ལྷོ་རོལ་གྱི་མཚམས་སྤྲིན།།
མྱི་ཡི་རིགས་ལས་མཆོག་ཏུ་བཀུར་འོས་ཤིག།
ལོ་ཟླ་གང་འཚམ་ཤིག་གི་ཕ་རོལ་ནས།།
གངས་དཀར་ཨ་མའི་བུ་ཟིག་རྒྱང་ལ་བཞུད།།
ཐོག་འབྲུག་དྲག་ཆར་ཁྲོད་ནས་ལམ་ལ་ཆས།།
རེ་བའི་མེ་དཔུང་སྤར་ནས་སོང་མྱོང་ཡོད།།
རི་ཆུ་ཐོལ་གྱི་བརྒལ་ནས་འགྲོ་མྱོང་ཡོད།།
ཕ་ས་གོར་མོ་བསྐྱུར་ནས་འགྲོ་མྱོང་ཡོད།།
རང་སེམས་ཤུལ་དུ་ལུས་ནས་འགྲོ་མྱོང་ཡོད།།
བརྩེ་བ་དྲོད་མོ་བཞག་ནས་འགྲོ་མྱོང་ཡོད།།
ཕུགས་བསམ་གནམ་ལ་གཏད་པའི་ཕོ་རྒོད་ཅིག།
བསམ་བློ་གུ་ཡངས་གནས་པའི་གངས་བུ་ཅིག།
མིག་ཟུང་རྒྱང་ལ་ཅེར་བའི་འགྲུལ་བཞུད་ཅིག།
བདེན་དོན་གཙིགས་སུ་བཟུང་བའི་བློ་ལྡན་ཞིག།
རྟག་ཏུ་འཛུམ་གྱིས་ཕྱུག་པའི་ལྷའི་བུ་ཞིག།
ཞི་བདེ་དོན་དུ་གཉེར་བའི་ལྷའི་བུ་ཞིག།
སྤྱི་དོན་སེམས་ནས་སྙེག་པའི་གཤིས་བཟང་ཞིག།
ཕན་བདེ་ལམ་བཟང་སྐྲུན་པའི་བསམ་དཀར་ཤིག།
བདེན་པའི་རྩ་དོན་འཚོལ་བའི་མྱིའི་བུ་ཞིག།
གནས་ལུགས་ཚུལ་མཐུན་སྐྱོང་གི་བུ་བཟང་ཞིག།
འཕྲལ་ཕུགས་འདུན་མ་བཅོལ་སའི་རེ་བ་ཞིག།
གང་ཞིག་ཀུན་ལ་མི་འཆམ་མེད་པ་ཞིག།
མེ་ཏོག་སེར་ཆེན་འདྲ་བའི་དྲང་སྲོང་ཞིག།
ཕྱག་རྒྱ་ཐལ་མོ་སྦྱོར་བའི་ཚུགས་ཐུབ་ཅིག།
སྐྱིད་སྡུག་འཁོར་ལོ་འདེགས་པའི་གྱད་ཆེན་ཞིག།
གངྒའི་བཞུར་རྒྱུན་འདབས་ན་བཞུགས་ཡོད་དམ།།
སྒལ་ཚིགས་ལྷུན་པོ་བཞིན་དུ་བརྟན་རླིངས་ཤིག།
མིག་རྒྱང་ཆུ་རྒྱུན་བཞིན་དུ་རིང་བ་ཞིག།
གཉུག་སེམས་ཁ་བ་བཞིན་དུ་དཀར་བ་ཞིག།
བློ་ཁོག་ནམ་མཁའ་བཞིན་དུ་ཡངས་བ་ཞིག།
རིག་ཤེས་ཉི་ཟླ་བཞིན་དུ་གསལ་བ་ཞིག།
ཐམས་ཅད་ཕུད་དུ་མཆོད་སའི་མགོན་པོ་ཞིག།
ཀུན་གྱི་མཛའ་གཤིས་གྱུར་བའི་མ་མ་ཞིག།
སེམས་ཀྱི་གློ་སྙིང་ཁེན་སའི་དབུགས་རྒྱུན་ཞིག།
ཤ་རུས་དོན་སྣོད་བརྟས་པའི་དྲོད་ཁོལ་ཞིག།
ཡིད་ཀྱི་སྟེང་ནས་བརྗེད་རྒྱུ་མེད་པ་ཞིག།
མྱི་ཡི་རིགས་ལས་ལྷ་ཡི་ཆ་ལུགས་ཅན།།
