སེམས་གཏམ་ཡིད་ལ་ཟུང་།།
ཐག་རིང་འགྲོ་མཁན་གྱི་སྙིང་གྲོགས་ལ་སྐྱེལ་མ་བྱ།
ཀ་ཁ་ག་ངའི་རིན་ཐང་སེམས་ལ་ངེས།།
ཁ་བའི་བུ་ཕྲུག་གྲོགས་པོ་ལྡོང་གི་མཚན།།
ག་རེ་བསམ་པ་ཤོག་ངོས་རི་མོར་བྲིས།།
ང་ཡི་གྲོགས་མཆོག་དམ་པ་ཁྱེད་རྒྱལ་ལོ།།
ཅ་ཅོ་མང་བའི་དུས་རབས་ཉེར་གཅིག་འདིར།།
ཆ་འཇོག་ཡིད་རྟོན་ཆོག་པའི་གྲོགས་པོ་ཁྱེད།།
ཇ་ཚགས་བཞིན་དུ་སྙིགས་དོར་བཅུད་ལེན་ནས།།
ཉ་མོ་ཆུ་ལ་དུངས་ལྟར་རིག་གནས་བརྩོན།།
ཏ་ཟིག་རྒྱལ་པོ་བཞིན་དུ་རྒྱུ་དགོས་ན།།
ཐ་གྲུ་མང་པོར་ཐོས་པ་བསགས་ལ་བསྐྱོད།།
ད་ལྟའི་དུས་འདིར་ཤེས་ཡོན་གཙོ་ཆེ་བས།།
ན་སོ་གཞོན་དུས་རིག་པའི་གནས་ཀུན་བརྩོན།།
པ་ཕ་ཨ་མས་བཅང་བའི་རེ་བ་དེ།།
ཕ་མཐའ་ཡས་པའི་ལྔ་ཟུང་རིག་གནས་ལ།།
བ་ཉལ་མཛོ་གྲོད་ངང་ཚུལ་མི་བྱེད་ནས།།
མ་རབས་དོར་ནས་ཉིན་བཞིན་མདུན་བསྐྱོད་བྲེལ།།
ཙ་རི་གནས་བསྐོར་འགྲོ་མཁན་ཇི་བཞིན་དུ།།
ཚ་གྲང་གང་རུང་གདོན་ལེན་ཕོད་པ་ཞིག །
ཛ་ཡའི་གསུང་དང་གཞན་རིག་གང་མང་སྦྱོངས། །
ཝ་ལེར་གསལ་བའི་མདུན་ལམ་ཡག་ཤོས་རྙེད། །
ཞ་རའི་བལྟ་སྟངས་དེས་ཀྱང་མི་འཕྲོད་པས།།
ཟ་སྤྱོད་འགྲོ་འདུག་ཀུན་དང་མཐུན་པ་ཞིག །
འ་ཅག་མི་རིགས་ལ་འདི་ཡི་སྐྱིད་སྡུག་ཤོད།།
ཡ་རབས་མི་བུ་དག་ལ་མིག་དཔེ་ལྟོས།།
ར་བཟིའི་གཏམ་གླེང་འདྲ་བའི་རྩོམ་འབྲི་དོར།།
ལ་རྒྱའི་སྟོང་གཏམ་དེས་ཀྱང་ཅི་མི་ཕན།།
ཤ་ཚའི་སྙིང་གཏམ་གནད་དོན་ངོ་མ་ཤོད །།
ས་སྟེང་འདི་རུ་བསྡད་པའི་དོན་གོ་ཆོད།
ཧ་ཅང་འདྲིས་པའི་གྲོགས་པོ་དམ་པ་ལ།།
ཕྱིན་པའི་གནས་དེར་དོན་སྒོ་ཆོད་པ་དང་།།
ཨ་མ་དང་ནི་བརྩེ་བའི་མི་བུ་ཚོས།།
རེ་བ་སྟོང་ཟད་མ་གཏོང་ཕ་བཟང་བུ།།
ཡང་གཅིག་བཤད་ན།
ཕྱི་རོལ་ཁྲ་ཁྲའི་རིགས་ལ་ཞེན་མ་ཆེ།།
མི་བུ་ཁྲ་ཁྲ་དེ་ཚོར་མགོ་མ་འཁོར།།
སེམས་པ་ཁྲ་ཁྲ་དེ་ལ་བློ་མ་གཏད།།
གང་ལྟར་ཁྲ་ཁྲའི་རིགས་ལ་དོག་ཟོན་མཛོད།།
གཞན་ལས་ལྷག་པའི་རྣམ་རིག་ཁྱོད་ལ་ཡོད།།
སེམས་པའི་སྟོབས་ཤུཌ་སྔར་ལས་ཆེར་སྐྱེད་དགོས།།
དཀའ་ངལ་གང་འདྲ་བྱུང་རུང་གདོང་ལེན་བྱོས།།
མཆོག་གསུམ་དམ་པས་ཁྱོད་ལ་མགོན་སྐྱོབས་མཛོད།།
༢༠༡༤ ༧ ༢༢ ལྷ་སའི་ལྔ་རིག་དཔེ་ཚོང་ཁང་། འོ་ཆ་སུམ་དམ་གང་འཐུང་ཞོར་བྲིས། ལྷ་གཡག་དར་མ།
