བསླབ་བྱ་ཀ་ལིའི་རང་སྒྲ།།
གྲོགས་ལ་གདམས་པའི་ཞུ་མཆིད་ཞིག །
ཀ་ཁའི་རིམ་པ་གྱེར་དབྱངས་ཤེས་པ་ཙམ་གྱིས།།
ཁ་ཕོ་སྟོང་ལབ་ཙམ་གྱིས་དུས་ཚོད་མ་གཏོང་།།
ག་ལེར་བོད་ལ་ཕན་པའི་བྱ་བར་རེམས་དང་།།
ང་དང་ཁྱོད་ལ་བབ་པའི་འོས་འགན་རང་རེད།།
ཅ་དག་རྒྱལ་བའི་བསྟན་ལ་སྡིག་ལྟ་མ་བྱེད།།
ཆ་མེད་དེང་གི་བཤད་ཡམས་རྗེས་ལ་བསྙེག།
ཇ་སོགས་འབྱོར་དགུ་གཏོང་བའི་ཡོ་བྱད་མེད་རུང་།།
ཉ་ཟླའི་དཔལ་བཞིན་ལྷག་བསམ་བོད་ལ་དཀར་དགོས།།
ཏ་ཐ་ག་ཏའི་བསྟན་ལ་ལོག་སྨྲ་མ་བྱེད།།
ཐ་མལ་ང་ཚོ་ལྟ་བུས་རྟོགས་པ་དཀའ་བས།།
ད་ནས་ཕྱི་ཆད་མི་བགྱིས་གཡའ་དམ་མེད་ན།།
ན་རྒ་འཆི་བའི་ཚེ་ན་འགྱོད་པ་འོང་ངེས།།
པ་ཏྲ་བསྣོལ་འདྲའི་བློ་མང་དྲྭ་ལ་མ་ཚུད།།
ཕ་མེས་རེ་འདུན་གསོན་པོ་སྙིང་ལ་འཆང་ན།།
བ་ལང་རྟུལ་ཞུགས་ངང་ཚུལ་དེ་གར་མ་སེམས།།
མ་ལུས་དོན་དགུ་བློ་རྩེ་གཅིག་གིས་བསྒྲུབ་དགོས།།
ཙ་རེ་བ་ཡིས་བྱ་བ་གང་ཞིག་བསྒྲུབ་ཀྱང་།།
ཚ་ཟེར་ལྟ་བུའི་ཕུགས་བསམ་མངོན་གྱུར་ཡོང་དཀའ།།
ཛ་ཡ་བཤེས་ཀྱི་གྲོགས་བཟང་རྒྱུན་དུ་འགྲོགས་ན།།
ཝ་ལེར་སྒེར་ཚུགས་གཙང་མ་རྒྱུད་ལ་འབྱོར་ངེས།།
ཞྭ་དཀར་བསྟན་སོགས་ནང་ཆོས་རིས་མེད་སྦྱོང་དང་།།
ཟ་མ་ཏོག་སོགས་གཞུང་ལུགས་ཀུན་མ་རྟོགས་ཀྱང་།།
འ་ཅག་ཁ་ཕྱོགས་མཐུན་པའི་བསམ་གཞིག་སླེབས་ན། །
ཡ་མཚན་དོན་སྒོ་ཆེན་བའི་གཞི་རྩ་དེ་ཡིན། །
ར་ལྟར་གྱོང་བའི་རང་གཤིས་ཁེངས་དྲེགས་འདུལ་ཞིང་།།
ལ་ལུང་གང་ལ་ཤེས་རིག་འོ་བཅུད་འཚོལ་ཏེ། །
ཤ་ཁྲག་རྟེན་ལ་ཚེ་འདིར་སྙིང་པོ་ལོན་དང་།།
ས་འདིར་མྱི་ལུས་བླང་བའི་རིན་ཐང་དེ་ཡིན། །
ཧ་ཅང་སྙན་ཆ་དབེན་པའི་ཀ་རྩོམ་ལྡབ་ལྡིབ། །
ཧ་ལམ་ཕན་པའི་མན་ངག་འགའ་ཙམ་མཆིས་ན། །
ཨ་མའི་བུ་ཚོས་ཡིད་ལ་དམ་པོར་ཟུངས་དང་།།
ཨ་བུའི་སེམས་ཀྱིས་འབོད་པའི་རེ་བཅོལ་དེ་ཡིན།།
༢༠༡༣ལོ་ཟླ༣པའི་ཚེས་༢༡ཉིན་ཞིང་ཆེན་བོད་ཡིག་སློབ་གྲྭ་ནས་སྦྱར།།
དོན་མེད་འཆོལ་ཚིག་མ་སྨྲས་ཞིང་། །སྙན་པའི་དྲང་བདེན་བུ་ཡི་ངག །
བསླབ་བྱའི་ཀ་རྩོམ་རང་སྒྲའི་ཉམས། །
བཟང་པོ་འདུག་པས་དགའ་བསུ་ཡོད། །
སྤུན་ཟླ་ནས