མྱི་ཡི་རིགས་ལས་ལྷ་ཡི་བསམ་བློ་ཅན།།
མྱི་ཡི་རིགས་ལས་ལྷ་ཡི་མཛད་སྤྱོད་ཅན།།
མྱི་ཡི་རིགས་ལས་མཆོག་ཏུ་བཀུར་འོས་ཤིག།
དེ་ལ་ལྷག་པའི་སེམས་ཤིག་སྔ་ནས་ཡོད།།
དེ་ལ་ཉི་མ་འདྲ་བའི་ཕུགས་བསམ་ཡོད།།
དེ་ལ་དྲག་ཏུ་ལྡིར་བའི་སྙིང་ཞིག་ཡོད།།
དེ་ལ་རླབས་ཆེན་ཕུགས་ཀྱི་བྱ་བཞག་ཡོད།།
དེ་ལ་བདེ་སྡུག་ཐེག་པའི་སྟོབས་ཤུགས་ཡོད།།
དེ་ལ་འགྱུར་བ་མེད་པའི་ཆོད་སེམས་ཡོད།།
དེ་ལ་བདེན་ལུགས་སྟོང་གི་རྒྱབ་རྟེན་ཡོད།།
དེ་ལ་ལོ་རྒྱུས་སྟོང་གི་རྒྱུད་རིམ་ཡོད།།
དེ་ནི་ང་ཡི་སྙིང་སྟོབས་གསོན་པོ་ཡིན།།
དེ་ནི་ང་ཡི་རེ་བ་སྣུམ་པོ་ཡིན།།
དེ་ནི་ང་ཡི་སེམས་ཀྱི་ཡིད་ཆེས་ཡིན།།
དེ་ནི་ང་ཡི་ཡོད་ཚད་དན་རྟགས་ཡིན
རྩེ་མོ་དགུང་ལ་འཕྱོ་བའི་དར་ཆ་ཞིག།
རྩ་བ་གཏིང་དུ་ཟུག་བའི་གསེར་ཕུར་ཞིག།
སྲིད་ཀྱི་ཕག་ན་ལོ་རྒྱུསས་རྡོ་རིང་ཞིག།
སྒང་བ་ཚང་གི་དྲན་ཤིང་གསོན་པ་ཞིག།
འདས་པའི་ལོ་རྒྱུས་བསམ་ན་ཁྱེད་རང་དྲན།།
ད་ལྟའི་གནས་བབས་བསམ་ན་ཁྱེད་རང་དྲན།།
མ་འོངས་འདུན་མ་བསམ་ན་ཁྱེད་རང་དྲན།།
རྒྱུན་པ་ང་ཡི་སེམས་ན་ཁྱེད་རང་དྲན།།
འབྱུང་ལྡན་༣༡༩ལོར་ཁམས་ཀྱི་མཛའ་གཞས་ལུང་བ་ནས་ཞང༧གངས་སྲས་སུ་འབོད་པས་སུག་བྲིས་སུ་བགྱིས་པའོ།།
- ཟིན་ཐོ་གོང་མ།སྟོན་ལོ་སེར་པོ།།
- ཟིན་ཐོ་འོག་མ།ཕྱིར་རྟོག།
ཞང་གངས་སྲས་ཀྱིས། ལྷོ་རོལ་གྱི་མཚམས་སྤྲིན་ཞེས་པའི་མིང་དེ་ཅིས་ཀྱང་མཛེས་ཤིང་འཚམས་པོ་ཞིག་འདུག་ཨང་། དེ་ནི་བསིལ་རིའི་སྤོ་ལ་འཆའ་བའི་ངུར་པ་ཞིག །
ཤར་གྱི་ཉལ་འགྲོའི་རླབས་ཀྱིས་ནུབ་ཏུ་བསྐྱལ། །
དྲོད་འཇམ་ཙན་དན་ལྗོན་པའི་ཚལ་གསེང་དུ། །
གནས་ཤིང་བསིལ་རིའི་ཀླུང་ལ་རེ་སྒུག་བྱེད། །
ཅེས་པ་དང་མཚུངས་པར་སྙམ་མོ།
སྙན་པོ་འདུག་བཀྲ་ཤིས་བདེ་ལེགས་རྨུ་ར་རྒོད་ནས
ཚར་གཅིག་བཀླགས་ཡོད། བཟང་གི་མུ་མཐུད་ཡིན་གདའ།གཡག་རྒོད་ནས།