེགས་པར་དཔྱད་དེ།།

ཤེས་རབས་རྒྱལ་པོ་དག་ལ།།

བདག་ཀྱང་ཕྱག་དབང་ཞུ་འོ།།

མི་ཞུ་བདག་གི་ཟེར་ན།།

བདག་གི་སྲོག་འདི་འབུལ་ལོ།།