ལས་དབང་གིས་བསྐོས་པའི་བུ་མོ་འཚོལ།། 

ཅང་མེད་དར་མ་ང་ཡིས།།

སེམས་ནས་བསམ་པའི་གཏམ་ཞིག ། 

སྦས་གསང་མེད་པར་བཀོད་པ།།

མི་ཁའི་རླུང་ཚུབ་ལྡང་སྲིད།།

བསམ་ཚད་འགྲུབ་པ་དཀའ་སྟེ།། 

གང་ཡང་མི་འགྲུབ་མི་སྲིད།།

སྲིད་པ་ཅི་ཡང་སྲིད་ཕྱིར།།

རེ་དོན་ཅུང་ཙམ་འགྲུབ་ངེས།། 

ཆུང་འདྲིས་མིན་ཡང་ཆོག་ལ།།

བཙན་གྱིས་བསྒྲིག་པ་མ་ཡིན།།

སྔོན་བསཌ་ལས་ཀྱི་བསྐོས་པའི།། 

ཡིད་མཐུན་བུ་མོ་འགྲོག་འདོད། ། 

མཆོག་གསུམ་གཙུག་ཏུ་བཀུར་ཞིང་།། 

ལས་དང་རྒྱུ་འབྲས་ཤེས་མཁན།།

རྒན་བཀུར་བྱིས་སྐྱོང་ལེགས་པའི།།

བུ་མོ་དེ་འདྲ་དགའ་ཡོད། ། 

རྒྱུ་དང་དབང་ཆེན་མེད་རུང་།།

རུས་རིགས་ཆེ་བ་མི་སྨོན ། །

གཟུགས་བྱད་མཛེས་པོ་མེད་ཡང་།། 

སེམས་རྒྱུད་དྲང་བར་མོས་ཡོད། །

བོད་ལཱ་གྱོན་གྱུར་མོས་ཤིང་།།

རྩམ་པ་ཡིད་གར་འགྲོ་མཁན།། 

བཅོས་མའི་ཚོན་རྩི་ཉུང་བ།།

དེ་ལ་ཧ་ཅང་དགའ་གིན།།

 ཀ་ཁའི་སྦྱོར་ཀློག་ཤེས་ཤིང་།། 

གཞན་རིག་རྨང་གཞི་ཡོད་པ། །

དེང་དུས་འགྲོ་ཕྱོགས་ཤེས་མཁན།།

དེ་ལ་མོས་པ་ཆེ་ཡོད།། 

ལས་གནས་ཡོད་ཀྱང་འགྲིག་ལ།།

མེད་ན་འཚོ་བ་ལོས་ཆོད།།

འཚོ་བའི་དགོས་མཁོ་དཔལ་འབྱོར།། 

ལག་གཉིས་འགུལ་ནས་སྒྲུབ་ཆོག །

ཕན་ཚུན་ཡིད་ཆེས་ལྡན་ཚེ།།

འདུག་གནས་རིང་ཐུང་སྐྱོན་མེད།། 

ཚུལ་མིན་བྱ་སྤྱོད་མེད་ན།།

སེམས་པའི་གཏིང་ལ་བཞག་ཆོག །

དུང་བ་ལྷད་མེད་གནོང་དང་།། 

བློ་སེམས་ཕར་ལ་གཏད་ཆོག །

ཕན་ཚུན་དགའ་ཞིང་སྐྱིད་པའི།།

འཚོ་བ་མངར་མོ་མཉམ་རོལ།། 

ཁྱོད་འདྲ་དགའ་མྱོང་མེད་ཅེས།།

ཁ་ནས་གཏམ་སྙན་མ་བཤད།།

ངོ་མ་དགའ་བཞིན་ཡོད་ན།། 

ཡུན་རིང་འདྲིས་ནས་ཤེས་ཡོང་།།

ཕན་ཚུན་ངོ་ཤེས་གྱུར་ནས།།

ཉིན་གསུམ་མ་ཕྱིན་གོང་ལ།། 

དགའ་བས་མྱོས་ཞེས་ཟེར་མཁན།།

རྫུན་མའི་བརྩེ་དུང་ཤུགས་ཆེ།། 

སེམས་རྒྱུད་མདའ་བཞིན་དྲང་སྟེ།།

ལས་དོན་མངོན་ལྐོག་མེད་པ།།

བསམ་གཞིགས་ནུས་པ་ཡོད་མཁན།། 

ཁོ་བོའི་སེམས་རྟེན་དེ་ཡིན།།

དོན་ཆུང་ཕྲ་མོ་ཙམ་ལ།།

སྣང་མེད་རྒྱང་དུ་དོར་ན།། 

ཆགས་སྡང་རུ་ང་ཉུང་བ།།

ཁྱོད་ནི་ང་ཡི་སྙིང་སྡུག །

གྲོགས་དང་སློབ་གྲོགས་འཛོམས་དུས།། 

ཁ་པར་ཡང་ཡང་བཏང་ཏེ།།

ཅ་ཅོར་མང་པོ་བཤད་མི།།

ཡིད་ལ་འཐད་པོ་མ་བྱུང་།། 

ཐད་ཀར་ཧོས་སུ་བལྟས་ཚེ།། 

སྨྱོ་གཏམ་འདྲ་ཞིག་མངོན་ཡང་།།

གཞོན་ནུ་མང་པོའི་རེ་བ།། 

འདི་འདྲ་ཡིན་པ་ངས་ཤེས།།

རེ་བ་ཆེ་གདའ་མ་ཟེར།།

གཉོམ་ཆུང་རེད་ཅེས་མ་བསྡིག ། 

བསམ་ཚུལ་གང་ཙམ་མཐུན་འདུག །

མྱོང་བ་ཐེངས་གཅིག་གནོང་དང་།། 

༢༠༡༤ ༢ ༡༤དགའ་རོགས་དུས་ཆེན་ཉིན།