རྟོགས་སད་ཀྱི་ང་རོ།།
སྐལ་ལྡན་ལས་འདི་སྔོན་བསགས་ཚོགས་ཀྱི་མཐུ་བྱིན་ཟབ་མོ་ཀློང་དུ་བསྐྱིལ།།
རྒྱུ་འབྲས་སྟོབས་པོ་དུས་སུ་བརྡོལ་ཞིང་བྱིན་རླབས་ཚན་ཁའི་ན་བུན་འཁྲིགས།།
སྐྱིད་ལ་སྡུག་པའི་འཇིག་རྟེན་མྱི་ཡུལ་དགའ་སྐྱོ་བཞི་མདོའི་གྲུ་ཟུར་རུ།།
བདག་ནི་རང་ཉིད་མགོན་པོར་མ་བཅོས་ལས་ཀྱིས་གདོད་མའི་རང་ནས་བསྐོས།།
རྣམ་ཤེས་འཁྱམ་པོ་མྱི་ཡུལ་འགྲིམ་ཞིང་ཞེན་པའི་ཁ་དོག་གངས་ལ་མཆེད།།
ང་ཡིས་མེས་པོའི་ལོ་རྒྱུས་ཀློག་བཞིན་ནང་རོལ་སེམས་ཀྱི་འཕྲོ་འདུ་བྱེད།།
གདོད་ནས་གྲགས་པའི་བོད་ཅེས་བྱ་བའི་རིགས་ཀྱི་བླ་དྭགས་ཅོད་པན་འཆང་།།
ཚེ་ཡི་འདུ་བྱེད་འཇིག་གི་བར་དུ་སྒང་བ་ཚང་གི་འགན་ཁྲི་ཡོད།།
དུས་ཀྱི་སྤྲིན་པ་ལྷོ་ནས་གཡོས་ཤིང་རེ་བའི་ཆར་རྒྱུན་གངས་ལ་འཇོ།།
བདེན་པའི་ཕག་ན་ཡིན་ལུགས་དག་མའི་བདེན་ཐུ་རྩ་དོན་སྙེས་ནས་ཡོད།།
ལོ་རྒྱུས་སྟོང་གི་ཡ་ཁོག་སྟོད་ན་ཁ་སང་ལྡིང་བའི་སྙིང་ཞིག་ཡོད།།
ཆོད་སེམས་བརྟན་པོས་རེ་འདུན་ཁྱེར་ཏེ་དེ་རིང་དབུགས་རྒྱུན་མུ་ནས་རྔུབ།།
ཚིག་སྦྱོར་སྐམ་པོ་བསྡེབས་ཁ་བསྟར་ཡང་ཕན་པའི་ངག་རྒྱུན་ཕྲ་བ་ཡིན།།
ཁ་ཕོ་ཚིག་གིས་ལབ་སྟོང་མང་ཞིང་གནད་ཁེལ་དོན་དེ་འཇོན་མེད་ཡིན།།
དེ་ལྟར་ན་ཡང་དུས་ཀྱི་བསྒྲགས་གཏམ་རིགས་མཐུན་སྤུན་ལ་གྲོས་ཀ་ཡིན།།
ཅིས་ཀྱང་གཞིག་ལ་ག་ཡང་བརྟག་མཛོད་ང་ཡི་ཕུ་ནུ་རེ་བ་ཅན།།
༢༠༡༣་༥་༡༣ཉིན་བྲིས།
- ཟིན་ཐོ་གོང་མ།ཕྱིར་རྟོག།
- ཟིན་ཐོ་འོག་མ།ཕ་སྐད་ཀྱིས་གདམས་པའི་མན་ངག།
ཀླད་པ་བཀྲུ་བའི་ལྗགས་རྩོམ་འདི་དངོས་གནས་ཡག་སོང་། གངས་ཐིག་གིས།