དུང་སེམས་ཀྱི་ཕྱི་མིག།

 

 

     

མཛེས་མཛེས་དབྱར་གཞུང་གི་མེ་ཏོག།

ཆག་སྒོ་སྟོན་དུས་ཀྱི་བ་མོ།།

དུས་ཚོད་འཕེལ་འགྲིབ་ཀྱིས་འཁོར་བསྐྱོད།།

ང་ལ་སྐྱོ་བ་དེ་མ་གནང་།།

 

 

ལས་དབང་རླུང་ཁྲོད་ཀྱི་ཚེ་འབར།།

སེམས་པ་ལ་ཁ་ཡི་དར་ལྕོག།

མི་ཁ་རླུང་དམར་གྱིས་འཚུབ་ཕྱོགས།།

ང་ལ་འཁོར་བ་རུ་མ་གནང་།།

 

 

སྒེག་ཉམས་མཚར་སྡུག་གི་ལང་ཚོ།།

བར་སྣང་ཆར་ཤུལ་འཇའ་ཚོན།།

བདེན་གྲུབ་ཡོད་ཡོད་སྣང་བས།།

ང་ལ་སླུད་བྲིད་ཅིག་མ་གནང་།།

 

 

ཕན་ཚུན་མཇལ་འཛོམས་ཤིག་བྱུང་བ།།

ལྡོག་མེད་ལས་དབང་གིས་བཀོད་འདོམ།།

དབང་ཆེན་ལས་དབང་གི་རྒྱལ་མོས།།

ཁ་ཁར་གཏོང་བ་རུ་མ་གནང་།།

 

 

དགའ་སྐྱིད་ལྷན་འཛོམ་འདི་དཀའ་བ།།

གྱེས་བྲལ་དུས་ཚིགས་འདི་མྱུར་བ།།

ཕྱི་ཕྱག་བརྩེ་དུང་གི་མདའ་ཁ།།

སྙིང་ལ་སྣུན་པ་དེ་མ་གནང་།།

 

སེམས་པ་དྭངས་གཙང་གི་ཆུ་རྒྱུན།།

དུང་ཞེན་རླབས་ཕྲེང་གི་ཟེགས་མ།།

བརྩེ་བ་རྒྱ་མཚོ་ཡི་ཀློང་དུ།།

གཅིག་ལ་གཅིག་ཐིམ་དེ་ཡིན་ནོ།།

 

 

མ་ཐུག་ལོ་ཟླ་ཡི་ནང་དུ།།

དགའ་སྐྱོ་ནོན་མ་ཡི་ཚོར་འདུ།།

སྙིང་སྡུག་དགའ་ལོ་ཡི་ཕྱོགས་ལ།།

ཕྱིར་མིག་ཡང་ཡང་ཞིག་ཤོར་སོང་།།

 

 

དུང་བརྗོད་སྙིང་གཏམ་གྱི་ཚིག་གསུམ།།

ཁུ་བྱུང་གདངས་དབྱངས་ལས་སྙན་རེད།།

མཛའ་བརྩེ་གླེང་མོལ་དེ་དྲན་ཚེ།།

སེམས་པ་བདེ་སྣང་གི་ཁེངས་འགྲོ།།

 

 

ཕར་དགའ་ཚུར་དུང་གི་བརྩེ་བ།།

ལྷད་མེད་བརྩེ་དུང་རང་གཤིས།།

དགའ་དགའ་དུང་དུང་གི་འཚོ་བ།།

མི་ཚེ་བདེ་སྐྱིད་ཀྱི་འདུན་མ།།

 

 

གཅིག་སེམས་གཅིག་མཐུན་གྱི་ངང་དུ།།

མཛའ་བརྩེ་འོ་ཆུ་དེ་ལྷན་འདྲེས།།

སོ་སོར་འབྱེད་པ་རུ་མེད་ན།།

བརྩེ་སེམས་ངོ་བོ་དེ་དབྱེ་མེད།།

 

 

བརྩེ་བ་ལྷད་མེད་ཀྱི་དུང་ཞེན།།

ཀ་ར་སྦྲང་རྩི་ལས་མངར་རེད།།་

མྱོང་བའི་བྲོ་བ་དེ་བསམ་ཚེ།།

དབང་མེད་འགྲམ་ཆུ་དེ་ལྡོག་འོང་།།

 

 

སྒེག་ཉམས་འཛུམ་མདངས་དེ་མཐོང་ཚེ།།

དགའ་བདེ་སྣང་བ་ཞིག་སྐྱེད་འོང་།།

སྙིང་སྡུག་མཛའ་མོ་ཡི་ཞལ་རས།།

གངས་ལྷ་མེ་ཏོག་ལས་མཛེས་རེད།།

 

 

དྭངས་གཙང་མཁའ་དབྱིངས་ཀྱི་ངོགས་སུ།།

བཅོ་ལྔའི་དུང་ཟླ་དེ་ཚེས་དུས།།

དྲན་པའི་མེ་ལོང་གི་མཐིལ་དུ།།

ཆུང་འདྲེས་རྩེད་གྲོགས་དེ་འཆར་འོང་།།

 

 

ལོ་སྒུག་ཟླ་སྒུག་གི་ཁྲོད་དུ།།

དམར་ཆུང་སེམས་ཁོང་གི་གསང་བ།།

གཟུགས་མེད་ན་ཟུག་གི་རྨ་ཁ།།

སོས་སྐྱེད་འཚོ་ཐབས་ཤིག་མ་བྱུང་།།

 

 

ཟིན་མེད་བརྩེ་དུང་གི་ཚོར་འདུར།།

འདི་ལྟར་ན་ཟུག་དེ་ཆེ་ན།།

གཅིག་སེམས་གཅིག་མཐུན་དུང་བར།།

བདེ་སྐྱིད་བལྡ་འགྱུར་ཞིག་ལོས་ཡོད།།

 

 

འཐོབ་བྱ་སྣ་གཅིག་གི་ཆེད་དུ།།

དམིགས་ཡུལ་ཉག་གཅིག་དེར་བསྙེག་ནས།།

ཡོད་ཚད་ནས་ཡོད་ཚད་ཕུལ་ཏེ།།

སེམས་པ་ཁྱོད་ཕྱོགས་སུ་འཁོར་ན།།

 

 

གནམ་གྱི་འཇུ་ཐག་དེ་ཆད་ཀྱང་།།

ས་ཡི་རྟེན་ཕུད་དེ་བུད་རུང་།།

དུང་བ་གསེར་སྐུད་ཀྱི་མདུད་ལོག།

ནམ་ཡང་གྲོལ་ཐབས་རང་མི་འདུག།

 

 

 

མ་ཧྭ་ཙི་ན་ཡུལ་གྱི་གྲོང་ཁྱེར་ནས།།

        ༢༠༡༢ལོ་ཟླ༡ཚེས༡ཉིན།།