སླར་ཡང་དྲན་བྱུང་།

རླབས་ཆེན་ཐུགས་བརྩེ་རིས་མེད་འགྲོ་ལ་བཏབ།།
རླབས་ཆེན་བཞེད་དོན་བསྟན་པའི་སྲོག་ཏུ་ཆགས།།
རླབས་ཆེན་བསྟན་འགྲོ་དོན་གཉིས་ཁུར་འཁྱེར་བའི།།
རླབས་ཆེན་མཛད་འཕྲིན་བཟང་པོ་སླར་ཡང་དྲན།།

ཀ་དག་ལྷུན་རྫོགས་གཉུག་མའི་གཤིས་ཀྱི་ལུགས།།
རིགས་རྟོགས་སྒྲིབ་མེད་འོད་གསལ་ཆེན་པོ་ཉིད།།
གདོད་མའི་མགོན་པོའི་རྒྱལ་སར་མངོན་ཕྱུང་ཡང་།།
བདེ་གཤེགས་མི་ཡི་རོལ་གར་སླར་ཡང་བསྒྱུར།།

རྒྱལ་ཀུན་བསྡུས་གཟུགས་རྒྱ༵ལ་བ་ཀུན་གྱི་ཚ༵བ།།
རྒྱལ་སྲས་ཐུ་བོ་འཕགས་མཆོག་ཀུན་ཏུ་བཟང་།།
རྒྱལ་བ་ལྷ་ཡི་ཐུགས་སྟོབས་དཔའ་མངའ་བའི།།
རྙིང་དུས་འདྲེན་པ་ཆེན་མོ་སླར་ཡང་དྲན།།

བསྟན་པའི་སྙིང་ཁུང་བསྟ༵ན་གསུམ་རྩེ་རུ་འཛི༵ན
བསྟན་དོན་འགག་མེད་བོན་དབྱངས་ཕྱོགས་སུ་བསྒྲགས།།
བསྟན་པའི་རྒྱལ་མཚན་སྲིད་ཞིའི་ཁྱོན་ལ་བསྒྲེངས།།
མི་འཇིགས་སྐྱབས་སྦྱིན་ཆེན་མོ་སླར་ཡང་དྲན།།

གཤེན་བསྟན་ལུང་རིག་དབ༵ང་པོ་ཀུན་ལས་རྒྱ༵ལ།།
གཤེན་ལུགས་ཚུལ་བཞིན་སྐྱོང་གི་རྒྱལ་བའི་བུ།།
གཤེན་རབས་མཚན་གྱི་སྙན་པ་ཅིས་མི་འབོད།།
ཨ་ཧོ་སྲིད་ཞི་མགོན་པོ་སླར་ཡང་དྲན།།

གང་འདུལ་ཐབས་མཁས་སྣ་ཚོགས་སྤྲུལ་བའི་གར།།
ཅི་ཡང་བསྒྱུར་མཛད་རྒྱལ་བ་གོང་མའི་ཚུལ།།
དེ་བཞིན་རྗེ་ཉིད་གདུལ་བྱ་གཞན་མགོན་དུ།།
རེ་ཞིག་གཤེགས་པར་བདག་སོགས་ཉམ་ཐག་ལུས།།

ཁས་ཞན་དབང་ཆུང་བདག་སོགས་འགྲོ་ཁམས་སུ།།
མི་འགྱང་ལ་མོར་བྱོན་ཞིག་ཚེ་རབས་མགོན།།
བརྩེ་ཆེན་ཐུགས་རྗེས་ཟུངས་ཤིག་སྐྱབས་ཀྱི་དྭངས།།
ས་གསུམ་འགྲན་བྲལ་ཁྱེད་ལ་རྟག་ཏུ་རེ།།

ཡང་སྤྲུལ་ཉི་གཞོན་བསྟན་འགྲོ་ལྷག་སྐལ་དུ།།
མི་མཇེད་ཞིང་དུ་སླར་ཡང་འཆར་བར་ཤོག།
མཛད་དོན་སྟོང་གསུམ་ཁམས་སུ་འགེངས་པར་ཤོག།
བདག་སོགས་འགྲོ་དག་འཁོར་མཚོ་སྒྲོལ་ཅིག་གུ།།

ཞང༧གངས་སྲས་སུ་འབོད་པས།སོ་ཅུ་པདྨོ་སྙིང་ཁར་ཟླུམ་སྟེ་གསོལ་བ་ཕུད་ཚུགས་སུ་བཏབ་སྟེ་ཁམས་མི་ཉག་དར་རྩེ་མདོ་རུ་སྦྱར་བར་བླ་མའི་ཐུགས་རྗེའི་སྐྱབས་འོག་ཏུ་ཚུད་པའི་རྒྱུར་གྱུར་ཅིག་གུ།